طريقة عمل صابونة طبيعية لازالة الشعر الزائد من الجسم
الشعر الزائد من اكتر الحاجات اللي بيعاني منها كل البنات ، ودايما في حالة بحث عن اسهل الطرق لازالة الشعر ، والنهاردة من خلال موضوعنا هنشارك معاكم طريقة عمل صابونة طبيعية لازالة الشعر الزائد بطريقة فعالة ، وبمكونات بسيطة.
طريقة عمل صابونة طبيعية لازالة الشعر الزائد:
الحاجات اللي هتحتاجيها:
– 2 معلقة كبيرة صابون جليسرين مبشور.
– 2 معلقة كبيرة كبريتات الباريوم “باريوم سلفات” (هتلاقوها متوفرة في محلات بيع المواد الكيميائية).
– 2 معلقة كبيرة جليسرين.
– 1 كبسولة فيتامين E.
– كوباية بلاستيك خفيفة.
طريقة التحضير:
1- اول حاجة في حلة على النار حطي ماية لما تغلي حطي فيها حلة اصغر فيها الصابون المبشور ودوبيه على حمام ماية سخنة.
2- قلبي الصابون لحد ما يدوب ، وبمجرد ما يدوب تماما ، ضيفي الجلسرين وكبريتات الباريوم.
3- قلبي المكونات مع بعض لمدة دقايق لحد ما تمتزج كويس.
4- ارفعي المكونات من على النار ، وصبيها في الكوباية البلاستيك.
5- سيبي الخليط طول الليل لحد ما يتماسك ، وبعدها طلعيه من الكوباية ، وكده الصابونة جاهزة للاستخدام.
طريقة الاستخدام:
اولا وقبل اي حاجة اعملي اختبار حساسية على جزء صغيرة من البشرة ، لو محصلش اي رد فعل كده تقدري تستخدمي الصابونة بكل امان.
1- بلي المكان اللي عايزة تشيلي منه الشعر بالماية ، افركي عليه الصابونة.
2- سيبيها على الجلد لمدة 2 – 3 دقايق ، بعدها باستخدام فوطة مبلولة امسحي الجلد عكس اتجاه نمو الشعر.
3- هتلاقي الشعر اتشال معاكي بكل سهولة ومن غير الم.
نصايح عند استخدام الصابونة:
– ماتخليش الصابونة على البشرة لفترة طويلة اوي اكتر من اللي المدة اللي احنا قولناها عشان ماتسببش حساسية.
– تقدري تستخدمي الصابونة على اي مكان في الجسم او حتى الوش ولكن بعيد عن منطقة العيون ، ولكن الوش بشكل خاص ممكن يكون حساس اكتر فلو بشرتك حساسة اوي اتجنبي استخدامها عليه.
– ولو بعد ما حطيتي الصابونة على البشرة حسيتي بأي رد فعل تحسسي اغسليها فورا بماية باردة.