ازاي تبطلي قلق عن رأي الناس فيكي
كلنا اكيد بنبقى عايزين نبقى محبوبين ومتقدرين من اللي حوالينا ، ولكن لما بنبدأ في الاعتماد على راي الناس فينا ، ده بيخلي رأيهم محوري لنجاحنا ، وبنبدأ اننا نصمم حياتنا عشان تناسب توقعات الناس ، ومن هنا بندخل في حلقة مفرغة ، لما بنتخلى عن قوتنا للي حوالينا ، ونسمح لانطباعتهم هي اللي تتحكم في حياتنا ، هنفقد هويتنا وشخصيتنا الحقيقية ، ونفقد الثقة في نفسنا ، عشان النهاردة في مقالنا هنقولك ازاي تبطلي تقلقي عن رأي الناس فيكي ، وتبقي انتي اللي متحكمة في حياتك.
ازاي تبطلي تقلقي عن رأي الناس فيكي:
1- ركزي على المهم:
لما تركزي على الحاجات المهمة ، هتفكري بشكل اقل في دورك الفردي ، واكتر في الصورة الاكبر ، وده هيشيل تركيز الناس عنك بشكل فردي.
2- افتكري دايما ان معظم الناس مش بيدوا اهتمام زي ما انتي متخيلة:
الناس عادة بيقضوا وقت اطول في التفكير في نفسهم مقارنة بالتفكير في اللي حواليهم ، ولو هما بيعبروا عن حاجة معينة تخص حياتك ، فاحتمال انهم مايكونوش فكروا كتير في الموضوع زي ما انتي متخيلة ، ولكن هي كانت مجرد فكرة عابرة.
3- حافظي على منظورك:
غالبا راي الاشخاص اللي حواليكي مش بيعتمد على معتقداتك وسلوكك ، ولكن على معتقداتهم وسلوكهم هما ، واللي مناسب ليهم ممكن مايكونش مناسب ليكي ، والعكس ، عشان كده بنقولك كوني زي ما انتي عايزة من وجهة نظرك الخاصة مش من وجهة نظر الناس.
4- انتي ادرى بالافضل ليكي:
مافيش حد عايش حياتك ، ممكن يبقى ليهم اراء وافكار ، ولكن الشخص الوحيد اللي يعرف ايه الافضل ليكي هو انتي بس ، وده معناه انك محتاجة تتعرفي على نفسك من خلال غلطاتك ولحظات الفشل.
5- اهتمي بشؤونك الخاصة:
اتوقفي عن سؤال الناس عن رأيهم فيكي ، اتوقفي عن القلق على ارائهم فيكي ، خصوصا لو كانت انتقادية, جارحة, او سلبية ، دايما ردود الافعال السلبية بتيجي من اشخاص سلبيين.
6- اتخلي عن الحساسية الزيادة:
لو انتي حساسة اوي ، وبتنفعلي بسرعة لما حد يقول حاجات عني برغم انك عارفة انها مش حقيقية ، بننصحك تتخلي عن الحساسية الزيادة دي ، لان عادة الاشخاص الحساسين بيضخموا الامور بشكل غير متناسب ، حاولي تخلي “جلدك تخين” 😊 زي ما بنقول كده على الاشخاص اللي بيتمتعوا بنسبة من البرود شوية او مش بيتأثروا بسرعة ، ده هيساعدك تتخلصي من الحساسية الزيادة.
7- اتوقفي عن التفكير الزيادة:
الافراط في التفكير هيخليكي تفكري انه بيتم التحكم فيكي حتى لو الموضوع مش كده ، وبالرغم انه ممكن ده مايكونش حقيقي الا انه بيحبطك بشكل ما ، اتعلمي تتحكمي في التفكير الزيادة والافكار السلبية واستبدليها بالافكار الايجابية.
8- خلي في حياتك الاشخاص اللي بيدوكي ردود افعال بناءة:
بالنسبة لاتخاذ القرارات المهمة ، عادة ممكن تحتاجي انك تحبي تاخدي بعض اراء الاشخاص اللي بتثقي فيهم ، وهنا بننصحك تختاري الاشخاص اللي بيقدموا اراء بناءة ومحددة هتفيدك فعلا.
9- ماتحاوليش ترضي كل الناس:
مستحيل ان توصلي لتوقعات كل الناس او ترضي كل الناس ، وبالتالي ماتحاوليش تجهدي نفسك في انك توصلي لده ، ارضي نفسك بس وماتحطيش في اعتبارك اي حاجة تانية ، ممكن بعض الاشخاص مايحبوش ده ولكن عادي اهم حاجة نفسك.
10- الاراء بتتغير دايما:
ماتسمحيش ابدا ان اراء الناس تتعمق اكتر من اللازم ، لان الناس ممكن يتغيروا في اي لحظة ، ولو بالغتي في الاستثمار في راي سابق ، ده هيخليكي في وضع حرج لما الشخص ده يغير رايه بعدين.
11- ازرعي اللي عايزة تحصديه:
اللي بترسليه بيرجعلك تاني ، القلق الزيادة عن رأي الناس عنك ، ده ممكن يأثر عليكي ويتحكم في سلوكك وافكارك في النهاية.
12- ركزي على اللحظة:
لما تحسي بالقلق في راي الناس فيكي ، في الحالة دي هتفوتي بعض اللحظات المهمة جدا في الحاضر ، وعلى العكس ، لما تركزي فعلا في اللحظة اللي انتي عايشاها ، مش هتقلقي على اللي هيحصل بعدين ، اتقبلي نفسك زي ما انتي وعيشي اللحظة.
13- دوري عن قدوة:
دوري على شخص بيعجبك احترامه لذاته يساعدك في توجيهك ناحية احترامك لنفسك ، ويساعدك على التخلص من عدم ثقتك في نفسك وتصور مستقبل افضل ليكي.
14- الحياة قصيرة جدا:
خلاصة الكلام ان احنا لينا حياة واحدة والحياة قصيرة ، هل فعلا انتي عايزة تقضي بعض اللحظات الثمينة دي في الحياة في القلق عن رأي الناس فيكي؟ فكري هل عايزة تعيشي حياة الناس هما اللي يقولولك تعيشيها ازاي؟ او انتي تقرري بنفسك انتي مين وعايزة ايه وازاي تخططي لتحقيق اهدافك والوصول ليها؟
في النهاية لازم تبذلي جهد واعي للتخلي عن رأي الناس فيكي ، هي مهارة ومحترجة تدريب ، زي التأمل ، ولكن مجرد ما تفهمي فعلا ازاي تتخلي ، هتشوفي العالم بشكل مختلف تماما.
الناس غي كل الاحوال هيحبوكي ، ويكرهوكي ، وده مالوش اي علاقة بيكي ، حددي اختيارك ، التزمي بقراراتك ، اتحملي المسؤولية الكاملة على اللي عايزة تعمليه وازاي تعمليه ، لما تعملي ده هتكسبي احترام الذات اللي محتاجاه والقوة عشان تعملي اللي انتي عايزاه ، من غير لوم اي شخص على اخطائك.
