الترتيب الصح لمنتجات العناية بالبشرة
لما الموضوع يتعلق بوضع طبقات منتجات العناية بالبشرة ، في قواعد عامة لازم تمشي عليها ، بتتعلق بوقت الانتظار بين المنتجات ومستويات الاس الهيدروجيني ، ومن المفيد والفعال اننا ناخد في الاعتبار القواعد الاساسية عشان المنتجات تدينا النتيجة المطلوبة ، والنهاردة من خلال موضوعنا هنشارك معاكم ترتيب منتجات العناية البشرة ، والقواعد الاساسية لوضع طبقات منتجات العناية بالبشرة.
اهمية وضع منتجات العناية بالبشرة بالترتيب الصح:
السبب الاكتر اهمية لوضع المنتجات بالترتيب الصح هي ان الطبقة الخارجية من الجلد (الطبقة القرنية) متصممة بشكل مثالي لابعاد اي حاجة عنها ، وهي واحدة من اهم ادوارها ، لانها تعتبر الدرع الواقي اللي بتحمي البشرة من السموم والعوامل الخارجية.
والحقيقة ان اكبر مشكلة بتواجه شركات مستحضرات التجميل ، هي انهم يوصلوا لوسيلة فعالة لتوصيل المواد الفعالة لعمق البشرة ، والبحث عن طرق افضل لزيادة معدل امتصاص الجلد للمنتجات.
ولو انتي بتحطي طبقات من المنتجات بشكل عشوائي او مش صح ، مش هتحصلي على الفايدة الكاملة منها ، لان ممكن الجلد مايمتصوش كويس ، او تحطي عليه منتج تاني يعطل مفعوله ، وفي النهاية مش هتستفادي من المنتج ، ويمكن كمان تسبب مشاكل جلدية زي الاحمرار, الجفاف, الحساسية.
وفي علامة ممكن تقولك انك بتحطي طبقات المنتجات بشكل غلط ، وهي انك لما تفركي المنتجات على بشرتك ، هتبدأ في التكتل وتتحول “لفتات” ، او هتحسي بملمس غريب على بشرتك زي اللزوجة.
والحقيقة انه مستحيل وضع تسلسل يناسب الكل بنسبة 100% ، لانه بالرغم ان في ملايين المنتجات اللي بتندرج تحت اسم “المرطب” على سبيل المثال ، الا انه مش كلها بتحتوي على نفس المكونات ، ومش بيتم صياغتها كلها بنفس الطريقة ، بالاضافة ان كتير من المنتجات بتبقى ليها اكتر من وظيفة وده بيزود تعقيد الموضوع ، في النهاية الموضوع بيعتمد على استجابة بشرتك للمنتجات ، انتي محتاجة انك تجربي وتكتشفي بشرتك اكتر وتعرفي ايه اللي يناسبها بشكل افضل.
ترتيب منتجات العناية بالبشرة:
– العناية المنخفضة:
الغسول – التونر والميست – المرطب (كريم او زيت) – واقي الشمس.
– يوم سبا منخفض العناية:
الغسول – المقشر – البخار – الماسك – التونر والميست – المرطب (كريم او زيت) – واقي الشمس.
– العناية العالية:
الغسول – التونر والميست – علاج البقع – السيروم – كريم العين – المرطب (كريم / لوشون) – الزيوت – واقي الشمس – المكياج (لو هتستخدميه).
– يوم سبا عالي العناية:
الغسول – المقشر – البخار – الماسك – التونر والميست – علاج البقع – السيروم – كريم العين – المرطب (كريم / لوشن) – الزيوت – واقي الشمس – المكياج.
– عناية اعلى (الستايل الكوري في العناية البشرة):
الغسول الاول (على اساس زيتي) – الغسول التاني (مائي او رغوي) – التونر والميست – علاج البقع – السيروم ( اللي على اساس مائي الاول وبعده اللي على اساس زيتي) – كريم العين – المرطب (كريم / لوشن) – الزيوت – واقي الشمس – المكياج.
