التخلص من كريم الاساس الزيادة في 3 خطوات بسيطة

ريهام محمود
ريهام محمود
في
مكياج
475

اختيار درجة كريم الاساس المناسبة مش هي المشكلة الوحيدة اللي بتقابلنا ، ولكن محتاجة كمان تلاقي الملمس المناسب, وتحضير بشرتك كويس, واستخدام الكمية المناسبة من كريم الاساس عشان ماينتهيش الامر انه يكلكع ويشقق ويبقى شكله مش طبيعي ، واحنا شاركنا معاكم في موضوعات قبل كده عن طريقة اختيار كريم الاساس المناسب لكل نوع بشرة ، وتحضير البشرة قبل المكياج ، والنهاردة هنعرف مع بعض 3 خطوات للتخلص من كريم الاساس الزيادة.

خطوات للتخلص من كريم الاساس الزيادة:

– الخطوة 1: اضغطي بكف ايدك على بشرتك

واحدة من اسهل واسرع الطرق لازالة كريم الاساس الزيادة ، هي استخدام حرارة ايدك ، اغسلي ايدك كويس وسيبيها لما تنشف تماما ، ودلوقتي بحركات خفيفة وسلسلة ابدأي اضغطي بكف ايدك على بشرتك ، حرارة كف ايدك هتمتص كريم الاساس الزيادة ، واتأكدي انك ماتفركيش بشرتك لان ده مش بس هيزيل كريم الاساس ، لكن كمان مضر للبشرة.

خطوات للتخلص من كريم الاساس الزيادة 1
خطوات للتخلص من كريم الاساس الزيادة 1

– الخطوة 2: الضغط بمنديل ورق

الخطوة التانية هي استخدام منديل ورق ، لو حطيتي كريم اساس زيادة في مناطق معينة  ، اضغطي عليها بالراحة بمنديل ورق ، المنديل هيلقط كل كريم الاساس الزيادة من على بشرتك اللي ممكن يكون الضغط بالايد ماشلهاش ، مرة تانية بنأكد عليكي ماتفكريش البشرة لان ده هيبوظ كريم الاساس تماما ، وعشان توصلي للمناطق الصغيرة زي العينين ، لفي المنديل على صوباعك السبابة واضغطي بالراحة.

خطوات للتخلص من كريم الاساس الزيادة 2
خطوات للتخلص من كريم الاساس الزيادة 2

– الخطوة 3: استخدام اسفنجة مكياج رطبة

بعد ما اتخلصتي من المنتج الزيادة من على بشرتك بالخطوتين اللي فاتوا ، دلوقتي جت اخر خطوة وهي تنعيم كريم الاساس عشان يبقى كله متساوي على البشرة ، وللخطوة دي استخدمي اسفنجة مكياج او بيوتي بلندر رطبة ، واضغطي بالراحة على البشرة لتنعيم الخطوط من المناطق اللي شيلتي منها كريم الاساس الزيادة لدمجها بالتساوي مع باقي مكياجك.

خطوات للتخلص من كريم الاساس الزيادة 3

وبكده بال 3 خطوات البسيطة دي تبقي اتخلصتي من كريم الاساس الزيادة ، ومكياجك هيبقى شكله ناعم وطبيعي ومش هيحصل اي تكتلات او تشقق لكريم الاساس.

مقالات متعلقه

ازاي تحطي الروج الغامق زي المحترفين للوك مكياج مثالي

ازاي تحطي الروج الغامق زي المحترفين للوك مكياج مثالي

5 اوقات تستغني فيهم عن كريم الاساس وتستخدمي بداله BB كريم

5 اوقات تستغني فيهم عن كريم الاساس وتستخدمي بداله BB كريم

7 حيل مكياج محتاجة تعرفيهم هتحسن مكياجك

7 حيل مكياج محتاجة تعرفيهم هتحسن مكياجك