اتعرفي على ايجابيات وسلبيات تركيب الرموش

ريهام محمود
ريهام محمود
في
مكياج
955

اكستنشن او وصلات الرموش هي رموش شبه دائمة بتكون متصلة بشعر رموشك الطبيعية ، وبقت من الحاجات التريندي جدا بقالها فترة ، ومعروف ان وصلات الرموش دي بتدوم تقريبا لكام اسبوع ، وهي واحدة من التقنيات الجمالية المنتشرة مؤخرا للمكياج الدائم زي مايكروبليندينج الحواجب, توريد الشفايف والخدود ، كلها تقنيات مش مؤلمة ومش محتاجة جراحة وبتوفر عليكي وقت المكياج اليومي ، ولكن نظرا لشعبيتها الكبيرة ، هل ايجابياتها وسلبياتها متوازنة وتستحق تتعمل فعلا ، تعالوا نتعرف مع بعض في السطور الجايه على ايجابيات وسلبيات تركيب الرموش.

ايجابيات وسلبيات تركيب الرموش:

طريقة تركيب وصلات الرموش:

قبل اي حاجة تعالوا نعرف الاول عملية تركيب وصلات الرموش دي بتم ازاي.

– اول خطوة هي تحديد نوع الرموش الانسب لاحتياجاتك ، وده بيتضمن اختيار نوع الياف الرموش ، ما بين الصناعية, الحرير, المنك الصناعي, الطول, ونوع انحناء او تجعد الرموش ، والقرار النهائي بيعتمد على افضل شكل هيبقى مناسب لملامحك ويبقى شكله اقرب لرموشك الطبيعية.

– بمجرد ما تختاري الشكل والطول المناسبين ، المتخصصة هتبدأ في تركيب وصلات الرموش باستخدام اداة صغيرة شبه الملقاط لتثبيت كل رمش بدقة ، وبيتم لصق الرموش الصناعية على طول رموشك الطبيعية ، رمش رمش ، والجلسة دي بتاخد وقت طويل فكوني مستعدة ليها.

– المرحلة الاخيرة ، المتخصصة بتبدأ تشوف لو في اماكن فيها فراغات عشان تركب فيها رموش ، بعدها بتسيبها لحد ما المادة اللي لزقت بيها الرموش تنشف تماما.

ايجابيات وسلبيات تركيب الرموش 1
ايجابيات وسلبيات تركيب الرموش 1

ايجابيات تركيب الرموش:

– هتسرع من روتين مكياجك:

مكياج الرموش هياخد منك تقريبا ما بين 10 – 20 دقيقة ، لو هتركبي رموش وتستخدمي معاها اداة تني الرموش والماسكارا ، وصلات الرموش هيوفر عليكي الوقت ده وهيسرع مكياجك اليومي بشكل كبير.

– ممكن تحل لك مشاكل العيون التانية:

وصلات الرموش هتدي وسع للعين وتبرزها وهتشتت الانتباه بعيد عن الهالات السودا واكياس تحت العين ، وده السبب ان في كتير من البنات بيعملوا وصلات الرموش عشان يشيلوا خطوة تنضيف مكياج العيون من روتين العناية بالبشرة الليلي تماما.

– هتقدري تختاري اللي يناسبك:

وصلات الرموش الميزة فيها انك هتقدري تختاري الطول, الحجم, الكثافة المناسبة ليكي ، او حتى تختاري بس اللي يحسن ويظهر شكل عينيكي ، وده بيخليها مناسبة لملامح وشك بالظبط.

– تجنب حوادث الماسكارا:

الماسكارا تقريبا من اكتر الحاجات اللي ممكن تبوظيها اثناء وضع مكياجك ، ممكن تنضيف تلطيخ الماسكارا حوالين العين والتكتلات تبوظ مكياجك حوالين منطقة العين ، والمشكلة دي هيتم تجنبها تماما بوصلات الرموش.

ايجابيات وسلبيات تركيب الرموش 2
ايجابيات وسلبيات تركيب الرموش 2

سلبيات تركيب الرموش:

– التكلفة:

على عكس كل تقنيات المكياج الدائم التانية ، وصلات الرموش بتكون تكلفتها عالية ، والتكلفة طبعا بتختلف حسب نوع الرموش اللي انتي اختارتيها واسعار المتخصصة اللي هتعملي عندها ، بالاضافة انك محتاجة تعملي صيانة ليها كل 2 – 3 اسابيع ، لانها ملتصقة برموشك الطبيعية ممكن تسبب تساقط الرموش.

