وصفة طبيعية للتخلص من انتفاخ البطن بسرعة
انتفاخ المعدة او البطن هو تجربة غير مريحة وبتسبب احراج لكتير من الاشخاص ، لانه بيكون مصاحب ليها اعراض زي الغازات, الم وتصلب البطن وغيرها من الاعراض المزعجة ، وعشان تعملي تفريغ للمعدة والحصول على راحة سريعة بشكل طبيعي ، النهاردة هنشارك معاكم وصفة طبيعية لعلاج انتفاخ البطن والحصول على بطن مسطحة بسرعة وبمكونات طبيعية من البيت.
اسباب انتفاخ البطن:
– الافراط في الاكل.
– الاكل بسرعة كبيرة.
– احتباس الماية في الجسم.
– الغازات المعوية.
– عسر الهضم.
– متلازمة القولون العصبي ، وبيتم فيها امتصاص السكريات المخمرة بشكل سيء في الامعاء الدقيقة وبتمر من خلال القناة المعوية وبتسبب الغازات.
– مرض الاضطرابات الهضمية او امراض الامعاء بشكل عام او الحالات الطبية.
– الامساك.
– الاطعمة الغنية بالصوديوم زي الملح المكرر والاطعمة المصنعة.
– الاطعمة الغنية والدسمة الخالية من الخضروات, النشويات, وغيرها من الاطعمة اللي بتحقق التوازن ، لان الدهون بتأخر عملية الهضم.
– حساسية الطعام.
– عدم تحمل بعض الاطعمة وحساسية المعدة منها.
– الضغط.
– التغيرات الهرمونية ، وده بيحصل غالبا مع متلازمة ما قبل الدورة الشهرية.
– بلع الهوا ، وده بيحصل عن طريق الشرب باستخدام الشاليمو, مضغ اللبان, المشروبات الغازية, الحلويات الصلبة.
– الاطعمة صعبة الهضم ، منها انواع معينة من الكربوهيدرات والسكريات اللي بيكون صعب على بعض الاشخاص هضمها.
– منتجات الالبان ، خصوصا منتجات الالبان غير المخمرة.
– زيادة اكل الالياف بشكل مفاجيء ، الالياف مفيدة للهضم ولكن كترها ممكن يكون ليه تأثير معاكس ، خصوصا لو انتي ماشية على نظام غذائي منخفض في الالياف وزودتيها فجأة.
– الحرقة ، وده ممكن يحصل بسبب الاطعمة الغنية بالتوابل.
– في بعض الحالات الناردة ممكن يكون انتفاخ البطن علامة على خزل المعدة (تأخر افراغ المعدة).
منع الانتفاخ:
لو معدتك بتميل للانتفاخ بسهولة ، ضيفي دعم هضمي لروتينك اليومي لمساعدة جهازك الهضمي.
– ممكن تشربي ماية بالليمون ، او ماية مع خل التفاح قبل الوجبة.
– خدي مكملات انزيم الجهاز الهضمي زي البيتين و ال HCL.
– عشبة المرارة الهضمية (اعشاب بتحفز الجهاز الهضمي وبتساعدة على الهضم).
اطعمة لتقليل الانتفاخ:
في بعض الاطعمة المضادة للانتفاخ.
– شوربة العضم.
– النعناع.
– الزنجبيل.
– الفلفل الحار (الشطة).
– الاطعمة الغنية بالبروبيوتيك زي الزبادي, المخلل.
– بذور الشمر.
– الفاكهة الاستوائية ، زي البابايا الغنية بالماية والالياف والباباين وهو انزيم هضمي بيساعد على الهضم ، الاناناس بيحتوي على نسبة عالية من الماية وعلى انزيم البروميلين اللي بيساعد على تكسير البروتينات, الموز والافوكادو من الاطعمة الغنية بالبوتاسيوم اللي بتساعد على تخفيف الانتفاخ الناتج عن الاطعمة المالحة.
– الفواكة الغنية بالماية ، الفاكهة الحمضية, البطيخ, الشمام كلها انواع فاكهة غنية بالماية بتساعد على ترطيب الجسم وتقليل الانتفاخ ، والشمام كمان بيحتوي على نسبة عالية من البوتاسيوم.
– الخضروات اللي بتحتوي على نسبة عالية من الماية ، زي الخيار والكوسة.
– البروتينات الخالية من الدهون ، ممكن يكون جسمك حساس للدهون العالية ، حتى الصحية منها ، وبالتالي لما بتاكليها بيحصلك انتفاخ.
– الحبوب الكاملة ، الحبوب الكاملة بتحتوي على النخالة ، وهي غنية بالالياف وتعتبر اضافة جيدة لنظامك الغذائي.