– يوم سبا عناية اعلى:
الغسول الاول (على اساس زيتي) – الغسول التاني (على اساس مائي او رغوي) – المقشر – البخار – الماسك – التونر والميست – علاج البقع – السيروم (اللي على اساس مائي الاول وبعده اللي على اساس زيتي) – كريم العين – المرطب (كريم / لوشن) – الزيوت – واقي الشمس – المكياج.
الارشادات العامة لوضع طبقات المنتجات:
بشكل عام ، حطي الاول المنتجات اللي على اساس مائي واخر حاجة المنتجات اللي على اساس زيتي ، وده لان لو على بشرتك طبقة دهنية ممكن تتداخل مع امتصاص وفعالية المنتجات اللي اساسها مائي ، وبالتالي مش هيتم امتصاصها بسبب الزيوت اللي على البشرة.
كمان لكل فئة من المنتجات اللي على اساس مائي وزيتي ، المفروض تحطيها من الارق او الاخف للاكتر سمك ، ولو اي منتج مكتوب عليه انه داخل في مكوناته زيت ، الافضل انك تحطيه في فئة الزيوت على طول يعني يتحط في الاخر.
طريقة وضع منتجات العناية بالبشرة النشطة – غير المتوافقة:
لو انتي بتستخدمي منتجات زي فيتامين سي, الريتينول, البيبتيدات, اي نوع من احماض البشرة, نياسيناميد, ريسفيراترول ، فانتي محتاجة تتأكدي انك مش بتحطيهم مع بعض بشكل غلط ، لان ممكن يشتغلوا ضد بعض او يلغوا مفعول بعض.
المشكلة الرئيسية مع المنتجات النشطة هي بيئة الرقم الهيدروجيني ، العناصر النشطة المختلفة بتشتغل بشكل افضل عند مستويات مختلفة من الاس الهيدروجيني ، مثلا لو حطيتي منتج بيشتغل بشكل افضل مع مستوى حمضي ، وبعدها حطيتي طبقة تانية فوقيه بيشتغل على مستوى حيادي او قلوي ، انتي كده هتلغي العناصر النشطة في المنتجين ومش هتستفادي بأي واحد منهم.
عشان كده هنقولك اكتر العناصر النشطة للبشرة الشائع استخدامها ، وازاي تستخدميهم مع بعض لتحقيق اقصى استفادة ممكنة.
عناصر نشطة ماتخلطيهاش مع بعض:
الريتينول/الريتينويدات + احماض الفاهيدروكسي (او اي حمض مباشر) ، كل المنتجات دي بتساعد على زيادة دوران الخلايا ، وجمعها مع بعض ممكن يأدي في النهاية لتهيج البشرة والتسبب في حساسيتها ، لو عايزة تستخدمي الاتنين مع بعض يبقى استخدمي الريتينول بالليل والاحماض الصبح ، لكن ما يتحطوش طبقات فوق بعض.
– الريتينول/الريتينويدات + فيتامين سي ، بتشتغل بشكل افضل عند مستويات مختلفة من الاس الهيدروجيني ، وبالتالي الجمع بينهم هيعطل فعالية الاتنين ، وممكن يسبب تهيج البشرة ، عشان تستخدميهم الاتنين استخدمي فيتامين سي الصبح (هيساعد في الحماية من اشعة الشمس فوق البنفسجية) ، واستخدمي الريتينول بالليل (لعلاج الجلد التالف).
– فيتامين سي/الاحماض المباشرة + ببتيدات النحاس ، النحاس بيساعد على تسريع اكسدة فيتامين سي ولكن الفيتامين سي بيفسد عمل ببتيدات النحاس ، عشان تستخدميهم الاتنين مع بعض استخدمي فيتامين سي الصبح وببتيدات النحاس بالليل.
