ستايلات موضة للخريف والشتا السنة دي
النهاردة هنشارك معاكم دليل لابرز ملابس الخريف والشتا السنة دي ، هنقدم لكم احدث الاتجاهات والالهامات اللي ممكن تستوحي منها للوك انيق وعصري طول الموسم ، تابعي معانا السطور الجاية واتعرفي على موضة الخريف والشتا السنة دي.
موضة الخريف والشتا:
– الوان الموسم:
في ال 2023 – 2024 الالوان بتدور حوالين الالوان الغنية والدافية ، زي العنابي الغامق, البرتقاني المحروق, الاصفر الخردلي, الاخضر الغامق ، ومن الستايلات العصرية جدا والجريئة اللي ممكن تعمليها تنسيق سويتر باللون الاصفر الخردلي مع بنطلون برجل واسعة باللون الاخضر الغامق ، وكملي الاطلالة مع انكل بوت باللون البني وحزام بلون مطابق لاضافة لمسة نهائية انيقة.
– الطبقات الانيقة:
الطبقات هي المفتاح للحفاظ على لوك انيق ومريح خلال شهور الخريف والشتا ، الكارديجان الكشمير الواسع ممكن يكون اضافة مفيدة جدا لدولابك تقدري تنسقي عليه اكتر من قطعة ، ممكن تلبسيه فوق فستان مسائي انيق ، او تلبسيه مع قميص كلاسيك بازرار وبنطلون جينز لاطلالة نهارية انيقة ، وماتنسيش اضافة حزام انيق لتصغير الوسط وتحديد شكل الجسم.
– عودة الكاروه:
الكاروه من الحاجات اللي رجعت موضة اوي السنة دي ، ممكن تستثمري في بليزر كاروه تقدري تلبسيه للشغل او في الخروجات الكاجوال ، البسيه مع تيشرت ابيض برقبة, وبنطلون جينز سكيني اسود, وانكل بوت لمظهر عصري وراقي.
– الجلد وطبعة الحيوانات:
بالنسبة للبنات اللي بيحبوا يجربوا الستايلات الجريئة ، هيكون دمج الجلد مع طبعة الحيوانات انسب ستايل تضيفيه لدولابك الموسم ده ، ممكن تنسقي جيبة جلد متوسطة الطول مع بلوزة بطبعة الفهد لخلق مظهر جريء وعصري ، وكملي اللوك مع انكل بوت اسود ، وحلق دهبي لاضافة لمسة جريئة تلفت الانتباه.
– الفساتين التريكو:
الفساتين التريكو هي مش بس انيقة ولكن كمان مريحة جدا ، وده بيخليها ضرورية لموسم الخريف والشتا ، اختاري فستان تريكو بلون محايد زي البيج او الرمادي ، وممكن ترفعي مستوى اللوك بلبس بوت طويل لحد الركبة وقبعة فيدورا واسعة الحواف لمظهر انيق.
– اللوك الرياضي:
اللوك الرياضي لسه من الحاجات الموضة ، ويعتبر اتجاه شائع السنة دي ، ضيفي لدولابك بدلة رياضية بلون ناعم محايد مع سنيكرز انيق وشنطة كروس ، اللوك ده بيجمع بين الراحة والاناقة من غير مجهود ، وده بيخليه مثالي للخروجات غير الرسمية.
– الاكسسوارات:
ملابس الخريف والشتا اكيد ماتكملش من غير الاكسسوارات المناسبة ، الاحزمة المميزة, ونضارات الشمس اللي حجمها كبير, والسلاسل الطبقات تعتبر مجرد امثلة بسيطة للاكسسوارات اللي ممكن تضيفيها للوك بتاعك الموسم ده ، جربي تمزجي الاكسسوارات وتطابقيها مع بعض عشان تعملي لوك فريد خاص بيكي واضافة لمسة شخصية لكل الملابس.