11 نصيحة لتحديد حواجبك بنفسك في البيت زي المحترفين

ريهام محمود
ريهام محمود
في
مكياج
381

الحواجب هي واحدة من السمات الاساسية للوجه ، وممكن نقول كمان انها اهم حاجة في الوش كله ، لانه لو اهتميتي بيها كويس ، هتبرز كل ملامح وشك وهتظهر جمالك الطبيعي ، وفي كتير من المتخصصين حاليا اللي ممكن يساعدوكي في تحديدها بشكل متوازن ومناسب لشكل وشك ، ولكن ممكن تكون التكلفة عالية بالاضافة ان ممكن مايكونش عندك وقت ، عشان كده النهاردة هنقولك مجموعة نصايح لتحديد الحواجب تعمليها بنفسك في البيت وهيطلعوا معاكي زي المحترفين.

نصايح لتحديد الحواجب:

1- اعرفي هيكل الحواجب:

من اكتر الغلطات اللي ممكن نقع فيها اثناء تحديد الحواجب ، هو اننا مش بنكون عارفين المفروض تبدأ منين ، وقوس الحواجب المفروض يبقى فين ، ونهاية الحاجب فين ، وبالتالي مهم جدا قبل ما تبدأي في تحديد او رسم حواجبك ، تعرفي اجزاء الحاجب كويس:

– الزاوية الداخلية.

– القوس او قمة الحاجب.

– النهاية.

نصايح لتحديد الحواجب
نصايح لتحديد الحواجب

2- التعرف على انوع الحواجب المختلفة:

في حين ان الحواجب بتختلف من شخص للتاني في اللون والشكل ما بين الحواجب الحادة, الناعمة, المستقيمة, المستديرة ، وبالتالي طريقة التحديد بتختلف حسب شكل الحاجب ، عشان كده لازم تعرفي الاشكال المختلفة وتعرفي حواجبك اي واحد فيهم عشان تقدري تحدديه بسهولة بشكل صح ، او ازالة الشعر الزائد او رسمهم اذا لزم الامر لتحقيق التوازن بينهم.

نصايح لتحديد الحواجب 2

3- الحواجب متشابهة ولكن مش متطابقة:

مهم جدا اننا نعرف ان الحاجبين بيكونوا مش متطابقين ، بينهم اختلاف بسيط ، وبالتالي بغض النظر عن محاولاتك فاحتمال انك مش هتقدري تخليهم متساويين تماما ، وده بيحصل لان كل حاجب بيكون ليه حركات عضلية مختلفة ناتجة عن جانب الوجه اللي بننام عليه اكتر او التعبيرات اللي بنعملها بوشنا.

نصايح لتحديد الحواجب 3

4- اعرفي شكل وشك:

لتحديد شكل وشك ، حطي في اعتبارك 3 معايير ، ايه الجزء الاوسع من وشك (الجبهة, الخدين, او الفك) ، ايه شكل خط الفك (مستدير, مربع, مدبب) ، واخيرا ، ايه الطول الاجمالي لوشك (قصير او طويل) ، والخبراء بينصحوا انك تقيسي كل جزء من وشك لتحديد شكل وجهك.

نصايح لتحديد الحواجب 4

5- تحديد شكل الحاجب المناسب لشكل وشك:

كل شكل وش ليه شكل الحواجب اللي يناسبه عشان كده مهم انك تعرفي شكل الحواجب المناسب لشكل وشك.

– الوجه المستدير: بيكون فيه الطول والعرض متساويين الى حد ما ، وبالتالي افضل شكل حواجب مناسب ليكي هيكون الحاجب اللي بزاوبة حادة ، القوس العالي هيضيف هيكل وحجم لوشك ، وده هيديه طول شوية.

– الوجه البيضاوي: بيكون فيه شكل الوش متوازن جدا ، ومع الوش ده انتي مش محتاجة تلعبي كتير في شكل الحواجب ، كل اللي هتعمليه انك هتمشي ورا شكل حواجبك الطبيعية ، مع الحفاظ على الاقواس خفيفة و “زوايا ناعمة” على نفس المستوى.

نصايح لتحديد الحواجب 5

– الوجه المستطيل: النوع ده يكون طويل الى حد ما والفك شكله متحدد ، ومن الناحية المثالية اختاري شكل الحواجب “الممتليء وغير المنظم” اللي هيساعد على “تقليل حجم جبهتك” و “الاقواس الناعمة المنحنية بشكل بسيط” بتساعد على تنعيم خط الفك.

– الوجه على شكل قلب: الوجه ده بيكون اوسع عند منطقة الجبهة ، واضيق عند الخدين ، ومدبب عند الدقن ، ولتحقيق التوازن ، اختاري حواجب “بقوس ناعم ومستدير”.

– الوجه المربع: الوجه ده يكون كل اجزاءة متساوية في الحجم الى حد ما ، وللمساعدة في تنعيم الفك “ارفعي الحاجبين بأقواس ناعمة” واديهم لمسة نهائية “غير محددة” بشكل عام ، واتجنبي بأي شكل الحواجب “الحادة” ، والزوايا القائمة.

