احدث تريندات المكياج في شتاء 2023
كل سنة بتظهر موضة جديدة في المكياج ، او موضة بالفعل موجودة وبتكمل معانا للسنة الجديدة ، وحتى كمان موضة المكياج القديمة في منها بيرجع تاني ، والنهاردة من خلال موضوعنا هنشارك معاكم احدث تريندات المكياج في شتاء 2023.
احدث تريندات المكياج في الشتا:
1- الشفايف اللامعة:
الشفايف المات استمرت متصدرة موضة المكياج لاكتر من سنة ولسه ما زالت ، ولكن معاها السنة دي الشفايف اللي بتلمع رجعت موضة تاني ، سواء شفايف بتلمع بألوان جريئة او شفايف لامعة طبيعية ، وتكملي اللوك كمان بأيشادو لامع بألوان محايدة ، ولان اللمعان بيكون شفاف فهو مناسب لكل انواع البشرة.
2- مونوجرامتيك جرافيك ايلاينر:
بخلاف الايلاينر الاسود التقليدي ، السنة الجديدة الموضة فيها الايلاينر بألوان جريئة ، بالاضافة لمطابقة لون الماسكارا مع لون الايلاينر.
3- الجلد اللامع:
عادة الشتا مرتبط بجفاف البشرة ، وبالتالي ده انسب موسم تضيفي لبشرتك شوية ترطيب زيادة ولمعة طبيعية صحية ، جربي اضافة زيت لروتين العناية ببشرتك ، ضيفي كام نقطة من زيت الوجه قبل المرطب او ممكن تمزجيها مع المرطب.
4- البلاشر:
البلاشر من الحاجات الاساسية في مكياج شتاء 2023 ، ووضعه بطرق مختلفة ، ياما على طول عضمة الخد, او بزاوية ناحية الصدغ, او على شكل حرف C من اول خط الشعر لحد اعلى نقطة في عضمة الخد, على تفاحة الخد, على جسر الانف ، والبلاشر يعتبر مثالي لموسم الشتا عشان يدي البشرة انتعاش ، ممكن تستخدمي البلاشر الكريمي لانه بيكون طبيعي اكتر وكمان مناسب لموسم الشتا ، وعشان تعمل مظهر طبيعي ممكن تحطي البلاشر الاول وبعدين تحطي فوقيه كريم الاساس ، الحركة دي هتديكي لوك وردي طبيعي ، وتقدري تحطيه بالفرشة او بصوابعك.
5- عيون جرافيك:
العيون الجرافيك من الحاجات الموضة بقالها فترة , ولسه مستمرة معانا بشكل قوي موسم الشتا ده كمان ، والسنة دي من الحاجات الموضة هي رسمة ايلاينر مزدوج بجناحين فوق بعض ، ولو الايلاينر السايل مش مناسب ليكي ممكن تجربي ترسمي الايلاينر باستخدام ايشادو كريمي عميق.
6- هولوجرافيك جليتر ايشادو:
الايشادو الهولوجرافيك اللامع كمان من تريندات مكياج الشتا للسنة الجديدة ، وافضل حاجة للوك ده هي استخدام ايشادو سائل لامع.
7- شفايف جريئة:
الشفايف الحمرا الكلاسيكية الجريئة من الحاجات الموضة لموسم الشتا للحصول على لوك مميز ، ولو عايزة تجربي لون محايد جريء ممكن تختاري اللون التوتي الغامق.
8- اكستريم كات ايز:
من الاتجاهات المستمرة معانا لموسم الشتا هي رسمة الكات ايز ، ولكن بنسخة اكتر جراءة من المظهر الكلاسيك لعيون القطة ، وهي بكيون فيها الجناح اطول شوية.
9- عيون محايدة بدرجات لون واحد:
من اللوك الموضة موسم الشتا ده ، هو الايشادو بألوان محايدة باستخدام درجات لون واحد بس ، ومهم انك تختاري الدرجات المناسبة ليكي ، بالنسبة للبشرة السمرا بشكل خاص ، انسب الوان ليها هي درجات البني الدافية ، وكملي اللوك بلون روج محايد نفس لون الايشادو او استخدام ملمع شفايف.
10- عيون متناقضة:
اتجاه تاني موضة لمكياج العيون ، وهو اختيار الوان ايشادو متناقضة لابراز العيون اكتر ، على سبيل المثال العيون بالألوان الباردة (الازرق, الاخضر, البندقي) هيبرزها استخدام ايشادو باللون النحاسي الدافي او الباذنجاني ، اما العيون البني هتظهر اكتر بايشادو اخضر او بنفسجي.