اهم نصايح لنضافتك الشخصية لازم تعرفيها
العناية بالجسم وخصوصا العناية بالمناطق الحساسة من الحاجات المهمة جدا اللي لازم نعرفها ، والنهاردة من خلال موضوعنا هنشارك معاكم اهم نصايح لنضافتك الشخصية في المنطقة الحساسة ، كل البنات محتاجين يعرفوا النصايح دي ، لانها هتخلي حياتك اسهل وهتحافظ على صحتك من جوه ومن بره ، وهتحافظ على المنطقة الحساسة منعشة وريحتها حلوة..
نصايح لنضافتك الشخصية في المنطقة الحساسة:
في حاجة مهمة لازم تعرفيها ان انتي كبنت هيكون ليكي ريحة ، كل شخص ليه ريحة جسم طبيعية مختلفة ، ومش مطلوب انك تخلي المنطقة دي ريحتها معطرة ، ولكن المهم انك تحافظي على نضافتها عشان تفضل منتعشة وصحية وخالية من اي ريحة كريهة.
1- حافظي على المنطقة جافة ونضيفة:
اتأكدي ان منطقة المهبل تكون جافة على طول ، لان الرطوبة في المنطقة دي ممكن تزود من فرص نمو البكتيريا او الفطريات الضارة اللي ممكن تأدي للالتهابات او الافرازات المهبلية ، بالاضافة انها هتسبب ريحة كريهة في المنطقة ، وده هيأثر عليكي بشكل كامل ، عشان كده بننصحك دايما تحافظي على جفاف المنطقة دي.
وضروري جدا انك تتأكدي انك تنضفي المنطقة الحساسة من قدام لورا ، عشان ماتنقليش الجراثيم من فتحة الشرج للمنطقة اللي قدام.
2- الاطعمة اللي المفروض تاكليها واللي تتجنبيها:
النصيحة التانية هي الاطعمة اللي المفروض تاكليها واللي المفروض تتجنبيها ، واللي ماتقلش اهمية عن العناية الخارجية ، لان الاكل ممكن يأثر على ريحة المنطقة.
– الاطعمة اللي المفروض تاكليها:
الاناناس ، معروف ان الاناناس عنده قدرة على تغيير طريقة افراز الجسم للريحة ، بالاضافة ان العناصر والانزيمات الموجودة في الاناناس ، ممتازة جدا لبشرتك ، وبالتالي هتفيدك من الناحيتين ، وبديل تاني للاناناس هو التوت البري.
وحاجة تانية كمان انتي محتاجاها جدا وهي شرب كمية كبيرة من الماية ، لان جفاف الجسم ممكن يتسبب في تغيير الريحة والحالة العامة للجسم ، عشان كده لازم تتأكدي من انك ترطبي جسمك باستمرار بشرب كمية كافية من الماية يوميا.
– الاطعمة اللي المفروض تتجنبيها:
لو عايزة تمنعي الريحة الكريهة في المنطقة دي ، بننصحك انك تقللي من اكل اللحوم الحمرا, الفاصوليا, واللبن كامل الدسم.
3- اتجنبي الدش المهبلي (لو ماتمش وصفه طبيا):
كتير من النساء بيحسوا بنضافة اكتر لو عملوا غسيل مهبلي بعد الدورة الشهرية او العلاقة الزوجية ، ولكن مع ذلك ، الطريقة دي ممكن تأدي لزيادة الافرازات المهبلية ، بالاضافة ان الدش المهبلي بيقضي على البكتيريا الصحية اللي بتحمي المهبل من العدوى المهبلية.
4- اتجنبي غسول الجسم:
على قد ما بتحبي غسولات الجسم اللي ريحتها حلوة ومعطرة ، الا انه مش بننصحك تستخدميها جوه المنطقة الحساسة لانها ممكن تسبب خلل في توازن رقم الاس الهيدروجيني ، وده هيقى ليهتأثير عكسي على ريحة المنطقة ، وبننصحك انك ماتغسليش المنطقة الحساسة بأي غسول للجسم او اي منتج معطر ، افضل حاجة هو تنضيف المنطقة بماية دافية بلطف.
ولكن لو عايزة تغسلي المنطقة الحساسة بمنتج معين ، ممكن تستخدمي غسول Summer’s eve الغير معطر ، الغسول ده معمول مخصوص للمنطقة الحساسة من غير اي عطور عشان ما يأثرش عليها ، والغسول 5 في 1 لطيف وليه ريحة حلوة ولكن خفيفة ، وآمن جدا على المنطقة الحساسة ، بالاضافة انه مضاد للحساسية.
اغسلي المنطقة بطريقة لطيفة ، خدي من الغسول على ليفة ناعمة او في ايدك ورغيه ونضفي بيه المنطقة.
5- مايه فاترة – ماية باردة:
حاجة كمان مهمة لازم تاخدي بالك منها عند غسيل المنطقة الحساسة هو التأكد من استخدام درجة حرارة ماية مناسبة مع الصابون وجسمك.
المفروض الماية ماتكونش سخنة اوي ، اعتمدي على الماية الفاترة او الماية الباردة حوالين المهبل والمناطق الانثوية لان ده هيحافظ على توازن رقم الاس الهيدروجيني في المنطقة وهيمنع اي ريحة او افرازات مش طبيعية.
