تأثير الضوء الازرق اللي بيخرج من شاشة الموبايل على بشرتك ، وازاي تتفادي اضراره
كلنا بنقضي ساعات طويلة قدام شاشة الموبايل ، او حتى اللاب توب والتليفزيون ، سواء للتسلية او للشغل ، ولكن اللي انتي ممكن تكوني ماتعرفيهوش ان الضوء الازرق اللي بيخرج من الشاشة ليه اضرار على البشرة ، ومش بس الشاشات كمان انواع معينة من اللمبات ، والنهاردة من خلال موضوعنا هنتعرف على الآثار الضارة للضوء الازرق على البشرة ، وازاي تقللي من اضراره على بشرتك.
الآثار الضارة للضوء الازرق على البشرة:
الدراسات المختلفة اظهرت ان الضوء الازرق اللي بيخرج من الشاشات ، وبعض انواع المصابيح الكهربائية اللي بيخرج منها ضوء ازرق زي الليد والفلورسنت اللي اضاءتها بيضا ، بتساهم في التسبب في تصبغ البشرة عند الاشخاص المعرضين لده بسهولة.
الضوء الازرق ممكن يأدي لتلف الجلد بطرق كتير ، منها التصبغ, البقع الغامقة, اضرار الجذور الحرة اللي بتسبب التجاعيد.
بالاضافة ان الضوء الازرق ده بيأثر على ايقاعك اليومي الطبيعي ومستويات الميلاتونين ، وده هيأدي لاضطراب دورة النوم وزيادة التوتر ، وللعلم ان القعدة 4 ايام قدام اللاب توب بيعادل الوقوف في الشمس بعد الضهر لمدة 20 دقيقة ، وده بيوضح مدى الضرر اللي بيسببه التعرض للضوء الازرق على بشرتك.
طريقة حماية البشرة من الضوء الازرق:
افضل حاجة ممكن تعمليها اكيد هو التقليل من التعرض للضوء الازرق ، ووضع واقي من الشمس يحميكي منه.
وبالنسبة للتصبغ اللي بيحصل للبشرة من التعرض للضوء الازرق ، استخدمي له نفس منتجات اللي بتستخدميها عادة لعلاج التصبغ وتحسين صحة البشرة.
ايه المكونات اللي ممكن تحميكي من اضرار الضوء الازرق:
للمساعدة في السيطرة على اضرار الضوء الازرق والاجهاد التأكسدي اللي بيحصل للبشرة بسببه ، استخدمي منتج غني بمضادات الاكسدة ، ومن المكونات اللي المفروض تدوري عليها في اي منتح هي فيتامين سي, الايديبينون, الريتينول, النياسيناميد على شكل مضادات الاكسدة ، والاحماض زي حمض الهيالورونيك, اللاكتيك وغيرها من المكونات اللي بتساعد على تفتيح التصبغات.
بالاضافة لده زودي من تناول المكملات الغذائية زي مضادات الاكسدة والكولاجين ، بالاضافة للاستخدام المنتظم للكريمات والعلاجات اللي بتساعد على زيادة الكولاجين للحفاظ على صحة الجلد وابطاء عملية الشيخوخة قدر الامكان ، ولو في تصبغ قوي في البشرة ، ممكن تختاري الليزر او التقشير عند دكتور جلدية ويقولك الاختيار الافضل لبشرتك.
نصايح لتقليل اضرار الضوء الازرق:
– حاولي بقدر الامكان تقللي التعرض للضوء الازرق.
– استخدمي واقي من الشمس اثناء تعرضك للضوء الازرق.
– استخدمي فلتر او غيري في الاعدادات لتقليل الضوء الازرق (ودلوقتي في الموبايلات الحديثة موجود الاختيار ده).
– اختاري استخدام سماعة راس ، ويفضل تكون سماعة سلكية للمكالمات.
– اتجنبي استخدام اللمبات اللي ضوئها قوي وبيخرج منها ضوء ابيض زي الليد والفلورسنت في البيت.
– حافظي على مسافة آمنه من التليفزيون والكمبيوتر اثناء القعدة قدامه ، المسافة الآمنه بينك وبين اللاب تكون حوالي 50 – 60 سم او اكتر ، اما التليفزيون بيختلف حسب حجم الشاشة لو التليفزيون بشاشة 40 بوصة يبقى المسافة الآمنه حوالي 1.6 متر ، وكل ما زادت حجم الشاشة زودي المسافة الآمنه.