ليه الرجال مش بيعرفوا يعبروا عن مشاعرهم زي النساء
كلنا اتعودنا ان النساء دايما هما اللي بيعبروا عن مشاعرهم بشكل منفتح اكتر من الرجال ، ولكن كل شخص مختلف عن التاني ، وممكن بعض الرجال يكونوا عاطفيين جدا ويعبروا بسهولة عن اللي بيحسوا بيه ، ولكن الباحثين بيحاولوا يدوروا دايما عن سبب عدم تعبير الرجال عن مشاعرهم زي النساء ، وده اللي هنعرفه النهاردة مع بعض من خلال السطور الجايه.
الرجالة بيحسوا بالعواطف زي النساء:
دايما بنسمع النساء بيقولوا جملة “انا حاسه انه مش مهتم بيه” لما شريكهم مش بيعبر عن مشاعره بشكل واضح ، ولكن هل ده فعلا صح؟ الاحصائيات بتشير ان النساء معرضين اكتر للاكتئاب والقلق ، ولكن الرجالة كمان بيتأثروا بحالات الصحة العقلية.
هل تعرفوا ان اكتر من 30% من الرجالة بيعانوا من الاكتئاب في مرحلة ما من حياتهم؟ وحوالي 9% بيعانوا من الاكتئاب او القلق يوميا ، ولكن ليه هما بيخفوا المشاعر دي ومش بيظهروها بسهولة ، تعالوا نعرف مع بعض.
سبب عدم تعبير الرجال عن مشاعرهم:
1- بسبب ضغط المجتمع:
العبارة الشائعة دايما “الراجل قوي” بتلعب دور مهم في سلوك الرجل ، وده بيخليه انه المفروض “يتعامل مع اي حاجة بشجاعة” ، وده يعتبر ضغط من المجتمع على الرجل.
وكشفت الابحاث ، ان حوالي تلث الرجالة بيحسوا بالضغط عشان يبان انه قوي وشجاع وفي موقف رجولي ، والرجالة الاصغر سنا اللي اعمارهم ما بين 18 – 34 سنة حوالي 47% بيعانوا من الاحساس ده ، وفهم التأثير المجتمعي ممكن يساعد في التغلب على العقبات اللي بتمنع صحة الرجل العقلية.
الرجالة في كتير من الاحيان مش بيظهر عليهم عدد اقل من العلامات الواضحة عن صحتهم العقلية وبيقل احتمال انهم يناقشوا احساسهم بشكل علني ، والابحاث بتقول ان النساء لما بتصاب بالاكتئاب ، فهما بيظهروا حزنهم وبيعبروا عن مشاعرهم على طول ، اما الرجالة بيظهر عليهم علامات العصبية والغضب ، ومن خلال فهم الاختلافات بين الجنسين في التعبير عن صحة كل واحد العقلية ، نقدر نحدد العلاج بشكل افضل.
الرجالة مش بيعبروا عن مشاعرهم بشكل سهل ، وده بينعكس عليهم بشكل سلبي.
2- ببساطة مش بيعرفوا يعبروا عن مشاعرهم:
ماحدش شرح للرجالة من صغرهم ازاي يعبروا عن مشاعرهم ، دايما توقعات المجتمع في مرحلة الطفولة للرجالة انهم يبقوا صارمين وغير عطوفيين ، وده بيخليهم يكبروا وهما مش عارفين ازاي يعبروا عن مشاعرهم.
في حين ان النساء بيعبروا عن حزنهم بشكل علني ، الرجالة بيميلوا لاخفاء آلامهم والظهور بهدوء ، لان ضغط المجتمع بيخلي صعب على الراجل انه يكون ضعيف ، لان ده يعتبر من المحرمات بالنسبة للمجتمع ، ونتيجة لده ، بتتأثر صحة الرجل العاطفية ، ولكن من خلال تشجيع المحادثات المفتوحة حوالين الصحة العقلية وتحطيم الصور النمطية ، ممكن مساعدة الرجال على الشعور بالراحة والقدرة على التعبير عن مشاعرهم.
3- بيفصلوا عواطفهم عن افكارهم:
الجسم الثفني ، هو جزء من المخ بيربط نص المخ اليمين بالشمال ، وده بيكون اكبر عند النساء عن الرجال ، وده بيأدي لقدرة اعلى على الشعور والتفكير في وقت واحد ، عشان كده المرأة بتقدر تحس وتفكر في نفس الوقت.
من ناحية تانية ، الرجالة بيميلوا لفصل عواطفهم عن افكارهم ، وده بيأدي للتردد في مناقشة الموضوعات العاطفية ، وده بدوره ممكن يأدي لصعوبة التواصل في الموضوعات الحساسة او المرتبطة بالتعبير عن المشاعر ، مهم جدا اننا نعرف الاختلافات دي بين الراجل والست ونفهمها.
الرجال والنساء ممكن يكونوا شبه بعض في بعض النواحي ، ولكن هما مازالوا مختلفين ، حتى الطريقة اللي بيتعاملوا بيها مع الاجهاد ممكن انها تختلف حسب توقعات المجتمع والناحية الفسيولوجية والسيكولوجية لكل واحد فيهم.
