وصفة الفراخ على الطريقة الرومانية
الفراخ على الطريقة الرومانية ، من الاطباق اللذيذة جدا وهي عبارة عن فراخ مع الفلفل المشوي ، ومزيج من التوابل ، الطبق سهل التحضير ومش هياخد منك وقت ، تعالوا نشوف مع بعض الوصفة بالخطوات.
الفراخ على الطريقة الرومانية:
المكونات:
– 4 اوراك فراخ.
– 4 حبات فلفل الوان اصفر, برتقاني, احمر, اخضر ، قطعيهم شرايح سميكة.
– 1 كوباية (245 جرام) صلصة طماطم طازة.
– 1 كوباية (24 جرام) اوراق ريحان طازة.
– 5 ½ معلقة كبيرة زيت زيتون.
– 4 فصوص ثوم كبيرة مهروسة.
– ½ كوباية (120 جرام) مرقة دجاج, مرقة خضار.
– ¼ معلقة صغيرة اوريجانو او زعتر مجفف.
– 1 معلقة صغيرة من اكليل الجبل (الروزماري) المجفف.
– 1 معلقة صغيرة مرمرية مجففة.
– ملح حسب الذوق.
– فلفل اسود.
طريقة التحضير:
1- سخني الفرن على درجة حرارة 140 درجة مئوية.
2- سخني طاسة على نار متوسطة لعالية ، وضيفي لها 4 معالق كبيرة زيت زيتون.
3- في طبق صغير اخلطي الاوريجانو, اكليل الجبل, المرمرية مع بعض مع الملح والفلفل الاسود وقلبيهم.
4- غطي كل قطعة فراخ ب 1 ½ معلقة صغيرة من زيت الزيتون.
5- رشي خليط التوابل على الفراخ ودلكيها كويس من كل حته.
6- حطي الفراخ في الطاسة على الناحية اللي فيها الجلد ، وسيبيها على النار لمدة 6 دقايق او لحد ما تتحمر ، بعدها اقلبي الفراخ وحمريها على الجنب التاني لمدة دقيقة كمان ، وبعدها انقلي الفراخ في طبق على جنب.
7- في نفس الطاسة ضيفي الثوم وحمريه لمدة دقيقة مع التقليب المستمر ، ضيفي الفلفل الالوان والملح والفلفل ونص كمية الريحان.
8- غطي الخليط وسيبيه على النار لمدة 5 دقايق.
9- سيلي الغطا وضيفي صلصة الطماطم والمرقة وسيبيهم على النار لحد ما المرقة تتبخر والطماطم تتسبك.
10- انقلي خليط الفلفل وصلصة الطماطم في صينية فرن وحطي فوقيهم الفراخ ، دخليهم الفرن لمدة 45 – 50 دقيقة او لحد ما الفراخ تستوي.
11- خرجي الصينية من الفرن وضيفي باقي الريحان على الوش وغطيها بورق فويل ، وسيبيها ترتاح لمدة 10 دقايق قبل التقديم.