طريقة عمل صوص الكوتشوجانج Gochujang الكوري بأسهل طريقة
لو انتي من محبين الاكل الكوري اكيد هيكون عدى عليكي صوص الكوتشوجانج Gochujang اللي بيستخدموه تقريبا في معظم اكلاتهم ، هو عبارة عن معجون فلفل حار ، ويعتبر مكون اساسي في اغلب الاكلات الكورية زي النودلز, الدكبوكي الكوري ، وبيدي طعم حار ومميز ، والنهاردة من خلال موضوعنا هنقولك طريقة عمل صوص الكوتشوجانج Gochujang الكوري بأسهل طريقة وبمكونات متوفرة في البيت.
طريقة عمل صوص الكوتشوجانج Gochujang الكوري:
المكونات:
– 1 ¼ كوباية ماية.
– 1 معلقة كبيرة ملح.
– 2 معلقة صغيرة سكر.
– 3 معلقة كبيرة ارز مطحون.
– 2 معلقة كبيرة فلفل احمر حار مطحون (تقدري تتحكمي في كمية الفلفل الحار حسب الرغبة).
– 1 معلقة كبيرة بابريكا (لو هتقللي من كمية الفلفل الحار زودي من كمية البابريكا).
طريقة التحضير:
1- في حلة على النار ضيفي الماية, السكر, الملح ، وقلبيهم كويس لحد ما السكر والملح يدوبوا تماما.
2- بعدها ضيفي الارز المطحون وقلبي الخليط كويس لحد ما يتقل ويبقى قوامه ناعم وكريمي تقيل ، بعدها ارفعيه من على النار.
3- ضيفي الفلفل الاحمر الحار والبابريكا وقلبي الخليط لحد ما كل المكونات تمتزج كويس مع بعض.
4- سيبي صوص معجون الكوتشوجانج لحد ما يبرد تماما ، بعدها احفظيه في برطمان زجاج.
5- سيبي الصوص يتخمر لمدة يوم بره التلاجة ، بعدها احفظيه في التلاجة لوقت الطبخ تاخدي منه الكمية اللي انتي عايزاها.
6- هيقعد معاكي في التلاجة تقريبا من اسبوع لحد اسبوعين.
