ازاي تعيدي بناء الكولاجين في بشرتك ب 5 خطوات

ريهام محمود
ريهام محمود
في
بشرة
479

الكولاجين هو البروتين اللي بيحافظ على بشرتك شابة وممتلئة ومشدودة ، ولكن لسوء الحظ ، مع تقدمك في العمر ، انتاج الكولاجين بيبدأ يقل ، وده بيأدي لترهل الجلد وظهور التجاعيد وعلامات الشيخوخة ، والنهاردة من خلال مقالنا طرق اعادة بناء الكولاجين في البشرة من خلال 5 خطوات.

طرق اعادة بناء الكولاجين:

اسباب انخفاض الكولاجين:

الطبيعي انه مع التقدم في السن جسمك بينتج كمية اقل من الكولاجين ، ولكن في عوامل تانية بتخلي الكولاجين اضعف ، زي التعرض لاشعة الشمس, التلوث, التدخين.

لكن ايه الفرق بين الكولاجين والايلاستين؟ الكولاجين هو المسؤول عن اعطاء بشرتك بنيتها وقوتها ، والايلاستين بيوفر المرونة ، بمعنى ان الكولاجين يعتبر زي اطار البشرة والايلاستن يشبه الاربطة المطاطية اللي بتربط كل حاجة مع بعض.

طرق اعادة بناء الكولاجين
طرق اعادة بناء الكولاجين

تغييرات في اسلوب الحياة لتعزيز انتاج الكولاجين:

– الاكل الصحي لبشرة افضل:

صدقي او لا ، ولكن النظام الغذائي ممكن يكون ليه تأثير كبير على انتاج الكولاجين ، الاطعمة اللي بتحتوي على فيتامين سي زي الفواكة الحمضية والخضروات الورقية ، ممكن انها تساعد في تحفيز انتاج الكولاجين ، وماتنسيش البروتين ، الكولاجين بيتكون من الاحماض الامينية ، عشان كده مهم تضمين الاطعمة الغنية بالبروتين زي الفراخ, الاسماك, الفاصوليا في نظامك الغذائي.

وللاسف ان الاطعمة السكرية والاطعمة المصنعة اللي ممكن تكوني بتاكلي منها كتير او بتحبيها ، بتضر بالفعل انتاج الكولاجين ، السكر ممكن انه يلتصق بألياف الكولاجين الموجودة في جلدك ، وده بيخليها قاسية وهشة ، وبالتالي لو عايزة تحافظي على بشرتك في افضل حالاتها ، يبقى جيه الوقت انك تودعي اكل الكوكيز والشيبسي.

– الحركة:

التمارين الرياضية مش بس مفيدة للقلب والرئتين ، ولكن ممكن تساعد كمان على تعزيز انتاج الكولاجين ، عند ممارسة الرياضة جسمك بينتج هرمون النمو ، وده بيساعد على تحفيز انتاج الكولاجين ، بالاضافة ان التمارين الرياضية بتساعد على تحسين الدورة الدموية وده بدوره بيساعد على توصيل العناصر الغذائية اللي بشرتك محتاجاها لانتاج الكولاجين ، عشان كده بننصحك بممارسة الرياضة او المشي وبشرتك هتشكرك.

– خدي مكملات غذائية:

لو مش بتاخدي كمية كافية من الكولاجين من نظامك الغذائي ، خدي مكملات غذائية ، هتلاقي متوفر مكملات الكولاجين على شكل اقراص او بودر وكمان سائل.

طرق اعادة بناء الكولاجين 2

الاجراءات التجميلية لاعادة بناء الكولاجين:

– الوخز بالابر الدقيقة:

هو يعتبر اجراء غير جراحي بيعتمد على استخدام جهاز صغير محمول بابر صغيرة لعمل ثقوب صغيرة في الجلد ، العملية دي بتساعد على تحفيز استجابة الجسم الطبيعية للشفاء وتشجيع انتاج الكولاجين ، بالاضافة انه بيساعد على علاج مشاكل الجلد التانية زي الندبات وفرط التصبغ.

– الليزر:

الليزر كمان من العلاجات المستخدمة لتجديد الكولاجين ، تقنية الليزر ممكن انها تتغلغل بعمق في الجلد لتحفيز انتاج الكولاجين وتحسين نسيج الجلد ، وحسب العلاج ممكن تحتاجي لاكتر من جلسة عشان تشوفي نتيجة ملحوظة.

– العمليات الجراحية:

للاشخاص اللي عايزين حلول جذرية واسرع ، العمليات الجراحية هتكون انسب اختيار ليهم ، بعض العمليات بتشمل شد الوجه والحاجب ، والاجراءات دي بتتضمن ازالة الجلد الزائد وشد الانسجة الاساسية ، ولكن حطي في اعتبارك ان العمليات دي ليها بعض المخاطر.

طرق اعادة بناء الكولاجين 3

العلاجات الطبيعية لاعادة بناء الكولاجين:

زي ما في علاجات طبية كمان في علاجات طبيعية ممكن تساعدك على اعادة بناء الكولاجين ، ماسكات تعزيز الكولاجين تعتبر اختيار رائع ، ومن المكونات الشائعة العسل والافوكادو وبياض البيض ، كل اللي هتعمليه امزجيهم مع بعض ، ووزعي الخليط على بشرتك.

كمان الزيوت الاساسية ثبت انها بتساعد على تعزيز انتاج الكولاجين ، زي زيت ثمر الورد, وزيت اللبان ، كل اللي هتعمليه اخلطي كام نقطة من كل زيت مع زيت تاني ناقل (زي زيت الزيتون, زيت جوز الهند, زيت الجوجوبا) ودلكي بشرتك بالخليط.

طرق اعادة بناء الكولاجين 4

الحفاظ على انتاج الكولاجين:

– الالتزام هو المفتاح:

الالتزام مهم جدا للحفاظ على انتاج الكولاجين ، ضروري الالتزام بنظام غذائي صحي, وممارسة الرياضة بانتظام, واتباع روتين ثابت للعناية بالبشرة ، ما توقفيش او تكسلي لمجرد انك وصلتي لهدفك ، دي حاجات لازم تمشي عليها على طول عشان تحافظي على بشرتك صحية.

– منتجات العناية بالبشرة للحفاظ على الكولاجين:

استخدام منتجات العناية بالبشرة المناسبة ممكن انها تساعد في الحفاظ على مستويات الكولاجين في بشرتك ، دوري على المنتجات اللي بتحتوي على مكونات زي فيتامين سي, الريتينول, الببتيدات, المعروفة بتعزيز انتاج الكولاجين ، وماتنسيش حماية بشرتك من اضرار اشعة الشمس باستخدام واقي من الشمس.

– كام مرة المفروض تعملي اجراءات تجميلية للحفاظ على انتاج الكولاجين؟

معظم الاجراءات غير الجراحية ممكن تعمليها مرة واحدة في السنة ، اما العمليات الجراحية بتحتاج فترة تعافي اطول وزيارات اقل لدكتور الامراض الجلدية.

طرق اعادة بناء الكولاجين 5

مقالات متعلقه

كريم الارز الكوري الطبيعي للتخلص من التجاعيد وتفتيح البشرة

كريم الارز الكوري الطبيعي للتخلص من التجاعيد وتفتيح البشرة

مشروب الكولاجين الطبيعي لجمال البشرة والشعر والاظافر

مشروب الكولاجين الطبيعي لجمال البشرة والشعر والاظافر

فوايد الشبة الجمالية للبشرة

فوايد الشبة الجمالية للبشرة