نصايح لتحديد الحواجب 5 1

6- امشي مع شكل الحاجب الطبيعي:

في فترة من الفترات انتشر موضة الحواجب الرفيعة الخفيفة ، وده كان مجرد اتجاه وانتهى ومابقاش موضة دلوقتي ، والنصيحة الصح لما تيجي تحددي حواجبك هي انك تمشي مع شكلهم الطبيعي ، مجرد بس انك تملي الفراغات وتثبتيها.

– الحواجب الكثيفة: عملية جدا لانها مش بتحتاج عناية كتير ، هيكون كفاية اوي تسرحيهم بمشط او فرشة الحواجب, وتثبتيهم.

– الحواجب الرفيعة: بتحتاج عناية اكتر ، لان في حالة الحواجب الرفيعة او الخفيفة لو في اي شعراية مش في مكانها او زيادة محتاجة تشيليها ، فهي بتبان وبتتشاف بسهولة.

نصايح لتحديد الحواجب 6

7- خلي شعيرات حواجبك تنمو بشكل طبيعي قبل تشكيلها:

غالبا مع الاشخاص ممكن يمشوا على اي حاجة مش طبيعية لمجرد انها موضة ، عشان كده لو انتي في فترة من الفترات قصيتي شعر حواجبك اكتر من اللازم ، الافضل تسيبي الحواجب تنمو بشكل طبيعي قبل تشكيلها.

نصايح لتحديد الحواجب 7

8- استخدمي الادوات الصح لتحديدهم:

لما تيجي تحددي حواجبك ، ضروري يكون عندك الادوات اللازمة اللي المفروض تستخدميها ، وممكن الادوات دي تختلف على حسب اللي انتي عايزة تعمليه في حواجبك ، ولكن دي الحاجات الاساسية اللي هتحتاجي لها:

– ضوء طبيعي.

– مراية من غير تكبير.

– جسم مسطح يبقى زي المسطرة تكفي للوصول من طرف الانف للحاجب ، ممكن تستخدمي قلم رصاص.

– قلم حواجب.

– ملقاط لنتف الحواجب.

– فرشة حواجب او فرشة ماسكارا نضيفة.

– مقص خاص بالحواجب.

نصايح لتحديد الحواجب 8

9- اتعرفي على خريطة الحواجب:

رسم الحواجب هو تقنية تشكيل بتستخدمي فيها ابعاد الوش للمساعدة في تحقيق التناسق ، وبالتالي مهم انك تحددي ال 3 اجزاء الرئيسية اللي قولناهم في اول المقالة (الزاوية الداخلية, القوس, النهاية).

– اول حاجة امسكي جسم مسطح زي ما قولنا ممكن تستخدمي قلم ، بزاوية جنب جناح الانف ، قريب من بداية الزاوية الداخلية ، اعملي ده للحاجبين وحطي علامة بقلم الحواجب على النقطة دي.

– استخدمي نفس الجسم المسطح وحطيه بزاوية على جناح الانف لحد قوس الحاجب اعلى مكان في حاجبك ، اعملي ده للحاجبين وحطي علامة عند النقطة دي.

– استخدمي نفس الجسم المسطح وحطيه بزاية على جناح الانف لحد نهاية العين ، اعملي ده للحاجبين وحطي علامة عند النقطة دي.

– اخر حاجة وصلي كل النقط المتحددة بخطوط ، حسب شكل الحاجب.

نصايح لتحديد الحواجب 9

10- انتفي الحواجب في الاتجاه الصح:

كل الشعيرات الموجودة في اجسامنا مرتبطة بالاوعية الدموية اللي بتحافظ على صحتها وتسمح لها بالنمو مرة تانية ، ولو انكسر الوعاء ده ، الشعر مش هينمو مرة تانية ابدا.

وعشان تعملي ده بشكل صح ، شدي الجلد بصوابعك وانتفيه في اتجاه نمو الشعر ، بشكل عام الاتجاه يكون لبره في اتجاه منابت الشعر.

نصايح لتحديد الحواجب 10

11- ماتنسيش ابدا لون الحاجب مهم جدا:

– لو شعرك غامق وكثيف يبقى الحواجب كمان يبقى ليها نفس الشكل واقرب لون لشعرك.

نصايح لتحديد الحواجب 11

– الهدف ان مايكونش لون الحاجب زي لون الشعر بالظبط او مطابق ليه ، ولكن اقرب وانسب لون ليه ، لان لو حواجبك شقرا او غامقة اوي وملتيهم بنفس اللون بالظبط هتبان كأنها مصبوغة ومرسومة ، ولكن مش ممتلئة ، لون الحاجب المفروض يخلق “كثافة او عمق اكبر” ولكن مايغيرش لونه.

– لون البشرة بيساعد في تحديد مدى تكامل الالوان الدافية او الباردة مع حواجبك ، على سبيل المثال ، لو بشرتك مايلة للاصفر ، اختاري لون دافي عشان الحواجب ماتطلعش رمادية او باهتة ، والاستثناء الوحيد للقاعدة دي هما اصحاب الشعر الاحمر.

نصايح لتحديد الحواجب 11 1

مقالات متعلقه

افكار مكياج بوهو مناسب للصيف

افكار مكياج بوهو مناسب للصيف

طريقة عمل زيت ملمع للجسم Shimmer Body Oil

طريقة عمل زيت ملمع للجسم Shimmer Body Oil

احصلي على تفتيح فوري ونضارة للبشرة بكريم البنجر

احصلي على تفتيح فوري ونضارة للبشرة بكريم البنجر