الاطعمة اللي المفروض تتجنبيها او تقللي منها لتجنب الانتفاخ:
كل شخص جسمه بيختلف عن التاني ، ولكن في اطعمة معينة معروفة انها بتسبب الانتفاخ عند كتير من الاشخاص ، عشان كده لازم تراقبي نفسك وتعرفي ايه انواع الاكل اللي بيحصلك انتفاخ بعد اكلها دايما عشان تتجنبيها، ومن اشهر الاطعمة اللي ممكن تسبب انتفاخ.
– المحليات الصناعية.
– منتجات الالبان غير المخمرة.
– براعم بروكسل, البروكلي, القرنبيط, الخضروات الصليبية بشكل عام.
– الخبز الابيض.
– الدقيق الابيض المكرر.
– الارز الابيض.
– المحليات الطبيعية.
– الوجبات الدسمة.
– الاطعمة المالحة.
عادات صحية لتجنب الانتفاخ:
– المشي.
– النوم الجيد.
– التنفس العميق.
– عدم الافراط في الاكل.
– شرب كمية كبيرة من الماية.
وصفة طبيعية لعلاج انتفاخ البطن:
ومهما كان سبب الانتفاخ اللي بتعاني منه من الاسباب اللي قولناها كلها ، الشاي اللي هنشوفة مع بعض هيعالج لك انتفاخ البطن وهيخلصك من كل الاعراض المزعجة المصاحبة ليه ، وبرغم ان فيه ادوية مش محتاجة وصفة طبية لعلاج الانتفاخ ولكن الاستخدام الطويل ليها ممكن يسبب لك مضاعفات مع الوقت ، اما الوصفات الطبيعية مالهاش اثار جانبية وفي نفس الوقت علاج فعال وقوي للمشكلة.
فوايد مكونات الوصفة:
– الشاي الاخضر:
الشاي الاخضر كان جزء من الطب الصيني والهندي التقليدي لقرون طويلة ، واظهرت الدراسات الحديثة ان ليه فوايد صحية كتير لانه بيحتوي على نسبة عالية من مضادات الاكسدة ، وفايدته لتفريغ المعدة والتخلص من انتفاخ البطن ، الشاي الاخضر يعتبر مدر طبيعي للبول ، وده بيساعد على التخلص من الماية الزيادة في الجسم ، بالاضافة ان الشاي الاخضر بيحسن عملية الهضم وبيقلل الغازات.
– الزنجبيل:
معروف عن الزنجبيل انه بيساعد على الهضم ومفيد في تقليل الانتفاخ ، وهو يعتبر من التوابل الطاردة للريح وده معناه ان الزنجبيل بيخفف الغازات ، بالاضافة انه مضادات للالتهابات ومريح للعضلات.
الانتفاخ بيحصل احيانا بسبب التوتر او التشنجات ، والزنجبيل بيساعد في علاج المشكلة دي ، لانه يعتبر مسكن طبيعي للالم ، وده معناه انه هيخفف من اي تقلصات او ازعاج مصاحب للانتفاخ.
– خل التفاح:
خل التفاح يعتبر حل طبيعي للجهاز الهضمي ، لانه بيوازن مستويات الاس الهيدروجيني في الامعاء ، خل التفاح بيساعد بشكل خاص على تكسير الدهون اللي ممكن تكون سبب محتمل للانتفاخ لان الدهون بتاخد وقت طويل في الهضم.
– الليمون:
عصير الليمون يعتبر من مدرات البول ، اللي بتساعد على تخفيف احتباس الماية ، وهو كمان ملين طبيعي بيساعد في الحفاظ على حركة الجهاز الهضمي وتخفيف سبب الانتفاخ لو كان مرتبط بالامساك.
– الماية:
الماية اللي في المشروب مفيدة في تقليل الانتفاخ ، لان الجفاف ممكن يكون عامل مسبب لاحتباس الماية او الامساك اللي بدورهم بيسببوا الانتفاخ ، وبالتالي الماية هتساعدك على التخلص من المشكلة.
طريقة عمل شاي لعلاج الانتفاخ:
المكونات:
– من 1 – 1 ¼ كوباية ماية.
– كيس شاي اخضر او 1 معلقة صغيرة شاي اخضر سايب.
– قطعة زنجبيل مفروم ، او ممكن تستخدمي 1 معلقة صغيرة من الزنجبيل البودر.
– ½ معلقة كبيرة من خل التفاح.
– 1 معلقة كبيرة عصير ليمون ، عصير ½ ليمونة تقريبا.
– 1 معلقة صغيرة عسل للتحلية (اختياري).
طريقة التحضير:
1- حطي الزنجبيل في كوباية وصبي عليه ماية مغلية ، سيبيه منقوع في الماية لمدة 10 دقايق.
2- بعدها ضيفي الشاي الاخضر للزنجبيل ، وسيبيهم منقوعين 3 دقايق كمان.
3- صفي المشروب ، وضيفي خل التفاح وعصير الليمون والعسل وقلبيهم مع بعض ، واشربيه.