طريقة عمل سان سيباستيان تشيز كيك
سان سيباستيان تشيز كيك هي طريقة تشيز كيك اسبانية تقليدية ، خفيفة جدا وكريمي وناعمة ، وسهلة التحضير ومن اسهل طرق التشيز كيك اللي ممكن تعمليها ، تعالوا نشوف مع بعض الطريقة بالخطوات والفيديو.
سان سيباستيان تشيز كيك:
هتحتاجي صينية بمقاس تقريبا 9 بوصات متبطنة بورق زبدة.
المقادير:
– 1 كيلو جبنة كريمي كاملة الدسم.
– 2 كوباية سكر.
– 5 بيضات بدرجة حرارة الغرفة.
– 1 معلقة صغيرة فانيليا.
– بشر قشر ½ ليمونة (اختياري).
– 5 معلقة كبيرة دقيق.
– 1 كوباية كريمة خفق ثقيلة في درجة حرارة الغرفة (سايلة).
طريقة التحضير:
1- سخني الفرن على درجة حرارة 220 درجة مئوية ، ودخلي الصينية في الفرن.
2- في طبق كبير ضيفي الجبنة الكريمي واضربيها كويس بمضرب يدوي لحد ما تبقى كريمي وناعمة.
3- ضيفي على الجبنة السكر بالتدريج كوباية واخلطي كويس وبعين ضيفي الكوباية التانية واخلطي لحد ما السكر يدوب ويمتزج كويس مع الجبنة.
4- ضيفي البيض بالتدريج بيضة بيضة واخلطيهم كويس بعد كل بيضة.
5- ضيفي قشر الليمون لو هتستخدميه والفانيليا واخلطيهم كويس.
6- انخلي الدقيق في منخل صغير وضيفيه للخليط ، واخلطي المزيج كله بالراحة.
7- ضيفي كريمة الخفق واخلطيها كويس لحد ما تمتزج مع الخليط.
8- صبي الخليط في الصينية واخبطيها في الرخامة بالراحة عشان تساويها وميبقاش فيها اي فقاعات.
9- دخلي الصينية في الفرن واخبزيها لمدة 35 دقيقة لحد ما التشيز كيك ترتفع من الحروف وتبقى نازلة من النص شوية ، والحروف هيبقى لونها بني شوية ، عشان كده الافضل انك تقلبي الصينية وهي الفرن في نص الوقت عشان تاخد لون متساوي.
10- خرجي الصينية من الفرن وسيبي التشيز كيك تبرد تماما لدرجة حرارة الغرفة ، بعدها دخليها التلاجة تبرد لمدة ساعتين او طول الليل.
11- بعدها ممكن تقطعيها لشرايح وتقدميها مع بعض التوت او الفراولة الطازة او تاكليها لوحدها.