طريقة سهلة لعمل Peel off مانيكير
المانيكير من الحاجات اللي بتدي شكل حلو للايد والضوافر ، لكن مشكلتنا معاه بتكون في ازالته ، في مننا بيحب يشيله اول ما نرجع البيت ، وفي اللي بتحب تغير كل يوم بلون مختلف ، عشان كده احنا النهاردة هنسهل عليكي العملية دي كلها ، وهنعمل مع بعض مانيكير Peel off تقدري تشيليه بكل سهولة بس بتقشريه من على الضوافر من غير استخدام مزيل مانيكير ، اللي ممكن كتر استخدامه يسبب ضعف وتكسر الضوافر.
طريقة عمل مانيكير Peel off:
الحاجات اللي هتحتاجيها:
– ازازة مانيكير قديمة.
– مزيل مانيكير.
– 2 معلقة كبيرة غرا ابيض (من المكتبة).
– ايشادو بودر (بأي لون تفضليه).
– 1 معلقة صغيرة صابون اطباق سائل شفاف من غير لون.
– طبق بلاستيك صغير.
– فرشة صغيرة للخلط.
– قمع صغير.
طريقة التحضير:
– الخطوة 1:
اول حاجة نضفي ازازة المانيكير كويس من اي اثار مانيكير قديمة ، حطي في الازازة مزيل مانيكير ورجيها بقوة ، واتخلصي من المزيل وكرري العملية لحد ما الازازة مايبقاش فيها اي اثار مانيكير.
– الخطوة 2:
اتأكدي من تنضيف فرشة المانيكير ، حطي عليها مزيل مانيكير وافركيها بصوابعك كويس لحد ما تتخلصي من اي اثار مانيكير على الفرشة.
– الخطوة 3:
سيبي الازازة والفرشة على جنب لحد ما ينشفوا تماما.
– الخطوة 4:
هاتي طبق بلاستيك صغير حطي فيه 2 معلقة كبيرة غرا ابيض.
– الخطوة 5:
ضيفي للغرا 1 معلقة صغيرة من صابون الاطباق السائل الشفاف.
– الخطوة 6:
هاتي الايشادو باللون اللي تفضليه ، اطحنيه بحيث يبقى بودرة ناعمة من غير اي تكتلات ، بعدها ضيفيه لخليط الغرا والصابون ، وكمية الايشادو حسب درجة اللون اللي انتي عايزاها ، لو عايزاه غامق زودي الكمية ، ولو عايزاه بدرجة فاتحة قللي كمية الايشادو.
– الخطوة 7:
قلبي الخليط كويس جدا لحد ما المكونات كلها تمتزج مع بعض كويس ، واتأكدي من عدم وجود اي كتل كبيرة من الايشادو في الخليط.
– الخطوة 8:
صبي المانيكير في الازازة باستخدام القمع.
– الخطوة 9:
كده المانيكير بتاعنا يبقى جاهز للاستخدام ، تقدري تبتكري وتعملي المانيكير بأي لون ايشادو موجود عندك ، ووقت ما تحبي تشيليه بتقشريه من على الضوافر بكل سهولة ، وتحطي لون تاني.
