طرق مثبتة علميا لزيادة حليب الثدي بسرعة للرضاعة الطبيعية
الرضاعة الطبيعية ممكن تكون صعبة ، خصوصا لو دي المرة الاولى ليكي ، لو انتي قلقانة من ان انتاجك من اللبن مش كفاية ، او حاسه ان طفلك مش بيشبع كفاية ، او وزنه قليل ، ده معناه ان اللبن كميته قليلة ، لكن ماتقلقيش النهاردة هنشارك معاكي طرق لزيادة حليب الثدي بسرعة بطرق طبيعية ، وكلها طرق مثبته علميا.
طرق لزيادة حليب الثدي:
1- التخلص من التوتر:
الحقيقة ان الاجهاد والتوتر بيأدي لانخفاض انتاج الحليب ، لو انتي من الاشخاص اللي بيتوتروا بسهولة ، ففكري في تجربة طرق مختلفة لخفض مستويات التوتر ، سواء بممارسة التأمل ، او تقليل الوقت اللي بتقضيه مع الاشخاص اللي بيسببولك التوتر ، او ممارسة تقنيات التنفس لتهدئتك ، او تكرار التأكيدات الايجابية ، او كتابة اليوميات للتخلص من المشاعر السلبية.
2- زودي عدد مرات الرضاعة:
الجسم بيصنع اللي الطفل بيحتاجه ، لما الطلب بيزيد ، العرض بيزيد ، مع الاطفال حديثي الولادة ، المفروض ترضعيه كل 2 – 3 ساعات على مدار الساعة.
في البداية او في المرات الاولى من الرضاعة ، جسمك مش هينتج لبن كفاية لان معدة طفلك بتكون صغيرة جدا ، ومش بيحتاجوا منك انك تنتجي لبن كتير في البداية ، لكن ده بيزيد بالتدريج مع الوقت.
وحطي في اعتبارك انك ترضعي الطفلك من الثديين اليمين والشمال كذا مره اثناء جلسة الرضاعة ، لان ده بيساعد انه يقول لجسمك ينتج لبن اكتر في كل ثدي.
في كمان حاجة مهمة لازم تعرفيها ان الام بتنتج نوعين مختلفين من اللبن ، مع بداية جلسة الرضاعة الطبيعية ، الطفل هيرضع حليب ارق ولكن مازال بيحتوي على نسبة كويسة من المغذيات ، ولكن كل ما طول في الرضاعة ، هيصلوا للنوع التاني من اللبن اللي بيكون اكتر كثافة وبيحتوي على مغذيات اكتر ، والطفل بيحتاج النوع ده من اللبن في كل رضعة.
وده السبب اللي يخلي انه مهم تكتبي الثدي اللي رضعتي منه اخر مره عشان تبدأي من نفس الثدي المرة اللي بعدها ، عشان الطفل يحصل على لبن من النوع التاني بشكل اكبر.
وماتقلقيش من التوقيت ، بس حاولي انك تبدلي بين الثدي اليمين والشمال كل كام دقيقة لحد ما طفلك يشبع ، وتقدري تعرفي اذا كان طفلك شبع ولا لا ، هتلاقيه فك قبضة ايده ومسترخي اكتر.
3- اعملي ضخ للثدي بعد كل رضعة:
عن طريق الضخ ، انتي بتقولي لجسمك انه محتاج لزيادة اللبن ، ومن الطرق الموفرة للوقت عشان تعملي ده ، انه بعد كل جلسة رضاعة ، ضخي لبن بنفس المقدار من الوقت اللي طفلك رضع فيه.
ممكن تحسي ان كل اللي بتعمليه في يومك هو الضخ والتغذية والضخ والرضاعة ، ولكن ده بيزود من ادرار اللين بشكل فعال ، وتقدري تستخدمي مضخة الثدي من اي ماركة مفضلة عندك.
4- اتأكدي ان طفلك واخد وضعية رضاعة صح:
اتأكدي ان طفلك فاتح الفم باتساع كبير ومستوعب مش بس الحلمة ولكن كمان كل الهالة اللي حوالين الحلمة ، الحلمة لازم تكون جوه فم الطفل بقدر الامكان.
لما تدخلي الحلمة ، لازم لسان الطفل يكون تحتها ووجهي الحلمة ناحية سقف فمه ، وممكن تحسي بالالم لو الحلمة مش داخلة بشكل كافي جوه فم الطفل.
غير التأكد من الجلمة جوه فم طفلك بشكل كافي ، اتأكدي ان شفايف طفلك حوالين الحلمة كلها كويس ، تخيلي انك تعملي وش سمكة بشفايف مقلوبة ولكن الفم مفتوح ، هو ده بالظبط اللي محتاجة طفلك وهو بيمص من الثدي.
