طريقة عمل الكنافة بالقشطة

ريهام محمود
ريهام محمود
430

الكنافة من اشهر حلويات رمضان ، ولكن هي كمان من انواع الحلويات اللي كلنا بنحب ناكلها طول السنة مش بس في رمضان ، والنهاردة من خلال موضوعنا هنشارك معاكم طريقة عمل الكنافة بالقشطة.

طريقة عمل الكنافة بالقشطة:

مكونات الكنافة:

– ½ كيلو كنافة.

– 4 معالق كبيرة مليانة سكر بودرة (80 جرام).

– 1 كوباية سمنة (250 جرام).

مكونات القشطة:

– 3 كوبايات لبن (600 مل).

– 6 معالق كبيرة ممسوحة نشا (60 جرام).

– 1 معلقة كبيرة دقيق (10 جرام).

– كوباية الا ربع قشطة بلدي (170 جرام) ، ممكن تستخدمي القشطة المعلبة، او تاخدي وش القشطة بتاعة اللبن.

– 1 معلقة صغيرة فانيليا (5 جرام).

مكونات الشربات:

– 3 كوبايات سكر.

– 2 كوباية ماية.

– عصير ½ ليمونة.

– 2 معلقة كبيرة عسل نحل.

طريقة عمل الكنافة بالقشطة
طريقة عمل الكنافة بالقشطة

طريقة التحضير:

1- اول حاجة هنحضر الشربات عشان نسيبه يبرد لحد ما نجهز الكنافة ، في حلة على النار ضيفي السكر, الماية, عصير الليمون, والعسل ، ماتقلبيش الخليط خالص ، سيبيه يغلي على النار لمدة 15 دقيقة لحد ما السكر يدوب والشربات يتقل ، نرفعه من على النار ونصبه في برطمان ونسيبه يبرد ، شربات الكنافة المفروض يكون تقيل وبارد ، وممكن تحضري الشربات قبلها بيوم.

2- تاني خطوة هنجهز الكنافة ، حطيها في طبق كبير وابدأي فتتيها بايدك لقطع صغيرة ، نضيف عليها السكر البودرة ونقلبهم مع بعض ، ندوب السمنة وممكن نضيف لها صبغة كنافة عشان نديها لون محمر (اختياري) ، وصبي السمنة السايحة على الكنافة ، وقلبيها معاها كويس لحد ما السمنة تغطي الكنافة كلها.

3- هاتي صينية مقاس 28 تقريبا ، وادهني القعدة والجوانب بتاعتها بكمية وفيرة من السمنة ، اقسمي الكنافة 2/3 و 1/3 ، وزعي 2/3 الكمية في الصينية وسيبي ال 1/3 الباقي على جنب هنحطه على الوش ، وزعي الكنافة في الصينية كويس بالتساوي ، وبعدها اضغطي على الكنافة بصينية اصغر او طبق مسطح لحد ما تساوي السطح بتاعها كويس ويبقى ليها حروف حوالين الصينية.

4- دلوقتي هنجهز القشطة ، في طاسة ضيفي النشا, اللبن, الدقيق ، قلبيهم مع بعض لحد ما ندوب النشا والدقيق  ، بعدها ضيفي القشطة وقلبي المكونات كلها كويس على البارد ، ارفعي الطاسة على نار هادية مع التقليب المستمر لحد ما تتقل ، اطفي النار وضيفي الفانيليا وقلبي.

5- هنصب القشطة وهي سخنة على صينية الكنافة اللي حضرناها ، ونوزعها كويس.

6- اخر خطوة هنجيب 1/3 كمية الكنافة الباقي ونوزعه على الوش فوق القشطة ، وفي الاخر ساويها بطبطة خفيفة من غير ضغط ، بعدها وزعي كمية من السمنة على وش الكنافة.

7- دخلي الصينية في فرن متسخنة على درجة حرارة 200 درجة مئوية على الرف اللي في النص ، وتظبطي الفرن ان النار تكون من تحت بس ، لمدة 30 دقيقة تقريبا ، وهنعرف انها استوت كويس لما الجوانب تاعة الكنافة تفصل عن الصينية والكنافة تاخد لون دهبي من تحت ، بعدها هنقفل النار من تحت ونشغل الشواية لحد ما تاخد لون دهبي من فوق.

8- اقلبي الكنافة على طبق ، وسيبيها ترتاح 10 دقايق ، وبعدها اسقيها بالشربات البارد ، وممكن ترشي على الوش مكسرات.

طريقة عمل الكنافة بالقشطة 2

الطريقة بالفيديو:

مقالات متعلقه

طريقة عمل حلوى اللدو الهندية

طريقة عمل حلوى اللدو الهندية

طريقة عمل كيك الصفوف اللبنانية

طريقة عمل كيك الصفوف اللبنانية

طريقة عمل كيكة الجلاش بالخطوات

طريقة عمل كيكة الجلاش بالخطوات