روتين جمالي سريع لو معندكيش وقت للعناية الكافية ببشرتك
كلنا بيمر علينا وقت ممكن نكون كسلانين او مافيش وقت كفاية للعناية ببشرتنا ، وبنبقى عايزين روتين سريع وبسيط وفي نفس الوقت نحافظ على نضارة بشرتنا ، والنهاردة من خلال موضوعنا هنتعرف على روتين جمالي سريع مش محتاج منك وقت ولا مجهود.
روتين جمالي سريع:
1- نامي عدد ساعات كفاية:
البشرة بتحتاج نوم كفاية عشان تتجدد من ارهاق طول اليوم ، اتأكدي انك مترهقيش جسمك وبشرتك بعدد ساعات قليلة وتنامي 4 ساعات بس مثلا ، قلة النوم معاناها هالات سودا, اكياس تحت العين, بشرة شاحبة وغيرها من المشاكل ، وده معناه انك هتقضي وقت اطول في اصلاحها باستخدام منتجات تجميل كتير ، وعشان توفري على نفسك وقتك ومجهود وفلوسك نامي كويس مش اقل من 8 ساعات يوميا.
2- اشربي ماية بانتظام:
الماية هي صديقة بشرتك ، والتقليل منها هيبقى ضد بشرتك ، شرب حوالي 2 – 2.5 لتر يوميا هيساعدك على التخلص من السموم والحفاظ على رطوبة بشرتك ، الجرعة الصحيحة من الترطيب هتحافظ على نضارة وصحة البشرة.
3- التنضيف والتقشير:
لو مش عايزة تقضي وقت طويل في العناية ببشرتك الصبح ، اعتمدي على غسول يكون مطهر ومقشر في نفس الوقت ، عشان ينضف البشرة وفي نفس الوقت يزيل الاوساخ والدهون الزيادة وخلايا الجلد الميتة ويزود من معدل دوران الخلايا ويرطب البشرة.
4- استخدمي سيروم متعدد الاستخدامات:
التفتيح والترطيب والحماية من اشعة الشمس تقدري تحصلي عليهم كلهم من منتج واحد وهو السيروم ، ممكن تعتمدي على سيروم فيتامين سي كجرعة تجميلية مثالية بعد تنضيف البشرة ، هيجدد بشرتك بسبب مضادات الاكسدة الموجودة فيه, وهيفتح البشرة, ويخلصك من البهتان وهيخلي البشرة في النهاية متجددة ونضرة.
5- مكياج الكل في واحد:
عشان تختصري منتجات المكياج الكتير وتوفري في الوقت ، ممكن تعتمدي على منتج يكون بودرة وكريم اساس وبرايمر مع بعض زي بودرة لاكمي ، فيها البرايمر اللي هيوحد لون بشرتك وهيخفي الخطوط الرفيعة ، وككريم اساس للتغطية ، وكبودرة للمسة نهائية مات وتثبيت المكياج لفترة طويلة.
6- روج بألوان جريئة:
الروج الجريء بألوان مشرقة ممكن يرفع مستوى اللوك بتاعك بشكل فوري ، وهيبين مكياجك بشكل حلو وكأنك قضيتي ساعات في المكياج مش مجرد 30 ثانية لوضع الروج ، ممكن تعتمدي على اللون الاحمر المات.
7- ديل حصان فوضوي:
تسريحة الشعر اللي ممكن تطلعي بيها بلوك انيق من غير ما تقضي فيها وقت كتير هي ديل الحصان الفوضوي ، اقسمي شعرك نصين النص اللي فوق سرحيه بالمشط بالعكس عشان تديه حجم اكبر وبعدها لميه ديل حصان ، والجزء اللي تحت ارفعيه على الجزء اللي فوق واربطيهم مع بعض ، ورشي سبراي مثبت.
