3 علاجات للقدمين لتنعيمها تعمليهم بنفسك في البيت
للحفاظ على نعومة رجليكي وترطيبهم انتي مش محتاجة كل مرة تروحي لصالون عشان تعملي جلسة علاجية ، تقدري تعملي ده بنفسك في البيت بمكونات طبيعية بسيطة ، والنهاردة من خلال موضوعنا هنشارك معاكم 3 علاجات للقدمين لتنعيمها وترطيبها والتخلص من الجفاف والتشققات.
علاجات للقدمين لتنعيمها:
1- للبشرة الجافة والمتهيجة: ماسك القدم بالبيض والموز
المكونات:
– بيضة واحدة مخفوقة.
– 1 موزة مهروسة.
– 3 – 4 معالق كبيرة لبن.
– 2 معلقة كبيرة عسل.
– 5 معالق كبيرة من زيت الزيتون.
المقشر ده بيحتوي على مقشر كيميائي خفيف وهو حمض اللاكتيك الموجود في اللبن ، وحمض اللاكتيك يعتبر حمض خفيف بيقشر مع خصائص ترطيب اضافية ، والمقشر ده مثالي للبشرة الجافة والحساسة.
اخلطي كل المكونات مع بعض ، وزعي الخليط على القدمين وسيبيه لمدة 40 دقيقة ، وبعدها اغسلي القدمين بغسول لطيف ، ولان الماسك ده مليان بمكونات مرطبة ، الافضل انك تعمليه بعد نقع رجلك شوية في ماية دافية ، عشان بشرتك تمتص كل فوايد المكونات.
2- للبشرة الجافة: ماسك القهوة والكركم
المكونات:
– 1 معلقة كبيرة من عصير الليمون.
– ¼ معلقة صغيرة كركم.
– ½ معلقة صغيرة قهوة مطحونة.
اخلطي الكركم والقهوة مع بعض وضيفي عصير الليمون بالتدريج لحد ما يبقى عندك قوام مناسب ، انقعي رجلك في ماية دافية لمدة 10 دقايق ، وبعدها دلكي رجلك بالمقشر ده في حركات دائرية.
3- للترطيب والتقشير: مقشر السكر وزيت الزيتون والعسل
المكونات:
– ½ كوباية سكر.
– ¼ كوباية من زيت الزيتون.
– 1/8 كوباية عسل.
– 3 – 5 نقط من زيت اللافندر.
اخلطي المكونات كلها مع بعض ، انقعي رجلك في ماية دافية لمدة 10 دقايق ، وبعدها استخدمي المقشر بتدليك البشرة في حركات دائرية.
حاجات حطيها في اعتبارك عند تقشير القدمين:
– اتجنبي التقشير القاسي: اتجنبي استخدام مكونات قاسية زي صودا الخبز او اي مكون يكون عبارة عن حبيبات خشنة اوي ، لان المكونات دي ممكن تعمل جروح صغيرة في الجلد وده ممكن يأدي لتغيير او تعطيل مستوى الاس الهيدروجيني الصحي بشكل سلبي ، وعلى الرغم من ان بطن الرجل بيكون الجلد فيها سميك جدا ، الا انه بيكون حساس جدا.
– ابعدي عن المكونات اللي ممكن تجفف الجلد: اتجنبي استخدام الكحول لانه ممكن يجفف الجلد ، واستبدليه بمكونات زي الجلسرين, السيراميد, فيتامين E, زيت اللافندر, زيت النعناع, زيت شجرة الشاي ، المكونات دي هتحافظ على رطوبة الجلدمع ازالة الجلد الميت لما يتم مزجها بمقشر طبيعي للمساعدة في تنعيم الملمس الخشن في القدمين.
– اتجنبي التقشير الكيميائي القاسي: ابعدي عن الاحماض او المقشرات الكيميائية القاسية لتجنب الحروق او التهيج عند تقشير القدمين ، ممكن تكون المقشرات اللي بتشيل طبقة من الجلد المنتشرة على الانترنت مغرية بالنسبة لك ، ولكن الحقيقة هي ممكن تضر اكتر ما تنفع ، المقشرات الكيميائية زي حمض الساليسيليك وحمض الجليكوليك والانزيمات بتكون قاسية جدا على جلد القدمين.