الشمع البارد: فوايده, ازاي تعمليه, واثاره الجانبية
الشمع البارد يعتبر من ابسط الطرق للتخلص من شعر الجسم غير المرغوب فيه ، ويعتبر اسهل من طرق تانية زي النتف, الشمع السخن, السويت ، تقدري بكل بساطة تشتري شرايح الشمع البارد ، وتحطيها على المنطقة اللي عايزة تزيلي منها الشعر ، وتسحبيها لازالة الشعر ، والنهاردة من خلال موضوعنا هنتعرف على طريقة الشمع البارد لازالة الشعر الزائد, فوايده, وازاي تعمليه, واثاره الجانبية.
الشمع البارد لازالة الشعر:
على عكس الشمع السخن ، في طريقة الشمع البارد انتي مش محتاجة لاستخدام الحرارة لتليين الشمع ، بالاضافة ان شرايح الشمع البارد تقدري تاخديها معاكي بسهولة اثناء السفر لاستخدامها ، وده واحد من اسباب تفضيل كتير من البنات لطريقة الشمع البارد ، تابعي معانا المقال بتاعنا واتعرفي على طريقة ازالة الشعر بالشمع البارد خطوة بخطوة ، وفوايده ، والاحتياطات اللي المفروض تاخديها عند استخدامه.
الفرق بين الشمع السخن والبارد:
– درجة الحرارة: الشمع السخن بيحتاج مصدر حرارة لتذويب الشمع ، بيكون محتاج يتسخن على درجة حرارة 45 درجة مئوية لاستخدامه على الجلد ، من ناحية تانية شرايح الشمع البارد مش محتاجة اكتر من انك تدفيها بين ايديكي قبل الاستخدام.
– مساعدة اضافية: ازالة الشعر بالشمع السخن عملية معقدة وبتحتاج لحد متخصص ، وبتحتاج تحضير والالتزام بارشادات كتير ، والا ممكن يحصلك حروق شديدة ، من ناحية تانية الشمع البارد مش بيحتاج مساعدة او متخصص لازالة الشعر ، وكمان مافيش قلق انه ممكن يحصل حروق او جروح.
– مناطق ازالة الشعر: الشمع السخن بيكون مثالي جدا للشعر الخشن زي الساقين والصدر وشعر العانة ، من ناحية تانية الشمع البارد بيشتغل بشكل افضل على ازالة الشعر الرقيق في المناطق الحساسة ، زي اللي موجودة في منطقة البكيني, تحت الابطين, الفخدين ومنطقة الوجه بالكامل يعتبر الشمع البارد مثالي جدا ومريح واقل الم نسبيا.
فوايد الشمع البارد:
– مريح:
الشمع البارد استعماله مريح وعملي ، وشرايح الشمع البارد متوفرة بسهولة في كل الصيدليات ومحلات السوبر ماركت وتقدري تعمليه في البيت بسهولة ومش محتاجة تروحي صالون او تعمليه عند متخصصة ، مش محتاجة حتى تشطفي المنطقة بالماية والصابون بعد ازالة الشعر بالشمع البارد لانه مش بيسيب اثر على الجلد ، كل اللي هتعمليه انك هتشيلي الشعر بكل سهولة وترطبي جلدك وهتبقي جاهزة.
– مناسب للجيب:
شرايح الشمع البارد تعتبر بديل مش مكلف لطرق ازالة الشعر التانية زي اجهزة ازالة الشعر, كريمات الحلاقة, شفرات الحلاقة, الشمع السخن, النتف ، وفي نفس الوقت فعالة زي الشمع السخن.
– مش مؤلم:
يعتبر حل فعال وخالي من الالم لكل شعر الجسم غير المرغوب فيه ، مافيش خطر من حرق الجلد او جروح عرضية ، وشرايح الشمع البارد مفيدة كمان في ازالة الشعر من المناطق الحساسة زي الابطين, الصدر, ومنطقة البكيني.
– بيزيل الشعر الناعم:
لان الشمع البارد الطف على الجلد وبيكون من الاول موجود كمية معينة على الشرايح ، بالتالي مش هتستخدمي كمية مفرطة على منطقة الشعر ، وده هيخلي العملية كلها اكتر كفاءة واسهل من الشمع او النتف التقليدي.
– الشعر بينمو اقل:
ازالة الشعر بالشمع البارد بشكل متكرر ، واللي بيشتغل بشكل اساسي عن طريق ازالة بصيلات الشعر من الجذور ، ده بيقلل من تكرار نمو الشعر تحت الجلد وبيحافظ على بشرتك ناعمة.
