طريقة عمل كيكة الجلاش بالخطوات

ريهام محمود
ريهام محمود
530

الجلاش من انواع الحلويات الشرقية المميزة جدا ، واللي ليه طرق كتير جدا وممكن يتعمل حلو او حادق ، والنهاردة من خلال موضوعنا هنعرف مع بعض طريقة عمل كيكة الجلاش ، من الوصفات السهلة والسريعة للجلاش وطعمها لذيذ جدا ، وتعتبر من الحلويات المناسبة لشهر رمضان.

طريقة عمل كيكة الجلاش:

مكونات الجلاش:

– لفة جلاش.

– ½ كوباية سكر بودرة.

– 2 كوباية لبن (500 مل).

– 2 معلقة كبيرة كاسترد بودر (لو مش متوفر ممكن تستبدليه بالنشا).

– 1 معلقة كبيرة بيكنج بودر.

– رشة فانيليا.

– رشة ملح.

– ½ كوباية سمنة سايحة ، او ميكس ما بين سمنة وزيت ، او سمنة وزبدة.

مكونات الشربات:

– 2 كوباية سكر.

– 1 كوباية ماية.

– عصرة ليمون.

طريقة عمل كيكة الجلاش
طريقة عمل كيكة الجلاش

طريقة التحضير:

1- حضري الشربات اول حاجة عشان نسيبه يبرد على ما نحضر الجلاش ، في حلة على النار ضيفي السكر والماية وسيبيهم من غير ما تقلبيهم لحد ما السكر يدوب والخليط يغلي ، بعدها ضيفي حوالي ¼ معلقة عصير ليمون وقلبيهم ، وسيبي الخليط يغلي حوالي 3 دقايق كمان لحد ما يتقل ، انقليه في برطمان او ازازة على جنب عشان يبرد.

2- هاتي صينية فرن ادهنيها سمنة او زبدة وبطنيها برشة دقيق ، او بورقة زبدة.

3- هاتي ورق الجلاش كرمشية بايدك وحطيه في الصينية.

4- رصي كل ورق الجلاش جنب بعضه لحد ما تخلصي الكمية كلها.

5- بالسكينة ابدأي خرمي الجلاش عشان التشريبة اللي هنسقي بيها الورق توصل لكل الاماكن.

6- هنحضر خليط التشريبة ، اخلطي اللبن, مع السكر البودرة, الكاسترد او النشا حسب اللي هتستخدميه, البيكنج بودر, الفانيليا, الملح ، وقلبي الخليط مع بعضه لحد ما تتخلصي من كل التكتلات ويبقى ناعم ، ضيفي السمنة السايحة وقلبي الخليط تاني لحد ما كل المكونات تمتزج مع بعض كويس.

7- صبي التشريبة فوق الجلاش.

8- دخلي الصينية الفرن على درجة حرارة 200 درجة مئوية ، لحد ما الجلاش ياخد لون دهبي.

9- خرجي الجلاش من الفرن ورشي عليه مكسرات على الوش ، وصبي عليه الشربات ويكون بارد.

10- انقلي الجلاش على طبق وقطعيه للتقديم.

طريقة عمل كيكة الجلاش 2

مقالات متعلقه

طريقة عمل وصفة ليالي لبنان

طريقة عمل وصفة ليالي لبنان

طريقة عمل حلوى اللدو الهندية

طريقة عمل حلوى اللدو الهندية

طريقة عمل كيك الصفوف اللبنانية

طريقة عمل كيك الصفوف اللبنانية