9 حاجات هتحصل لجسمك لو مارستي تمرين تحية الشمس كل يوم

ريهام محمود
ريهام محمود
في
صحة
1650

تمرين تحية الشمس من تمارين اليوجا المفيدة جدا للجسم واللي تقدري تعمليها في البيت بسهولة من غير اي معدات رياضية ، وممكن تعديله لاي مستوى او عمر ، والنهاردة من خلال موضوعنا هنتعرف مع بعض على فوايد تمرين تحية الشمس وازاي تعمليه.

فوايد تمرين تحية الشمس:

1- بيحرق اكتر من 400 سعرة حرارية في 30 دقيقة:

تمرين تحية الشمس هو عبارة عن 12 حركة او جولة ، وكل جولة فيهم بتحرق حوالي 14 سعرة حرارية ، لو عملتيها بسرعة ، والتمرين كله بياخد تقريبا 30 دقيقة ، لو اخدتي دقيقة لكل جولة وعملتي 30 مرة في 30 دقيقة هتحرقي حوالي 417 سعرة حرارية.

اكيد العدد ده والسرعة هيحتاج وقت وممارسة ، ولو انتي لسه مبتدئة ابدأي ببطء وزودي بالتدريج ، والميزة الحلوة هنا ان حتى ممارسة التمرين ببطء ليه نفس الفوايد الصحية.

فوايد تمرين تحية الشمس 1
فوايد تمرين تحية الشمس 1

2- تمرين للجسم كله ، بيضيف قوة ومرونة للعضلات:

تمرين تحية الشمس تقدري تعمليه بسرعة او ببطء ، لو عملتيه بسرعة في الحالة دي بيتحول لتمرين كارديو مع شدة معتدلة ، ويعتبر افضل من المشي ولكن اقل شدة من الجري ، واثناء التمرين بيستخدم كل مجموعات العضلات الرئيسية في الجسم وبيساعد في تناسق الجسم وفقدان الوزن ، وشد العضلات وتقوية المفاصل.

فوايد تمرين تحية الشمس 2
فوايد تمرين تحية الشمس 2

3- بينظم عملية التمثيل الغذائي والهضم:

بعض اوضاع تمرين تحية الشمس اللي هنشوفها مع بعض في المقال بتاعنا ، بتضغط وتمدد اعضاء الجسم الهضمية ، لو عملتيها الصبح على معدة فاضية هتخلص جسمك من السموم وهتساعد على تحسين الهضم بشكل عام.

بالاضافة لتحسين الهضم لو مارستيه بانتظام ، ممكن انه يحسن عملية التمثيل الغذائي ، ولو بتاكلي بشكل صحي مع عمل التمرين بشكل منتظم ، ده ممكن يساعد كمان على انقاص الوزن وامتصاص العناصر الغذائية في الجسم بشكل افضل.

فوايد تمرين تحية الشمس 3
فوايد تمرين تحية الشمس 3

4- بيساعد على تحسين وظائف الغدة الدرقية وهرمونات الجسم:

الدراسات اثبتت ان الممارسة المنتظمة لتمرين تحية الشمس ممكن انه يساعد على توازن مستويات الغدة الدرقية في الجسم ، لان واحد من الاوضاع في التمرين بيضغط ويمدد الغدة الدرقية ، ممكن كمان انه يساعد على تنظيم مستويات الانسولين في الجسم عند مرضى السكر من النوع التاني ، وتنظيم كل هرمونات الجسم ، والمساعدة كمان على تنظيم الدورة الشهرية.

فوايد تمرين تحية الشمس 4
فوايد تمرين تحية الشمس 4

5- مفيد لصحة القلب والاوعية الدموية:

اظهرت الدراسات ان ممارسة تمرين تحية الشمس بانتظام ممكن انه يحسن مستويات الكوليسترول ، واظهرت دراسة تانية ان ممارسة التمرين على السرعة المتوسطة ، بيحسن من وظائف القلب والاوعية الدموية.

فوايد تمرين تحية الشمس 5

6- تقدري تعمليه في اي عمر ، وبأشكال سهلة او صعبة:

تحية الشمس من التمارين اللي تقدري تعدلي فيها حسب العمر ، ممكن يتم تعديلها عشان تبقى اسهل لكبار السن ، او للاشخاص اللي بيعانوا من اصابات ومشاكل في الحركة.

فوايد تمرين تحية الشمس 6

7- الممارسة المنتظمة بتحسن المناعة:

حركات اليوجا تعتبر مفيدة لاي شخص عايز يحسن مناعته ، الممارسة المنتظمة لتمرين تحية الشمس بيحسن الصحة ووظائف الجسم ، وده بدوره هيحسن المناعة.

فوايد تمرين تحية الشمس 7

8- بيساعد على النوم بشكل افضل وعلى التوازن العقلي:

اظهرت الدراسات ان الوضع ده وهو وضع الانقلاب بيدفع الدم للراس ، وده بيساعد على تحسين النوم وتقوية حدة العقل.

