4 تسريحات شعر ممكن تسبب لك الصداع
الصداع ممكن يكون ليه اسباب مختلفة ، زي الاجهاد, ارتفاع ضغط الدم, الاصابة, او حتى الجو ممكن يكون واحد من الاسباب ، كمان طريقة تصفيف شعرك عامل رئيسي يسبب لك الصداع ، بعض تسريحات الشعر اللي بتضغط على فروة راسك ممكن تأدي للشعور بالالم ، والنهاردة من خلال موضوعنا جمعنالكم اكتر 4 تسريحات شعر ممكن تسبب الصداع ، وتعملي ايه للتخلص من المشكلة.
تسريحات شعر ممكن تسبب الصداع:
1- ديل الحصان:
تحت بصيلات شعرك وفي فروة راسك موجود اعصاب حساسة جدا ممكن تحس بالالم ، وتسريحة ديل الحصان ممكن تضغط على الاعصاب دي ، وده هيأدي للصداع ، والحالة دي معروفة وشائعة جدا واسمها متلازمة صداع ديل الحصان.
2- الباندانا:
الاشخاص اللي دايما يلبسوا الباندانا ضيقة على الراس ممكن يصابوا كمان بالصداع ، والصداع ده بيحصل بسبب الضغط الخارجي المستمر على جبهتك وفروة راسك ، وغالبا بيتوصف النوع ده من الصداع بانه ضغط معتدل مستمر ، وبيكون مؤلم اكتر في المنطقة اللي عليها الضغط من راسك ، ولو بتلبسي باندانا ضيقة لفترة طويلة ممكن الالم يبقى اسوأ.
3- الضفاير الضيقة او المحكمة:
الضفاير الضيقة اوي ممكن تأدي كمان للصداع بسبب الضغط الخارجي ، لما الشعر بيتضفر باحكام اوي ، ده بيحط ضغط اضافي على فروة راسك وبيسبب لك الصداع ، بالاضافة انه بيسبب تلف الشعر ، والخبراء كشفوا ان بعض الاشخاص بيتأثروا بصداع الضغط الخارجي اكتر من غيرهم بسبب عوامل داخلية ، على سبيل المثال ، بعض النساء بيكون عندهم فروة راس حساسة اثناء فترة الدورة الشهرية ، وبالتالي الضغط الزيادة عليها في الوقت ده هيسبب الصداع.
4- وصلات الشعر:
وصلات الشعر كمان من الاسباب اللي ممكن تسبب لك صداع قوي ، اضافة وزن زيادة لشعرك بيخلق ضغط زيادة على راسك ، كمان السحب المفرط لفروة راسك وبصيلات الشعر ممكن يتسبب في حساسية الاعصاب في فروة الراس ، على عكس اي تسريحة تانية ، وبالتالي وضع وصلات الشعر باستمرار هيأدي للضغط المستمر على فروة راسك.
طريقة التخلص من صداع الضغط الخارجي:
– دلكي فروة راسك بالراحة في المنطقة اللي حاسه فيها بألم وخدي نفس عميق.
– اتجنبي الباندانا واكسسوارات الشعر غير الضرورية.
– جربي تسريحات الشعر اللي مش بتسبب ضغط زيادة على فروة راسك ، زي الكحكة الفضفاضة, ديل الحصان المنخفض, الضفاير الفضفاضة, او حتى قص الشعر قصير.
– نامي عدد ساعات كفاية.