– تأخر نمو الشعر:
بالظبط زي الشمع السخن ، الاستخدام المتكرر لشرايح الشمع البارد بيقلل من شدة اعادة نمو الشعر ، وبيخلي فيه فترات اطول بين جلسات ازالة الشعر بالشمع.
طريقة استخدام الشمع البارد:
على عكس الشمع السخن اللي بيحتاج تسخين الشمع لحوالي 45 درجة مئوية ، الشمع البارد هو عملية بسيطة ، كل اللي هتعمليه افركي شريحة الشمع بين ايديكي لمدة 10 ثواني لتدفئة الشمع ، بعدها اسحبي غطا الشمع ، والزقي الشريط على المنطقة ، واضغطي عليها بايدك ، وبعدها اسحبي الشريط عكس اتجاه نمو الشعر ، وتقدري تستخدمي شريحة الشمع اكتر من مرة (في نفس الجلسة) على مناطق مختلفة لحد ما تحسي انها بطلت تلزق غيريها بشريحة تانية لو احتاجتي.
الافضل قبل عملية ازالة الشعر ، قشري بشرتك وجففيها تماما قبل استخدام شرايح الشمع لضمان ان الشرايح تلزق على البشرة كويس والحصول على افضل نتايج وبشرة ناعمة.
الآثار الجانبية للشمع البارد:
– مش بينصح بيه للشعر الكثيف:
على عكس الشمع السخن, الحلاقة, كريمات ازالة الشعر ، شرايح الشمع البارد مش هتبقى افضل حاجة على شعر الجسم الخشن الكثيف ، خصوصا اللي موجودة على الساقين وفي منطقة العانة ، ، وممكن تحتاجي انك تمري على المنطقة اكتر من مرة لازالة الشعر بالكامل ، وده ممكن يأدي لتهيج الجلد وتغير لونه ، ولكن مع ذلك مع شعر الجسم الناعم والسميك ، الشمع البارد يعتبر اختيار مثالي ومريح.
– مش دقيق بما فيه الكفاية:
في حين ان الشمع السخن دقيق وبيزيل حتى الشعر القصير ، الشمع البارد مش بنفس الدقة ، ولازم الشعر يكون بطول 1/8 بوصة على الاقل عشان تقدري تشيليه بشرايح الشمع البارد.
– اتجنبيه اثناء الدورة الشهرية:
المناطق الحساسة بتكون اكتر حساسية في ايام الدورة الشهرية ، عشان كده مش بننصحك باستخدام شرايح الشمع البارد لازالة شعر منطقة البكيني اثناء الفترة دي ، لان ممكن يحصل تهيج واحمرار وحتى حبوب.
احتياطات عند ازالة الشعر بالشمع البارد:
– اتجنبي المعالجة الكيميائية:
لو عملتي اي علاج كيميائي للجلد ، زي التقشير الكيميائي ، او بتستخدمي الريتينول على البشرة ، لازم تستني كام يوم قبل ما تعملي ازالة للشعر بالشمع ، لان معروف ان العلاجات الكيميائية دي بتخلي البشرة حساسة اكتر ، واستخدام الشمع ممكن يأدي لتهيج الجلد ومشاكل جلدية تانية.
– استخدمي SPF:
الشمع البارد من يسبب تهيج الجلد وظهور بثور وزيادة حساسية الجلد لاشعة الشمس لمدة كام يوم بعد جلسة ازالة الشعر ، وبالتالي استخدام واقي من الشمس ضروري جدا بعد جلسة ازالة الشعر بالشمع.
– تجنب مزيل العرق:
خلي في فترة راحة لمدة 24 ساعة بين الشمع البارد واستخدام مزيلات العرق او البرفيوم اللي بتحتوي على نسبة عالية من الكحول ، لان استخدامه فورا بعد ازالة الشعر بالشمع ممكن يأدي لتهيج الجلد او ظهور بثور واحمرار او حتى ظهور بقع غامقة بشكل دائم ، وده بينطبق بشكل خاص على منطقة الابطين والايدين.
– استخدمي زيت جوز الهند كمرطب:
زيت جوز الهند مشهور بتأثيره المهديء على البشرة ، واستخدام الزيت بعد الشمع البارد مش بس بيهدي الجلد ، ولكم كمان بيرطبه ، وده بيخلي بشرتك شكلها صحي.