ازاي تعملي ديتوكس للاظافر للحفاظ عليها صحية
اكيد كلنا بنبقى عايزين ضوافر صحية وقوية وشكلها حلو ، وعشان ده يتحقق زي البشرة والجسم بالظبط الضوافر كمان محتاجة تتخلص من السموم من وقت للتاني ، لو لقتيها ضوافرك متقشرة وضعيفة وبتتكسر ، في الحالة دي فهي محتاجة ضروري بعض العناية ، والنهاردة من خلال موضوعنا هنشارك معاكم طريقة ديتوكس الاظافر للحفاظ عليها صحية.
طريقة ديتوكس الاظافر:
1- ازالة المانيكير:
اول خطوة لازالة السموم من الضوافر هي انك تتخلصي من المانيكير القديم المتشقق باستخدام مزيل مانيكير لطيف ، يكون غني بالفيتامينات ، عشان مايسببش جفاف الضوافر ، وماتحاوليش انك تقشري المانيكير ابدا لانه بيدمر الطبقة السطحية لضوافرك.
2- رطبي الجلد اللي حوالين الضوافر:
مفتاح الاظافر الصحية هي العناية الجيدة بالجلد اللي حوالين الضوافر ، والحفاظ عليه نضيف ومترطب ، ممكن تستخدمي للمهمة دي زيت جوز الهند او الفازلين ، وحاولي انك تحافظي على ترطيب الجلد اللي حوالين الضوافر كل كام ساعة لمنع جفافه.. ممكن تشوفي هنا طرق لعمل كريم مرطب للجلد اللي حوالين الضوافر.
3- احمي ضوافرك وايديكي:
اثناء مرحلة التخلص من السموم ، قللي الضغط على ضوافرك قدر الامكان ، اثناء شغل البيت والاعمال المنزلية زي غسل الاطباق او التنضيف ، البسي جوانتي ، وقصي ضوافرك لان ده هيخليكي تاخدي جهد اقل للحفاظ على نضافتها.
4- وضع المانيكير بالطريقة الصح:
بعد اسبوع او 10 ايام من التخلص من السموم ، تقدري ساعتها انك تحطي مانيكير تاني بلونك المفضل ، ولكن اتأكدي انك تستخدمي طبقة اساسية قبل المانيكير وطبقة نهائية فوق المانيكير عشان تضمني ان المانيكير بتاعك يدوم فترة اطول وكمان تحمي ضوافرك انها ممكن تتحول للون الاصفر.
