طريقة رسم الحواجب الريش feathered brows بالخطوات
مافيش شك ان الحواجب مهمة جدا لانها بتحدد شكل الوش كله ، لو رسمتيها بشكل صح ، ولو انتي مش بتحبي الحواجب الممتلئة اوي او اللي رسمتها حادة زيادة ، النهاردة هنشارك معاكي اتجاه الحواجب الريش ، وهي بتعتمد انها تدي حواجبك لوك طبيعي ، تعالوا نعرف مع بعض في السطور الجاية طريقة رسم الحواجب الريش بخطوات سهلة وبسيطة.
طريقة رسم الحواجب الريش:
الادوات اللي هتحتاجيها:
– قلم حواجب كريمي.
– فرشة حواجب.
– جل الحواجب.
الخطوات:
– الخطوة 1:
عشان اللوك ده يطلع بشكل مظبوط ، لازم تحافظي على الشكل الطبيعي لحواجبك وتحسنيها بس شوية عشان يبقى شكلها حلو ، اول حاجة ابدأي شيلي الشعر الزيادة اللي حوالين الحاجب ، واتأكدي من عدم المبالغة في نتف الحواجب.
– الخطوة 2:
بعد كده استخدمي قلم حواجب كريمي ، املي بيه فراغات الحواجب ، واختاري لون القلم يكون اقرب حاجة للون شعرك حواجبك.
– الخطوة 3:
بمجرد ما تملي حواجبك بشكل صح ، خدي فرشة الحواجب وسرحي حواجبك بالراحة لفوق عشان تعملي تأثير الريش ، كمان ده هيساعد انه يلقط اي منتج زيادة من على الحواجب ، ويدي حواجبك شكل حلو ومتحدد بشكل طبيعي.
– الخطوة 4:
عشان تكملي اللوك ، استخدمي كمية بسيطة من جل الحواجب الشفاف عشان تحافظي على شكل الحواجب ثابتة في مكانها طول اليوم.
وبالخطوات البسيطة دي يبقى خلصنا رسم الحواجب الريش من غير وقت ولا مجهود.
