10 حاجات تنضيفهم زيادة عن اللزوم ممكن يسبب تلفهم
على الرغم من ان الموضوع يبان غريب ، الا انه احيانا التنضيف الزيادة بيضر اكتر ما ينفع ، في حاجات مش بتحتاج تنضيف بشكل زيادة او عدد مرات كتير ، لانها ممكن تتلف ، والنهاردة من خلال موضوعنا هنشارك معاكم 10 حاجات تنضيفهم زيادة ممكن يتلفهم.
حاجات تنضيفهم زيادة ممكن يتلفهم:
1- الفوط:
انتي مش مضطرة تغسلي الفوط بعد ما مرة تستخدميهم ، من الآمن جدا استخدام الفوط لمدة اسبوع ، مادام اتأكدتي من جفافها كويس ، يعني بعد كل استخدام حطيها في مكان تتهوى وتنشف ، ده هيحافظ على الفوط بتاعتك في حالة جيدة اطول فترة ممكنة.
2- الاثاث الخشبي:
ثبت ان السبراي اللي بيعتمد على الشمع لتنضيف الاثاث الخشبي ممكن يعمل تراكم زيتي على الاثاث يجذب تراب اكتر لو استخدمتيه اكتر من مرة لمرتين في الشهر ، عشان كده لو انتي بتحبي تمسحي الاثاث كل يوم ، الافضل انك تعملي ده بقطعة قماش جافة.
3- الطاسة المصنوعة من الحديد:
ممكن تكوني بتغسلي الطاسات الحديد بمنظف غسيل الاطباق العادي ، ولكن الحقيقة ان ده ممكن يتلف الحديد ، الطريقة الصح اللي المفروض تعمليها لتنضيف الطاسات الحديد هي انك تعملي محلول عبارة عن ملح خشن وماية لازالة اي بقايا محروقة ، ومهم انك تسيبي الطاسة تنشف بعد الغسيل لان حتى قطرات الماية البسيطة ممكن تسبب صدأ للطاسة.
وانتي مش محتاجة تغسلي الطاسة الحديد عدد مرات كتير ، يعني لو في مرات عملتي فيها حاجة مافيهاش دهون او ماسبتش اوساخ في الطاسة ممكن تنضفيها عن طريق مسحها بس.
4- المرايات:
رش منظف الزجاج على المراية يوميا ممكن يتسبب في تلفها ، ممكن ده يسبب ظهور بقع سودا حوالين حواف المراية او حتى في نصها ، عشان كده الافضل تنضفي المراية مش اكتر من مرة واحدة بس في الاسبوع لتجنب المشاكل دي.
5- البوتجاز:
حتى لو بتطبخي عليه بشكل يومي ، مافيش داعي انك تنضفي البوتجاز كل يوم لو مش متوسخ اوي ، لان الاكل مش بيتلامس مع سطح البوتجاز اثناء الطبخ والحرارة العالية بتقتل الجراثيم بشكل فعال ، مافيش مشكلة من مسح البوتجاز بعد الطبخ بفوطة جافة وغسله مرة في الشهر.
6- السويتر:
مافيش مانع ابدا من لبس السويتر اكتر من مرة قبل غسله ، لو مافيش عليه اي بقع او عرق ، ممكن تلبسيه لحد 6 مرات وبعدين تغسليه ، لان كثرة غسيل الملابس الصوف ممكن يأدي لتلف النسيج بتاعها وتغيير شكلها.
7- الجينز:
مافيش مانع من غسل البنطلون الجينز بعد 4 – 5 مرات من اللبس ، والاكتر كمان ان مصنعين الجينز نفسه بيوصوا بغسل الجينز مرة واحدة كل 6 شهور للحفاظ عليه ، وبدل الغسيل ممكن تحطيه في كيس وتدخليه في الفريزر طول الليل ده هيخلصك من اي روايح ، وممكن كمان تعملي سبراي منعش عبارة عن ¼ كوباية كحول, ¼ كوباية ماية و 3 نقط من زيت اللافندر ، رشي البنطلون بالسبراي ده وسيبيه ينشف في الهوا ، هيكون بديل مثالي جدا للغسيل.
8- البيجامة:
اغسلي البيجامة مرة واحدة في الاسبوع او كل 3 – 4 ايام لو بتعرقي وانتي نايمة ، ومع ذلك ، لو انتي بتلبسي البيجامة طول اليوم هتبقي محتاجة تغسليها اكتر ، وبننصحك تاخدي شاور قبل النوم كل يوم للحفاظ على نضافة هدومك دايما.
9- ابريق الشاي الفخار:
مش بننصحك تغسلي ابريق الشاي المصنوع من الطين بالمنظف ، لان الطين بيمتص نكهة الشاي وتحسين طعمه عند نقع اوراق الشاي فيه ، لما تيجي تنضفيه هيكون كافي انك تتخلصي من اوراق الشاي وتشطفيه بالماية السخنة بس.
10- الموبايل:
على قد ما بتبقي عايزة تنضفي تليفونك كل يوم ، الا انه مش ضروري تعملي ده يوميا ، بدل كده خليها قاعدة اساسية عندك انك تغسلي ايدك قبل لمس شاشة الموبايل ، والافضل انك تنضفي الموبايل بمسحة بمطهر مضاد للبكتيريا مرة واحدة بس في الاسبوع.