فوايد تمرين تحية الشمس 8

9- بيحسن الصحة العامة وبيزود من مستويات الطاقة:

تمرين تحية الشمس بيضيف لكل جانب من جوانب حياتك ، لانه بيحسن الصحة العقلية والبدنية ، واظهرت الدراسات انه بيقلل التوتر والضغط ، لان التمرين هو تحية لمصدر كل طاقة على الارض وهي الشمس ، فده هيخليكي اكتر نشاط وتوازن.

فوايد تمرين تحية الشمس 9

طريقة تمرين تحية الشمس:

التمرين بيتضمن 12 خطوة زي ما هو باين في الصورة اللي قدامنا ، مع التحرك من الشمال لليمين.

1- وضع Pranamasana: اقفي بشكل مستقيم مع تباعد القدمين شوية ، حطي ايديكي الاتنين قصاد بعض ناحية الصدر ، احني راسك وخدي شهيق وزفير بهدوء.

2- وضع Hastauttasana: ابدأي بشهيق عميق وارفعي ايدك فوق راسك ، مع التأكد ان الاذنين يكونوا في النص بين الذراعين ، اتني جسمك لورا واشفطي بطنك ، اثبتي على الوضع ده لمدة 10 – 15 ثانية.

3- وضع Padahastasana: خرجي زفير وانحني لقدام لتمدد عمودك الفقري ، المسي صوابع رجليكي ، ولو تقدري تنزلي اكتر لتحت وتحطي كف ايدك على الارض ، مع الحفاظ على الركبتين مفرودين ، روحي لابعد مسافة ممكنة من غير ما تتني ركبتك.

4- وضع Ashwasanchalasana: استنشقي وافردي رجلك الشمال لورا ، مع الحفاظ على ايديكي على الارض ، واتني الركبة اليمين ، وحافظي على استقامتك من اول منطقة الخصر لحد فوق ، المفروض تكون الركبة اليمين بين الذراعين ، وبصي لفوق على قد ما تقدري ، خرجي زفير وانتي باصه بعينيكي لفوق ناحية الشمس.

5- وضع Kumbhakasana: استنشقي وحركي رجلك اليمين لورا مع رفع ركبتك الشمال بحيث تكون موازية لليمين ، مع الحفاظ على صوابع القدمين على الارض ، اخفضي الوركين والعمود الفقري مع الحفاظ على ايديكي مسطحة على الارض ، جسمك هيشكل شكل لوح خشبي موازي للارض والذراعين مفرودين مع الزفير.

6- وضع Ashtanga Namaskar: استنشقي واتني الركبتين على الارض مع تني الكوعين ، خرجي الزفير وخلي صدرك يلمس الارض مع الدقن ، واشفطي المعدة وعضلات البطن وثبتيها لتجنب ملامسة الارض.

7- وضع Bhujangasana: استنشقي واتحركي لقدام وارفعي جسمك من اول العمرد الفقري وانتي سانده على الذراعين ، حافظي على الجزء السفلي من الجسم في خط مستقيم مع الحوض والقدمين مسطحين على الارض ، وافتكري انك ما تتنيش الكتفين.

8- وضع Parvatasana: خرجي الزفيري وارفعي جسمك من الوركين ، خلي القدمين بشكل مستقيم على الارض ، مع الحفاظ على الركبتين مفرودين ، لازم وانتي بتعملي الحركة تحسسي بتمدد العمود الفقري ، وانتي باصه لتحت وعاملة شكل قمة جبل بجسمك ، مع الحفاظ على الوركين فوق.

9- وضع Ashwasanchalsana: استنشقي وارجعي للوضع رقم 4 ولكن مع تني الرجل الشمال ، يعني الرجل الشمال تبقى متنية قدام واليمين مفرودة ورا ، يعني عكس الوضع في الحركة رقم 4.

10- وضع Padahastasana: خرجي الزفير مع تحريك رجلك اليمين لقدام خطوة ، افردي الساقين مع تني الجسم لقدام ، وكف ايدك على الارض ، او تلمسي صوابع رجلك.

11- وضع Hastauttasana: كرري نفس الوضع التاني ، بفرد الجسم والعمود الفقري ، ورفع الذراعين فوق راسك مع وضع الاذنين بينهم , انحني لورا واثبتي على الوضع لمدة 10 – 15 ثانية.

12- وضع Pranamasana: ارجعي لاول وضع ، خرجي زفير والجسم والعمود الفقري مفرودين ، وحطي ايديكي الاتنين قصاد بعض ناحية الصدر.

تمرين تحية الشمس
تمرين تحية الشمس

طريقة التمرين بالفيديو:

هل مارستي تمرين تحية الشمس قبل كده؟ ايه تجربتك مع اليوجا ، وايه التغيرات اللي حسيتيها في حياتك وصحتك؟

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن