طريقة عمل المسخن الفلسطيني بالفراخ
المسخن الفلسطيني من اشهر الاكلات في المطبخ الفلسطيني والشامي ، وهي من الاكلات اللي بتتحضر في موسم زيت الزيتون بشكل خاص لانها بتعتمد عليه بشكل كبير ، تابعي معانا في السطور الجاية طريقة عمل المسخن الفلسطيني بالفراخ بالخطوات والفيديو.
طريقة عمل المسخن الفلسطيني بالفراخ:
المكونات:
– 1 فرخة متقطعة.
– ½ كيلو بصل متقطعين شرايح.
– 1 كوباية زيت زيتون.
– ¼ كوباية سماق.
– ملح وفلفل اسود.
– حبهان مطحون.
– 1 معلقة كمون.
– 1 معلقة كزبرة مطحونة.
– 1 معلقة شطة (حسب الرغبة).
– صنوبر محمص للتزيين.
طريقة التحضير:
1- قطعي البصل شرايح وفي علبة كبيرة محكمة الغلق حطي البصل وفوقيه الفراخ وتبليها بالملح, الفلفل الاسود, السماق, الحبهان المطحون, الكزبرة المطحونة, الشطة, وزيت الزيتون ، قلبيهم مع بعض كويس واقفلي العلبة وحطيها في التلاجة لمدة ساعتين ، والافضل كمان انك تتبليها قبلها بيوم.
2- هاتي صينية فرن ، رصي فيها الفراخ وغطيها بورق فويل ، ودخليها على فرن سخنة ، على درجة حرارة 180 درجة مئوية ، لما تقرب تستوي شيلي الورق الفويل عشان وش الفراخ ياخد لون.
3- دلوقتي هنحضر البصل ، هاتي حلة نزلي فيها البصل مع كل السوائل اللي فيه ، وحطيه على نار منخفضة لمدة 15 – 20 دقيقة ، لحد ما البصل يطرى من غير ما ياخد لون تحمير غامق.
4- هنجيب خبز ابيض شامي او اي نوع خبز يكون ابيض يكون سمكه رقيق ، هنغمس رغيف الخبز في خليط البصل وزيت الزيتون بحيث يشرب من السوائل ونحطه على صينية ونحط فوقيه شوية من البصل ، ونكرر مع رغيف تاني بنفس الطريقة وهكذا ، بحيث تبقى عندنا طبقات من الخبز والبصل واخر طبقة تبقى خبز ، ونرص الفراخ على الوش ونرش عليها الصنوبر المحمص.
5- وكده المسخن يبقى جاهز للتقديم ، وبالهنا والشفا.