سحر البصل في علاج تساقط الشعر
اول حاجة هتيجي في بالك لما نقول بصل ، هو استخدامه في الاكل ، ولكن النهاردة هنتكلم عن جانب تاني للبصل وفوايده الجمالية للشعر ، تعالوا نعرف مع بعض في السطور الجايه فوايد البصل للشعر ، وازاي تستخدميه لعلاج تساقط الشعر.
فوايد البصل للشعر:
البصل بيحتوي على نسبة عالية من الكبريت ، وعنصر الكبريت هو اللي محتاجه الشعر عشان يفضل قوي وبيلمع وصحي ، شعرنا بيتكون بشكل اساسي من بروتين غني بالكبريت واللي كلنا عارفينه باسم الكيراتين ، وبالتالي لما تستخدمي البصل لشعرك ، فانتي كده بتمدي الشعر بالعناصر اللي هتساعد على تقوية الجذور وتكثيف الشعر ومنع التقصف.
– منع تساقط الشعر:
شعرك بيحتاج للكبريت عشان يفضل قوي وصحي وبيلمع ويمنعه من التقصف ، ومن هنا البصل الغني بالكبريت هيساعدك في تقوية جذور شعرك ومنع تساقطه من خلال دعم واضافة الكمية المطلوبة من الكبريت لشعرك.
– عكس الشيب المبكر:
البصل غني بمضادات الاكسدة “الكاتلاز” ، والمكون ده بيمنع شيب الشعر المبكر.
– منع التهابات فروة الراس والقشرة:
البصل بيحتوي على خصائص مضادة للبكتيريا والميكروبات والفطريات ، وده بيساعد على منع التهاب فروة الراس عن طريق الحفاظ على صحة فروة الراس ، وده بدوره بيمنع قشرة الراس.
طريقة استخدام البصل لمنع تساقط الشعر:
عشان تحصلي على اقصى استفادة من البصل ، قشري البصل وقطعيه واضربيه في الخلاط ، واضغطي عليه على مصفى او في شاشة عشان تخرجي منه عصير البصل ، حطي عصير البصل على فروة راسك ودلكيه كويس لمدة دقايق ، وسيبيه لمدة ساعة تقريبا وبعدها اغسليه بشامبو خفيف.
او كبديل لو مش عايزة تستخدمي البصل بشكل مباشر على الشعر ، ممكن تستخدمي اي نوع شامبو وبلسم بيحتوي على زيت البصل.