5- الماية والشاي:
اثناء الرضاعة الطبيعية ، كمية كبيرة من السوائل بتخرج من جسمك ، هل بتعوضي السوائل دي؟ لازم تشربي كمية كافية من الماية على مدار اليوم عشان تحافظي على رطوبتك ، شرب كمية اكتر من الماية هيضمنلك ان الثديين هيتملوا بالحليب بشكل اسرع.
ومن الطرق السهلة للحفاظ على رطوبة جسمك ، انك تشربي كوباية ماية اول حاجة الصبح لما تقومي من النوم ، كمان اثناء الرضاعة ممكن تحسي بالعطش ، عشان كده احتفظي بالماية اثناء الرضاعة الطبيعية طول اليوم واثناء الرضاعة الليلية ، لانه لو مش بتشربي كمية كافية من الماية ، ممكن تبدأي تحسي بالدوخة اثناء الرضاعة.
كمان الشاي ، اختاري نوع شاي خالي من الكافيين بيحتوي على جلاكتاغوجوس ، وهي نوع اعشاب ممكن تساعد على زيادة حليب الثدي ، وهتلاقي متوفر على امازون انواع شاي لزيادة اللبن Mothers milk tea.
6- دلكي الثدي:
قبل جلسة الرضاعة الطبيعية او حتى اثناء الرضاعة الطبيعية ، دلكي الجزء الخلفي من الثدي ، الجزء الاقرب للقفص الصدري ، ابدأي بالتدليك تحت الابط وحوالين الجزء الخارجي من الثدي للحصول على اللبن الخلفي (النوع التاني من اللبن) زي ما قولنا فوق ، لان النوع ده هو الغني اكتر بالمغذيات اللي محتاجه طفلك اكتر.
7- المسي جلد طفلك:
لمس جلدك لجلد طفلك هيساعد جسمك على انتاج اللبن ، لمس الجلد للجلد بتزود من انتاج اللبن لانها بتحفز انتاج البرولاكتين والاكسيتوسين ، والاتنين بيساعدوا على انتاج وافراز حليب الثدي.
8- التغذية الخاصة بيكي:
لو قلقانة من انك تفقدي وزنك اثناء الرضاعة الطبيعية ، لازم تاكلي بشكل صحيح ، لانه من الناحية الفنية انت بتاكلي لشخصين على الرغم من طفلك خارج جسمك ، لكن مازلتي محتاجة سعرات حرارية كفاية والتغذية المناسبة للعناية بجسمك وزيادة انتاج اللبن لطفلك لنموه بشكل سليم.
الرضاعة الطبيعية ممكن تحرق لحد 500 سعرة حرارية في اليوم على حسب عدد مرات الرضاعة ، ولو مش بتاكلي كويس ، جسمك مش هينتج كمية كافية من الحليب المغذي لطفلك.
بعض الاطعمة اللي ممكن تزود من انتاج حليب الثدي:
– هتلاقي مكملات غذائية في الصيدلية او في السوبر ماركت ، او حتى على امازون لزيادة انتاج اللبن ، زي Lactation cookies with oatmeal and brewer’s yeast ممكن تاكليه كوجبة خفيفة بسيطة تاكليها قبل الرضاعة الطبيعية على طول ، الشوفان والخميرة يعتبروا نوعين من امصال اللبن اللي بتساعد على زيادة انتاج اللبن.
– الشوفان.
– السبارجوس.
– الثوم.
– الزنجبيل.
– البنجر.
– الجزر.
– المشمش.
– البروتين.
مشروبات لزيادة حليب الثدي:
– عصاير الخضروات.
– عصاير الفاكهة الطازة زي (عصير الموز مع اللبن والفراولة,عصير البرتقان او الليمون).
– عصير الجزر.
– اللبن.
– مشروبات الاعشاب زي (الحلبة, الشعير, الكراوية, الينسون, الكركم, القرفة, الزنجبيل).
9- الدش الدافي او الضغط الدافي:
الضغط الدافي على الثدي هيساعد انه يقول لجسمك انه ينتج حليب اكتر ، وفي 3 طرق شائعة عشان تعملي ده قبل الرضاعة مباشرة ، جربي اي واحد فيهم.
– قبل الرضاعة خدي حمام دافي وخلي الماية تنزل على الصدر.
– بلي فوطة بالماية السخنة ، ولكن ماتكونش سخنة اوي عشان ماتحرقش بشرتك ، وحطيها على صدرك.
– استخدمي الكمادات الجل للصدر ، هتلاقيها متوفرة في الصيدلية.
10- ركزي على طفلك عند الرضاعة:
مشاعر الحب والعاطفة اللي بتوصل لطفلك وانتي بتبصي له اثناء الرضاعة ، هي في الواقع هرمون الاوكسيتوسين والبرولاكتين اللي بيتم اطلاقهم في كل انحاء جسمك وبيأدي لزيادة انتاج اللبن.
حاولي انك تقفلي التليفون, اطفي التليفزيون وركزي مع طفلك وبصي له ، عشان تسمحي للهرمونات الطبيعية دي بمساعدة جسمك على انتاج لبن اكتر.