– ممكن تأثر على رموشك الطبيعية:

في حين ان الاجراء نفسه آمن جدا ومافيش فيه اي خطورة ، الا ان بعض الخطوات الغلط ممكن تسبب الضرر لرموشك الطبيعية ، على سبيل المثال ، عادة الاماكن “الارخص” اللي بتعمل وصلات الرموش ، ممكن تركب لك رموش تم استخدامها قبل كده على خط رموشك الطبيعي ، وده بيدمر رموشك الطبيعية تماما.

– استخدام وصلات الرموش لفترة طويلة ممكن تأدي لتساقط الرموش بشكل دائم:

تركيب وصلات الرموش بشكل منتظم ممكن تأدي لتساقط الرموش بشكل دائم على المدى الطويل ، وده بيحصل احيانا لان تجمعات الرموش او حتى الرموش الفردية ، بتمنع وتعطل رموشك الطبيعية من عملية التجديد الداخلي.

– ممكن تسبب التهابات العين:

بغض النظر عن جودة ونضافة المكان اللي بتعملي فيه ، عمل وصلات الرموش بتحتاج استخدام ادوات بشكل قريب اوي من العين ، وممكن تحصل عدوى للعين خصوصا لو عيونك حساسة ، زي التهاب الملتحمة, او حتى الطفح الجلدي حوالين منطقة العين الناتج عن استخدام الغرا المستخدم للصق الرموش.

– ممكن تبقى مش مريحة بشكل كافي:

على الرغم من ان وصلات الرموش متصممة عشان تبقى وزنها خفيف على العين ، الا انها ممكن تبقى مش مريحة ، لان في النهاية انتي حطاها طول الوقت ، اثناء النوم, الاستحمام وفي كل مكان ، وده هيضايق بشكل خاص البنات اللي مش متعودين على الرموش الصناعية ، او اللي بيعانوا من حساسية مفرطة للعيون او جفاف العيون او بتميل للتهيج في كتير من الاوقات.

ايجابيات وسلبيات تركيب الرموش 3

حاجات حطيها في اعتبارك مع وصلات الرموش:

لو انتي اخدتي قرار تعملي وصلات رموش في حاجات لازم تحطيها في اعتبارك:

– تجنب الماية والبخار انها تلمس الرموش لمدة 48 ساعة بعد جلسة التركيب.

– لما تاخدي شاور هتضطري انك تنشفي وصلات الرموش المبلولة بالسيشوار ، اظبطي السيشوار على اقل سرعة وابرد درجة حرارة ، مع استخدام فرشة الرموش اثناء التجفيف.

– صيانة او تجديد وصلات الرموش ضرورية ، لانها بعد 2 – 3 اسابيع تقريبا هتظهر فيها تكتلات وهتترهل شوية ، بسبب دورة رموشك الطبيعية.

– عدم ازالة وصلات الرموش بنفسك ، والا انتي كده بتخاطري بفقدان رموشك الطبيعية اثناء ازالتهم.

– ضروري تعملي تحديث لروتين العناية بالبشرة والمكياج بتاعك للحفاظ على الرموش.

– يعتبر استخدام المنظفات اللي اساسها زيتي وكريمات العين المطرية مهم جدا.

– ممكن تسرعي عملية فك الترابط بين الرموش وتساقط الوصلات بشكل اسرع ، لو استخدمتي عليها ماسكارا لانها هتضيف وزن عليها وهتأدي لتكسرها.

– اخر حاجة لازم تكوني لطيفة في التعامل معاهم ، وده معناه عدم الاحتكاك ، يعني تنامي على اكياس مخدات حرير بس ، واستخدمي اكسسوارات العين زي النضارات او ماسك العين للنوم بحذر شديد.

ايجابيات وسلبيات تركيب الرموش 4

ازالة وصلات الرموش:

وصلات الرموش في النهاية بتقع لوحدها ، لكن لو ده محصلش يبقى المتخصصة هي اللي تشيلها ، ومش بننصحك بازالتها بنفسك ، وعادة اجراءات ازالة الوصلات بتبقى في خطوتين

– تطبيق غرا مزيل للرموش ، والانتظار لمدة 5 دقايق على الاقل.

– ازالة الرموش الفردية رمش رمش بأدوات معقمة ، مع التأكد ان الغرا المستخدم لازالة الرموش مش هيسبب تهيج لعينك ، وبننصحك تحطي اكتر من اختيار تحسبا.

ايجابيات وسلبيات تركيب الرموش 5

مقالات متعلقه

افكار مكياج بوهو مناسب للصيف

افكار مكياج بوهو مناسب للصيف

طريقة عمل زيت ملمع للجسم Shimmer Body Oil

طريقة عمل زيت ملمع للجسم Shimmer Body Oil

احصلي على تفتيح فوري ونضارة للبشرة بكريم البنجر

احصلي على تفتيح فوري ونضارة للبشرة بكريم البنجر