افضل 3 وجبات فطار عالية السعرات الحرارية لزيادة الوزن

ريهام محمود
ريهام محمود
3674

لما الموضوع يكون متعلق بزيادة الوزن ، وجبة الفطار هي افضل وقت للحصول على كمية كبيرة من السعرات الحرارية في وجبة واحدة ، والنهاردة من خلال موضوعنا هنشارك معاكم افضل 3 وجبات فطار عالية السعرات الحرارية لزيادة الوزن.

افضل وجبات فطار عالية السعرات الحرارية لزيادة الوزن:

زي ما قولنا وجبة الفطار هي انسب وقت تاكلي فيه وجبة كبيرة فيها سعرات حرارية عالية ، على سبيل المثال لو اكلتي وجبة فطار اكتر من 500 سعرة حرارية ، وجيتي في الغدا او العشا اكلتي وجبة اصغر مش هيبقى في مشكلة لانك بالفعل هتكوني اكلتي وجبة كبيرة على الفطار.

والنهاردة هنقولك على 3 وجبات فطار هتديكي 500 سعر حراري او اكتر.

1- الشوفان مع الفراولة والموز:

المكونات:

– 1 كوباية شوفان.

– 2 كوباية لبن.

– 1 موزة كبيرة متقطعة شرايح.

– 6 حبات فراولة متوسطة متقطعة شرايح.

– 1 معلقة كبيرة من زبدة الفول السوداني.

– 1 معلقة كبيرة سكر او عسل.

– قرفة حسب الرغبة.

طريقة التحضير:

1- في حلة صغيرة ضيفي الشوفان مع اللبن واطبخيهم مع بعض على نار خفيفة لمتوسطة مع التحريك المستمر.

2- سيبيهم على النار لمدة 10 دقايق او لحد ما الشوفان يبقى قوام كريمي وكثيف ، اخلطي معاه السكر او العسل.

3- صبي الخليط الشوفان في طبق وضيفي له شرايح الموز والفراولة، وفوقيهم زبدة الفول السوداني ، وممكن لو حابه تضيفي شوية قرفة مطحونة.

4- ممكن كل يوم تغيري في الطعم وتستبدلي الموز والفراولة بأي فاكهة تانية متوفرة عندك او بتفضليها.

وجبات فطار عالية السعرات الحرارية
وجبات فطار عالية السعرات الحرارية

2- ساندوتش بيض مع تركي بيكون:

الوصفة دي هتدي جسمك تقريبا 505 سعر حراري ، وممكن تاكلي معاها فاكهة لزيادة كمية السعرات الحرارية.

المكونات:

– 2 شريحة توست محمص.

– 1 بيضة كبيرة.

– 3 شرايح تركي بيكون وممكن تستبدليه بتركي مدخن او بيف بيكون (حسب المتوفر).

– 1 شريحة جبنة شيدر.

– 1 شريحة طماطم.

– ملح وفلفل اسود حسب الرغبة.

طريقة التحضير:

1- في طاسه ضد الالتصاق حطي زيت او زبدة وسخنيه على حرارة متوسطة لعالية ، ضيفي التركي وقلبيه لحد ما يبقى هش ، طلعيه في طبق على جنب.

2- زودي شوية زيت او زبدة تاني واقلي البيضة لمدة 3 دقايق او لحد ما تتماسك ، وتبيلها بالملح والفلفل الاسود.

3- هاتي شريحة التوست حطي عليها الطماطم والجبنة والتركي والبيض ، وحطي فوقيهم شريحة التوست التانية.

وجبات فطار عالية السعرات الحرارية 2

3- فرنش توست مع صوص التوت:

المكونات:

–  4 شرايح توست.

– زبدة.

– خليط بيض متكون من (4 بيضات, كوباية لبن, 1 معلقة كبيرة فانيليا, 1 معلقة كبيرة قرفة مطحونة).

– صوص التوت متكون من (2 كوباية توت او فراولة او الاتنين مع بعض, 2 معلقة كبيرة عصير ليمون, 1/3 كوباية سكر),

طريقة التحضير:

1- في طبق اخفقي البيض مع اللبن والفانيليا والقرفة.

2- سخني الزبدة في طاسة على نار متوسطة لعالية.

3- اغمسي شرايح التوست في خليط البيض واتأكدي انك تغطي الجانبين بالخليط ، حمريه في الزبدة لمدة 2 – 3 دقايق لحد ما الحروف بتاعته تبقى بني ومقرمشة اقلبيه على الجنب التاني ، واتأكدي انك تحمري الجانبين بالتساوي ، وبعدها ارفعيه من على النار في طبق على جنب.

4- حضري صوص التوت ، في طاسة على نار خفيفة اخلطي امزجي التوت مع السكر وعصير الليمون ، وقلبيهم مع هرس التوت اثناء التقليب لحد ما يبقى عندك صوص سميك.

5- افردي الصوص على شرايح التوست من الجانبين ، ممكن تضيفي عسل او كريمة مخفوقة عشان تزودي الحلى بتاعها او تاكليها كده زي ما هي من غير اضافات تانية.

وجبات فطار عالية السعرات الحرارية 3

مقالات متعلقه

اطعمة لزيادة الوزن للاطفال بشكل صحي

اطعمة لزيادة الوزن للاطفال بشكل صحي

10 وجبات خفيفة سهلة هتساعدك على زيادة الوزن بشكل صحي

10 وجبات خفيفة سهلة هتساعدك على زيادة الوزن بشكل صحي

طرق لزيادة الوزن بسرعة وبشكل صحي

طرق لزيادة الوزن بسرعة وبشكل صحي