– النياسيناميد + الاحماض المباشرة/فيتامين سي ، الاحماض وفيتامين سي بتشتغل بشكل اكتر فعالية في بيئة حمضية ، والنياسيناميد بيحتوي على نسبة حموضة ما بين 5.00 – 7.00 ، وبالتالي الاتنين بيلغوا بعض ، والجلد مش هيمتص الاحماض كويس وهيفسد النياسيناميد ويسبب احمرار الجلد ، عشان تستخدميهم الاتنين ، استخدمي النياسيناميد الصبح والاحماض وفيتامين سي بالليل.
– الاحماض + والاحماض الاخرى ، طبعا دي مبالغة واضحة ، حتى لو كان واحد من الاحماض لطيف ، اضافة حمض تاني فوقيه هيأدي لحساسية الجلد ، وتهيج والتهاب صريح ، افضل حاجة انك تبدلي بين الاحماض ، واحد في يوم والتاني في اليوم اللي بعده.
– حمض الهيالورونيك + الاحماض المباشرة ، حمض الهيالورونيك ممكن يفسد مستويات الاس الهيدروجيني لاقل من 4 ، وبالتالي الافضل استخدامهم بشكل منفصل ، استخدمي حمض الهيالورونيك الصيح والاحماض المباشرة بالليل.
الملاحظات النهائية لاستخدام المنتجات:
– تقدري تستخدمي حمض الهيالورونيك مع عناصر البشرة المحايدة والقلوية زي النياسيناميد, الببتيدات, الريتينول ، والحقيقة انه هيكون مثالي جدا انك تستخدمي الهيالورونيك مع الريتينول لتهدئة التأثير المهيج اللي بتسببه الريتينويدات على الجلد.
– تقدري تستخدمي معظم العناصر النشطة الصبح او بالليل ، ده بيعتمد على مدى تفاعل كل بشرة ، لو انتي عايزة تستخدمي اكتر من عنصر نشط ومش متوافقين زي ما قولنا فوق ، يبقى الافضل تستخدمي واحد الصبح والتاني بالليل.
– ولكن مع ذلك الافضل انك تستخدمي الريتينويدات والاحماض بالليل ، وده لان كلها بتسبب حساسية مؤقتة للجلد ، الاحماض لانها “كيميائية” مقشرة للجلد ، والريتينويدات بتحفز تقشير الجلد وتجديده ، وتعريض البشرة وهي في الحالة دي لاشعة الشمس فوق البنفسجية هيأدي لتلف البشرة.
نصايح عند استخدام المنتجات:
لو مشيتي على كل القواعد اللي قولناها في استخدام المنتجات وحسيتي ان في حاجة مش فعالة ، ممكن تجربي شوية حاجات.
– بصي على المكونات على منتجاتك ، بصي على المكونات الاساسية واتأكدي انك بتستخدميها في ترتيبها الصح ، حاولي تقيميها تاني ، وتحاولي مرة تانية.
– قيمي عدد خطوات روتينك ، شوفي هل انتي فعلا محتاجة لسيروم؟ هل فعلا محتاجة لمرطب وزيت؟ استخدمي منتجات على قد احتياجات بشرتك بس ، لانه كل ما زادت عدد المنتجات ، هيزيد فرص عدم توافق المنتجات.
– حاولي تلاقي بدائل للمنتج بمكونات مختلفة ، زي ما قولنا هتلاقي من نفس المنتج صيغ ومكونات مختلفة ، فلو حاسه ان اي منتج اوعنصر غريب على الجلد زي مثلا ببتيد النحاس استبدليه بحاجة تانية وشوفي لو هتشتغل على بشرتك بشكل افضل.
– استخدمي كمية اقل من المنتجات ، دايما بنفتكر ان كل ما زودنا الكمية من المنتج ده هيدينا نتيجة افضل ، ولكن الحقيقة العكس تماما هو الصح ، لو حسيتي ان بشرتك ظهر فيها حبوب او ملمسها غريب او حسيتي بأي احساس غريب على بشرتك ، حاولي بس تحطي كمية اقل من المنتج.
