وصفة كرات لحم الديك الرومي اللذيذة
كلنا بندور على وصفات تكون سريعة ومش مكلفة، خصوصا لو عندنا اطفال بنحاول تبقى لذيذة وممتعة بالنسبة لهم، عشان كده جايبين ليكي وصفة النهاردة عالية في قيمتها الغذائية وكمان طعمها يجنن وسريعة في التحضير.. اعرفي معانا وصفة كرات لحم الديك الرومي أو “كفتة الديك الرومي”
وصفة كرات لحم الديك الرومي
المقادير اللي هتحتاجيها:
نصف كوب من العيش المطحون أو البقسماط الناعم
ملعقتان كبار من الجبنة البارميزان المبشورة
2 ملعقة صغيرة توابل إيطالية
1/4 ملعقة صغيرة من مسحوق الثوم
1/2 ملعقة صغيرة من مسحوق البصل
1/4 ملعقة صغيرة فلفل أسود
1/2 ملعقة صغيرة ملح
نص كيلو من لحم الديك الرومي المفروم
1 بيضة كبيرة
طريقة التحضير:
سخني الفرن إلى درجة حرارة 180 تقريباً، وفي طبق صغير اخلطي فتات الخبز أوالبقسماط المطحون مع الجبنة البارميزان والتوابل الإيطالية ومسحوق الثوم ومسحوق البصل والملح والفلفل.
ضيفي لحم الديك الرومي المفروم في طبق تاني كبيروضيفي عليه خليط البقسماط وضيفي البيض، اخلطي كل المكونات سوا لحد ما يمتزجوا كويس ويبقوا شبه العجينة الخشنة.
قسمي خليط اللحمة لـ16 كورة وحطيهم على صينية مفروشة بورق الزبدة، ودخليها الفرن حوالي 20 دقيقة أو لحد ما تستوي، بعد كده في طاسة سخنة على النار فيها مكعبين زبدة سايحين وشوية زيت، حطي الكفتة اللي عملناها وخليها تتحمر لحد ما يبقى لونها بني.
قدميها مع الرز الأبيض والسلطة وبالهنا والشفا.