ازاي تكسبي قلب رجل برج السرطان؟

الرجل السرطان هو في الغالب رجل عاطفي وحساس جدا ، ممكن يكون مظهره مايبينش ده ويبان انه بارد ولكن هو قلبه كبير وحنون ، هو رجل مرهف الحس والمشاعر, بيتوتي محب للعيلة ، وبيحب الست الرقيقة اللي تعامله بحب وحنان وبيكره الست اللي شخصيتها قوية اللي بتتصرف زي الرجالة ، وعشان توصلي لقلبه النهاردة هنقولك نصايح هتساعدك على كسب قلب رجل برج السرطان.

كسب قلب رجل برج السرطان:

1- حسسيه بضعفك وحاجتك ليه:

الرجل السرطان مش بينجذب بسرعة للمرأة المسيطرة او قوية الشخصية او اللي يحس معاها انه مالوش دور في حياتها ، خصوصا ان رجل السرطان ممكن يتم اتهامه ان شخصيته ضعيفة من بعض الناس اللي بيتعاملوا معاه ، وبالتالي عشان تكسبي  قلبه حسسيه دايما انك محتاجة مساعدته خصوصا المساعدة المعنوية ، وهتلاقي انه بينجذب ليكي بشكل كبير.

2- اهتمي بيه جدا:

من اكتر الحاجات اللي ممكن رجل برج السرطان هو اهتمامك ودلعك ليه ، ماتوجهيش ليه نقد او لوم بشكل مستمر على تقصيره في اي حاجة وماتبدأيش تسأليه اسئلة كأنه في تحقيق ، الاسلوب ده هيخليه ينفر منك ويبعد بشكل نهائي ، عشان تكسبي قلبه بيني اهتمامك بيه وبحياته ، حاولي تكسبي ثقته ، بيني رعايتك ليه كأنه مسؤولة عنه ، احتويه وعامليه بحنيه ، واستوعبي تقلباته المزاجية ، ساعتها هيشوفك اعظم ست هو قابلها في حياته.

3- خليكي زوجة وام وصديقة:

رجل السرطان انتقائي جدا ، ودايما بيدور على الحب والزواج والاستقرار والعيلة ، وبالرغم انه مش من النوع اللي بيحب من اول نظرة ، ولكن هو بمجرد ما يلاقي فتاة احلامه بيطلع كل الرومانسية اللي جواه وبيهتم بشريكته اللي بيكون منتظر منها انها تكون امينة على مستقبل اسرته ، وبالتالي الرجل السرطان لما بيفكر في الارتباط بيدور على الست اللي ممكن تكون ام لاولاده وشريكه لحياته وتتحمل معاه كل مصاعب الحياة وتوفرله جو هادي مستقر في البيت ، وبالتالي عشان تكسبي قلب رجل برج السرطان لازم تظهري له الجانب المسؤول من شخصيتك وانك مستعدة تكوني زوجة وام ، وبيني احترامك وتقديرك لنظرته للحياة الزوجية ، وحاولي تكون دي اهدافك انتي كمان.

4- خلي الام والعيلة اولا:

قبل ما تظهري حبك واحترامك ليه ، لازم تظهري حبك واهتمامك بعيلته بشكل عام وبأمه بشكل خاص ، خصوصا لو لاحظتي انه مرتبط بيها اوي ، فلو عايزة تكسبي قلبه زودي من زيارتك ليهم وعامليهم كأنهم عيلتك التانية ، قوي علاقتك بأمه وخليكي قريبة منها.

5- اهتمي بالاكل اللذيذ:

رجل السرطان بيحب جدا جو العيلة والتجمعات العائلية واكتر حاجة بيحبها مع الاجواء دي هي ريحة الاكل اللذيذ ، لو في اي شخص بيفتكر ذكريات حلوة في طفولته او اي لحظات حلوة بريحة الاكل هيكون هو رجل السرطان ، عشان كده لو عايزة تكسبي قلبه ماتنسيش تظهري له مهاراتك في الطبخ وتقولي له انك تقدري تعملي له اكلاته المفضلة وخصوصا اللي كان بيحبها في فترة طفولته ، ده لوحده كافي انه يخلي رجل السرطان يقع في حبك.

6- الاخلاص اولا واخيرا:

رجل السرطان طبعه انه رجل شكاك وغيور ولو درجة حبه ليكي عالية اوي ممكن يتوهم بحاجات مش صح عن علاقتك بزميل شغل او اي حد حواليكي بتتعاملي معاه ، عشان كده لازم تحسسيه دايما انه الراجل الاول والاخير في حياتك وقلبك ، اظهري دايما حبك بشكل علني في التجمعات العائلية او مع الاصدقاء وامدحيه ، ورجل السرطان بيحب دايما ان الست تبقى جنبه تواسيه وتخفف عنه في اي موقف ، وبالتالي عشان تكسبي قلبه قومي بالدور ده في بداية علاقتكم ، اساليه دايما على اللي حاسس بيه ، ايه اللي بيضايقه ، وحسسيه انك مهتمه ، حاولي تقدمي بعض الحلول للمشاكل اللي بيواجهها ، حتى لو كانت بس مجرد اقتراحات منك ، هو بيحب ده جدا ، بيحب يحس ان في شخص جنبه وبيدعمه وبيسمعه ، واحذري ثم احذري انك تشعلي غيرته بأي طريقة.

7- اتعاملي معاه بحرص وقت الغضب:

رجل السرطان حساس جدا وعادة غضبه بيكون شديد عشان كده خليكي حريصة في التعامل معاه في الوقت ده ، اديه وقته وخليه يعبر عن غضبه وبعدها عبري له عن اسفك هيسامحك على طول ، لان برج السرطان قلبه طيب ، لما تيجي تصالحيه العبي على وتر المشاعر لان مشاعره بتتأثر بسهولة ، وهو رجل مش بينسى الاساءة بسهولة عشان كده ماتحاوليش تقللي ابدا من اساءتك ليه ، ولكن حاولي تقنعيه انك ماكنتيش تقصدي الاساءة ، ولان برج السرطان عنيد لو استمر في عناده حولي تركيزه اثناء غضبه ان ده هيأثر على مستقبلكم مع بعض ، ولانه زي ما قولنا هو بيحب جو العيلة والاستقرار هيبدأ يهدا ويلين.

العاطفي الشهم: رجل برج السرطان