طريقة عمل حلوى لقمة الباشا التركية بالخطوات والفيديو
حلوى لقمة الباشا التركية من الذ واسهل الحلويات ، بمكونات بسيطة جدا ومن غير خبز ولا فرن ، وتقدري تقدميها في اي مناسبة ، تعالوا نشوف مع بعض الطريقة بالخطوات والفيديو.
طريقة عمل حلوى لقمة الباشا التركية:
المكونات:
– لتر لبن ( 4 كوبايات وربع).
– 1 كوباية دقيق (125 جرام).
– 1 كوباية سكر (200 جرام).
– 1 معلقة كبيرة فانيليا.
– 4 معالق كبيرة زبدة (60 جرام).
مكونات كريمة الحشو:
– كيس كريم شانتي.
– كوباية الا ربع لبن (200 مل).
– مكسرات.
طريقة التحضير:
1- في حلة اخلطي اللبن والدقيق والسكر والفانيليا على البارد لحد ما الدقيق يدوب في اللبن.
2- ارفعي الحلة على نار متوسطة مع التقليب المستمر ، لما اللبن يبدأ يغلي قللي النار.
3- ضيفي الزبدة وسيبي الخليط يغلي لحد ما يتقل ويبقى قوامه كثيف.
4- سيبي الخليط يبرد على جنب شوية يبقى دافي ، وجهزي الصينية اللي هتصبي فيها الخليط.
5- هاتي صينية بحجم 30 في 40 سم ، وافردي عليها غلاف بلاستيك.
6- رشي طبقة وفيرة من جوز الهند المبشور بحيث تغطي الصينية كلها ، ووزعي جوز الهند بالمعلقة بالتساوي.
7- صبي خليط اللبن على الصينية فوق جوز الهند ، ووزعيه بالراحة بالتساوي ، ودخلي الصينية التلاجة لمدة ساعة.
8- في الوقت ده هنحضر كريمة الحشو ، في طبق اخلطي الكريم شانتي مع اللبن ، واضربيهم بالمضرب الكهربائي على سرعة عالية لحد ما الكريمة يبقى قوامها سميك ، ممكن تضيفي لون طعام على الكريم شانتي لو حابه الحشو يكون ملون (اختياري).
9- خرجي الصينية من التلاجة ووزعي عليها الكريم شانتي.
10- قطعيها مستطيلات كبيرة ورشي عليها مكسرات مجروشة ، وابدأي لفي كل قطعة على شكل رول بالراحة.
11- رصي لقمة الباشا على طبق التقديم ، ورشي عليها من فوق فستق مجروش للتزيين.
