ازاي تكسبي قلب رجل برج الميزان؟
الرجل الميزان ، هو الرجل اللي بيوزن الامور بقلبه وعقله مع بعض ، مافيش كفه عنده بتميل عن التانية ، بيدور دايما عن السلام وبيتجنب المشاكل ، وده بيخليه رجل مختلف عن باقي الابراج التانية ، ولان كل برج ليه طريقته الخاصة في التعبير عن حبه وانجذابه للشريك ، النهاردة من خلال السطور الجايه هنتعرف مع بعض على افضل نصايح هتساعدك على كسب قلب رجل برج الميزان.
كسب قلب رجل برج الميزان:
الحب يعتبر من اهم الحاجات عند رجل برج الميزان ، ومستحيل يتخيل حياته من غير الحب ، وطول حياته بيقعد يدور على الشريكة اللي تغرقه بعواطفها وحبها.
الا انه من الناحية التانية بيلاقي صعوبة في اختيار شريكة حياته المناسبة ، وده بيرجع انه بيفكر اكتر من مرة قبل ما ياخد خطوة الارتباط ، ومش بس بياخد وقت طويل في التفكير لكن كمان ممكن يرجع في قراره في نفس اللحظة لو حس انه مش مقتنع بشكل كامل ، وده بيخلي كتير يفتكروا انه شخص مش دوغري ومش اهل للثقة ، الا انه الواقع عكس كده تماما ، هو بيوزن الامور بقلبه وعقله بالتساوي ، وده اللي بيخليه ياخد وقت طويل على ما يحسم قراراته لانه بيكون عايز يقتنع بعقله قبل ما ياخد اي خطوة.
ولو رجل الميزان وقع في حبك اتأكدي انك محظوظة لانك اخدتي قلب شخص صادق جدا في مشاعره ، وراجل غير تقليدي هتلاقيه دايما جنبك وقت ما تحتاجيه.
1- خليكي ايجابية:
رجل الميزان هو رجل متفائل بيحب الضحك والتفاؤل في حياته ، بيبص لكل حاجة في حياته بنظرة ايجابية ، وبالتالي واحدة من اهم الصفات اللي بيدور عليها رجل الميزان في شريكته هي انها تكون انسانة ايجابية بتحب الحياة والضحك زيه ، عشان كده بننصحك تبعدي عن السلبية والنظرة التشاؤمية وانتي بتتناقشي معاه في اي موضوع عشان تكسبي قلبه وعقله.
2- خليكي انيقة:
رجل الميزان هو رجل انيق بشكل عام ، وبيحب ان شريكته تكون في كامل اناقتها من غير دوشة كتير او الوان مثيرة هو بيحب الاناقة البسيطة الهادية ، وعشان تجذبي رجل برج الميزان اعتمدي على اختيار الملابس الانيقة الكلاسيكية لانها المفضلة عنده.
اما بالنسبة للمكياج اتجنبي المكياج القوي الجريء ، لان هو زي ما بيحب الاتزان والاناقة البسيطة في اختيار الملابس بيحب ده كمان في المكياج.
3- ابعدي عن الروتين:
الميزان بشكل عام بيحب التغيير والتجديد ، وبيضايق من الروتين وبيحسسه بالملل ، فلو انتي عايزة تكسبي قلب رجل برج الميزان حاولي تكسري الروتين في حياته بقدر الامكان ، فاجئيه دايما بأفكار رومانسية جديدة ، لان هو رجل رومانسي وبيحب المفاجآت الرومانسية جدا.
4- امدحيه:
رجل الميزان بيعشق المجاملة والمدح ، فلو عايزة تكسبي رجل الميزان بسهولة امدحيه دايما ده المفتاح اللي هيخليه يدوب في حبك ، قوليله دايما ان لبسه شيك ، علقي على قصة شعره وقوليله قد ايه لايقة عليه ، وانك قد ايه بتحبي حنيته وان مافيش راجل زيه في الدنيا ، ده هيخلي لك الطريق لقلبه مفتوح.
5- اظهري مشاعرك:
احنا قولنا ان رجل برج الميزان بيتميز بالتوازن بين عقله وعاطفته ، الا انه من جواه هو راجل بيهتم بالحب والرومانسية وبيقدرهم وبيدور عليهم في شريكة حياته ، فلو عايزة تكسبي قلبه اديه كل اللي محتاجه من الحب والحنان والمشاعر وغرقيه بكلام الحب والغزل ، واتأكدي ان ده هيكون ليه تأثير كبير جدا عليه.
6- خليكي اجتماعية:
رجل الميزان هو رجل اجتماعي جدا وبيحب شريكته كمان تكون شخصية اجتماعية ، وتعرف ازاي تتعامل بلباقة وذكاء مع اللي حواليها ، فلو عايزة تكسبي قلبه خليكي شخص اجتماعي تشاركيه حياته الاجتماعية في الحفلات او مع الاصحاب ، ممكن كمان تشاركي في اي عمل تطوعي لان ده هيبين له انك شخص عطوف وطيب ، وده هيخليه ينجذب ليكي بشكل كبير.
اللبق الحكيم: رجل برج الميزان
