5 فوائد مذهلة ممكن يعملها الشاور البارد لبشرتك
اتعودنا دايما ان الشاور البارد ممكن يدينا طاقة ويفوقنا الصبح عشان نستعد ليومنا بنشاط ، ولكن الشاور البارد ليه فوايد جمالية كمان ، الاستحمام بماية باردة او معتدلة هي خدعة تجميل سهلة ممكن يبقى ليها تأثير مش هتصدقيه على بشرتك ، والنهاردة من خلال موضوعنا هنشارك معاكم 5 فوايد للشاور البارد على بشرتك.
فوايد للشاور البارد على بشرتك:
1- هيدي بشرتك نضارة صحية:
الاستحمام بالماية الباردة بيساعد على زيادة الدورة الدموية للبشرة ، وده معناه بشرة صحية اكتر ، والخبر الحلو انك مش محتاجة تقعدي تحت الماية الباردة فترة طويلة عشان تخليها صحية ، والشاور بماية معتدلة او حتى فاترة هيكون كافي لتغذية بشرتك.
2- بيمنع شيخوخة الجلد:
الشاور بالماية الباردة يوميا بيساعد انه يحافظ على بشرتك اصغر لفترة اطول ، الماية الباردة بتنشط جهازك العصبي ، والجسم بيطلق الهرمونات والمواد الكيميائية في المخ اللي بتقاوم الاجهاد ، والدراسات اثبتت ان الاجهاد النفسي ليه تأثير مباشر على شيخوخة الجلد وبيأثر بشكل سلبي على اجهزة الجسم بشكل عام.
3- بيمنع الامراض الجلدية المرتبطة بالتوتر:
الدش البارد بيبعت كميات كبيرة جدا من النبضات الكهربائية للدماغ وبيحفز اطلاق “هرمونات السعادة” او الاندرفين ، ولما الجسم بيفرز المواد الكيمائية دي ، بتنخفض مستويات التوتر وهتبقي معرضة بشكل اقل للاصابة بعدد من مشاكل الجلد زي حب الشباب, الصدفية, التهاب الجلد.
4- بيقلل من حجم المسام:
في حين ان الماية السخنة ممكن تزيل بعض الزيوت الطبيعية الواقية للبشرة ، الماية الباردة هتقلل من حجم المسام ، بالاضافة انها هتضيف حيوية للبشرة وهتزود من نضارة واشراقة بشرتك ، لان الماية الباردة ممكن تسبب ضغط الاوعية الدموية ، بالتالي الوش هيبقى اقل انتفاخ او احمرار.
5- بيخفف من اعراض بعض الامراض الجلدية:
في حين ان الاستحمام بالماية السخنة ممكن يأدي لالتهاب الجلد ، وده بدوره بيسبب الاحمرار والحكة وحتى التقشير ، الماية الباردة بتعمل العكس تماما ، بالنسبة للاشخاص اللي بيعانوا من حكة الجلد ، الاستحمام بالماية الباردة هيساعدك في التخلص من احساس الحكة ، والدراسات اثبتت ان تبريد الجلد عن طريق الاستحمام بالماية الباردة بيساعد كمان على تقليل الحكة الشديدة اللي بتسببها الصدفية.
هل بتستخدمي عادة الماية السخنة ولا الباردة؟ وهل لاحظتي تأثيرها على بشرتك؟