طرق حماية وعلاج الشعر التالف من الشمس
مع دخولنا موسم الصيف والجو الحر ، مهم اننا نحافظ على بعض العادات الصحية الخاصة بفصل الصيف ، وفي حين ان كلنا عارفين اهمية حماية بشرتنا من اضرار اشعة الشمس ، الا انه من السهل علينا اننا ننسى اهمية حماية الشعر التالف من الشمس ، اشعة الشمس بيبقى تأثيرها لحد كبير زي التبييض على الشعر ، الا انه الخبر الحلو انك تقدري تاخدي الاحتياطات اللازمة لحماية شعرك من الشمس في الصيف ، سواء كنتي بتخططي انك تروحي البحر ، او تعكسي الضرر اللي حصل بالفعل على شعرك ، تابعي معانا السطور الجاية واتعرفي على طرق علاج الشعر التالف من الشمس وحمايته بنصايح بسيطة.
حماية الشعر من تلف الشمس:
1- اتجنبي الكيماويات:
الماية المعالجة بالكلور في حمامات السباحة او تفتيح الشعر ممكن يخليه معرض اكتر لعوامل الصيف من الحرارة والشمس ، حاولي انك تقللي بقدر الامكان من تفتيح الشعر ، واشطفي شعرك فورا بعد الخروج من حمام السباحة.
ممكن كمان تستخدمي منتجات حماية الشعر من الشمس ، زي السبراي او كريمات الشعر اللي بتحتوي على عامل حماية من الشمس.
2- استخدمي اكسسوارات الشعر:
القبعة او السكارف من الاكسسوارات المهمة والاساسية في الصيف لحماية شعرك من الشمس ، بالاضافة انها تعتبر افضل الطرق لحماية فروة راسك من اضرار الشمس.
كمان خدي بالك من تسريحات شعرك ، حاولي ماتستخدميش الاربطة المطاطية الضيقة لربط الشعر وهو مبلول لانها ممكن تضر بصيلات الشعر ، اتجنبي تسريحة العقدة العلوية الضيقة اللي ممكن تضغط على خط الشعر ، اعتمدي على تسريحات ناعمة اكتر زي تسريحة ديل حصان منخفضة, ضفيرة, او لفي الشعر وثبتيه ببنسه ، حاولي كمان تتجنبي امشاط الشعر اللي اسنانها ضيقة على الشعر المبلول ، حاولي تسرحي شعرك بصوابعك الاول واستخدام سيروم الشعر لفك التشابك.
3- استخدمي البلسم المناسب لشعرك:
كل نوع شعر ليه المناسب ليه ، من الشعر الخفيف, الكثيف, المصبوغ ، كل واحد ليه النوع اللي يحميه من اشعة الشمس ، عشان كده لازم تستخدمي بلسم مناسب للون شعرك ونوعه ، بالاضافة لحالة الجو لازم تحطيها في اعتبارك.
طرق علاج الشعر التالف من الشمس:
1- علاج الزيت السخن:
واحدة من افضل الطرق لاستعادة الرطوبة الطبيعية لشعرك هي العلاج بالزيت السخن ، ممكن تجربي خلط 3 كبسولات من زيت فيتامين Eمع ½ كوباية من زيت الزيتون ، سخني الخليط في الميكروويف لمدة 5 – 10 ثواني او على حمام ماية سخنة لحد ما دافي ومش سخن اوي ، ودلكي بيه شعرك وفروة راسك ، وسيبيه على الشعر لمدة 15 دقيقة وبعدها اغسليه.
2- استخدمي ماسك الشعر المرمم:
الشمس بتدمر بروتين الشعر والمعروف باسم الكيراتين ، ولعكس التأثير ده ممكن تستخدمي ماسك الشعر الغني بالبروتين يعتبر افضل اختيار ليكي.
3- قصي الشعر:
على الرغم من ان قص الشعر مش اول اختيار لينا ، الا ان قص اطراف الشعر التالفة من الشمس واحدة من افضل الطرق للحفاظ على صحة الشعر وتحفيز نموه ، حاولي تقصي اطراف الشعر كل 3 شهور او اكتر حسب حالة شعرك ، لان قص اطراف الشعر المقصفة هتمنع وصول التقصف والضرر لباقي الشعر.
