كيكة شوكولاتة سهلة وسريعة بمكونين اتنين بس
لكل عشاق الشوكولاتة ، هنشارك معاكم النهاردة اسهل واسرع كيكة شوكولاتة ممكن تعمليها ، وبمكونين اتنين بس ، تابعي معانا السطور الجاية واعرفي الطريقة بالخطوات.
كيكة شوكولاتة بمكونين بس:
الكمية دي تكفي 8 افرد.
المكونات:
– 255 جرام شوكليت شيبس.
– 4 بيضات كبار.
– سكر بودرة, للتزيين.
– ايس كريم فانيليا. للتزيين.
– فاكهة الموسم, للتزيين.
طريقة التحضير:
1- سخني الفرن على درجة حرارة 170 درجة مئوية ، وجهزي الصينية اللي هتحطي فيها الكيكة ادهنيها بالزبدة وبطنيها بورق خبز او ورق زبدة.
2- حطي الشوكليت شيبس في طبق ودخليها الميكروويف لحد ما الشوكولاتة تسيح تماما ، حوالي دقيقة ، ولو مش متوفر ميكروويف ممكن تسيحيها على حمام ماية سخنة.
3- افصلي الصفار عن البياض ، وبالمضرب الكهربائي اضربي البياض لحد ما يبقى كريمي.
4- ضيفي صفار البيضة للشوكولاتة السايحة واحدة واحدة بالتدريج وقلبي لحد ما يمتزجوا مع بعض كويس.
5- باستخدام معلقة مطاطية ، ضيفي لخليط الشوكولاتة وصفار البيض 1/3 كمية بياض البيض في كل مرة وقلبي لحد ما تخلصي الكمية كلها.
6- صبي خليط الكيكة في الصينية وساوي الوش بتاعها ، ودخليها الفرن لمدة 30 دقيقة.
7- طلعي الكيكة من الفرن ، وسيبيها تبرد شوية ، وبعدها انقليها على طبق التقديم ، قطعيها ورشي فوقيها السكر البودرة وممكن تكتفي بكده بس ، او تزينيها بالايس كريم والفاكهة كمان.