6- خلي دايما حاجات صحية في شنطتك:
وانتي بره البيت خلي دايما في شنطتك حاجات صحية ، اندر وير, فوطة صحية, مناديل مبللة ، عشان لو وانتي بره جاتلك الدورة الشهرية او حصل اي حاجة خلى المنطقة مبللة او غير مريحة ، تقدري تغيري فورا.
اختاري مناديل مبللة تكون ناعمة ولطيفة وخالية من الكحول والبارابين ، تكون معمولة مخصوص للمنطقة الحساسة.
7- تغيير ملابسك الداخلية كل يوم على الاقل:
بننصحك تغيير الملابس الداخلية مرة واحدة يوميا على الاقل ، واستبدال الملابس الداخلية تماما كل سنة ، عدم غسل الملابس الداخلية بشكل يومي ممكن يأدي لمشاكل صحية ، زي التهابات المسالك البولية والقروح.
8- اختيار ملابس داخلية تسمح للمنطقة بالتنفس:
لما تيجي تختاري الملابس الداخلية مهم جدا انك تستخدمي الاندر وير اللي يسمح بمرور الهوا لانه ده هيضمن ان المنطقة تفضل جافة ومنتعشة ، ومن افضل الخامات اللي ممكن تعتمدي عليها هي الملابس الداخلية القطن ، القطن بيمتص السوايل بسهولة وبيسمح للمنطقة تتنفس وده هيحافظ على المهبل جاف ومنتعش وريحتة حلوة.
نصيحة اضافية: حاولي انك تنامي من غير ملابس داخلية ، وخلي مهبلك يتنفس ، ويدخله هوا نقي ، ممكن تلبسي قميص نوم او بيجامة واسعة وتستغني عن لبس الاندر وير.
اعتمدي على ملابس داخلية صحية ، اختاري ملابس داخلية مريحة, مطاطية, جيدة التهوية, مافيهاش اي زخارف او دانتيل عان تمنعي الحكة.
9- اغسلي ملابسك الداخلية بشكل منفصل:
لما تيجي تغسلي الملابس الداخلية اغسليها بشكل منفصل عن الملابس العادية ، الملابس الداخلية هي اول طبقة بتلمس المناطق الحساسة عندك ، وبالتالي مش هتبقي عايزة يدخلها اي حاجة غريبة ، خصوصا لو انتي بتربي حيوان اليف وشعره بيكون لازق على هدومك العادية ، عشان كده لازم تغسلي الملابس الداخلية بشكل منفصل.
10- حطي في اعتبارك تستبدلي ملابسك الداخلية مرة كل 6 – 12 شهر:
ممكن تشوفي ان ده مبالغ فيه شوية ، لكن تجديد الملابس الداخلية عادة صحية لازم تعمليها لتجنب اي نوع من المشاكل الصحية ، لانه على الرغم من غسلها بعد استخدامها كل مرة ، الا انه الغسيل مش بيقتل كل البكتيريا اللي في الانسجة ، وبمرور الوقت البكتيريا المتراكمة ممكن تسبب افرازات زيادة او احساس مش مريح في المنطقة الحساسة.
وعلى الرغم من فترة 6 – 12 شهر دي مش فترة ثابتة في حد ذاتها ، الا انها طريقة مضمونة للحفاظ على صحة المنطقة الحساسة.
11- اغسلي ايديكي قبل وبعد الحمام:
كلنا متعودين اننا نغسل ايدينا بعد الحمام ، ولكن غسيلها قبل الحمام كمان مهم جدا ، لان انتي مش عارفة ايه الاوساخ او البكتيريا الموجودة على ايديكي اللي ممكن تنقليها لمنطقتك الحساسة وممكن تأدي لعدوى بكتيرية او فطرية في المنطقة ، عشان كده لازم تتأكدي من غسل ايديكي قبل الحمام.
وكمان اكيد انتي مش عايزة اي بكتيريا تتنقل من منطقتك الحساسة لوشك ، واللي ممكن تسبب ظهور البثور ، وبالتالي لازم تتأكدي من غسيل الايد كويس بعد الحمام.
12- خدي بروبيوتيك كل يوم:
نقص البروبيوتيك ممكن يأدي لعدم توازن نمو البكتيريا الزهرية ، وده هيخلي المهبل ريحتة كريهة ، وهيأدي لافرازات مهبلية مفرطة.
وللحصول على البروبيوتيك ، تقدري تحصلي عليه بشكل عام من نظامك الغذائي اليومي ، ومن الاكلات الغنية بالبروبيوتيك الزبادي, اللبن الرايب, مخلل الكرنب, مخلل الخيار, الحبوب الكاملة, الموز الاخضر, البصل, الثوم, فول الصويا, الخرشوف ، ممكن كمان تاخدي البروبيوتيك عن طريق المكملات ، لان الحفاظ على توازن الجسم هو المفتاح للحفاظ على انتعاش وريحة المنطقة الحساسة.
وبينصح بشكل خاص انك تاخدي مكملات البروبيوتيك لو بتاخدي مضادات حيوية معينة لتجنب مشكلة المبيضات المهبلي.