6 وصفات سهلة وصحية بالشوفان
لو بتدوري على وجبة فطار صحية ، مافيش انسب من الشوفان كوجبة فطار سهلة وصحية ، والنهاردة من خلال موضوعنا هنشارك معاكم 6 وصفات بالشوفان سهلة التحضير لوجبة الفطار.
وصفات بالشوفان:
الوصفات اللي هنعرفها مع بعض ، بتتعمل بتحضير الشوفان من بالليل بنقع الشوفان في اللبن وبعض النكهات ، خلال فترة الليل الشوفان بيمتص السوائل وبيبقى قوامه سميك ، وبالتالي بيفقد النكهة “النية” اللي بتكون فيه من غير ما يتطبخ على النار ، وبتاكليه كوجبة فطار شهية ومشبعة.
الشوفان غني بالالياف, البروتين, مضادات الاكسدة, ومجموعة كبيرة من الفيتامينات ، بالاضافة ان الشوفان المنقوع طول الليل بيكون هضمه اسهل ، وده بيخليه مثالي لاي شخص بيعاني من حساسية في المعدة.
وتقدري تعملي الوصفات بأي نوع شوفان تفضليه.
وصفات الشوفان بالنكهات:
قبل ما نعرف الوصفات اللي بالنكهات ، هنشوف وصفة الشوفان الاساسية.
وصفة الشوفان الاساسية البسيطة:
المقادير:
– ½ كوباية شوفان.
– 1 معلقة كبيرة من بذور الشيا.
– 2 معلقة صغيرة عسل.
– 2/3 كوباية لبن.
طريقة التحضير:
اخلطي كل المكونات مع بعض ، وسيبيهم لمدة ساعتين على الاقل ، والافضل طول الليل.
1- وصفة الشوفان بالشوكولاتة وزبدة الفول السوداني:
المقادير:
– ½ كوباية شوفان.
– 1 معلقة كبيرة من بذور الشيا.
– 2 معلقة صغيرة عسل.
– 2 معلقة صغيرة كاكاو بودر.
– 1 معلقة كبيرة من زبدة الفول السوداني.
– 2/3 كوباية حليب لوز او لبن عادي.
– للتزيين: شوكليت شيبس, زبدة فول سوداني.
طريقة التحضير:
في طبق كبير او برطمان ضيفي الشوفان, بذور الشيا, العسل, الكاكاو, زبدة الفول السوداني, اللبن ، وقلبيهم مع بعض كويس ، دخليه التلاجة طول الليل ، ولو لقتيه سميك اوي لما تيجي تاكليه ممكن تزودي له شوية لبن ، وضيفي على الوش الشوكليت شيبس وزبدة الفول السوداني.
2- الشوفان بالكوسة والشوكليت شيبس:
المقادير:
– ½ كوباية شوفان.
– 1 معلقة كبيرة من زبدة الشيا.
– 2 معلقة صغيرة عسل.
– ¼ كوباية كوسة مبشورة.
– 2 معلقة كبيرة شوكليت شيبس.
– ½ كوباية لبن.
– للتزيين: كوسة مبشورة, شوكليت شيبس, زبدة فول السوداني اوزبدة لوز.
طريقة التحضير:
بنفس الطريقة اللي فاتت اخلطي كل المكونات مع بعض ، ودخليه التلاجة طول الليل.
لو انتي مش من محبين الطعم الحلو والحادق مع بعض ممكن تستغني على الشوكليت شيبس في الوصفة وتكتفي بنكهة الكوسة.
3- الشوفان بالفراولة:
المقادير:
– ½ كوباية شوفان.
– 1 معلقة كبيرة من بذور الشيا.
– 1 معلقة كبيرة عسل.
– ½ كوباية فراولة, متقطعة شرايح.
– ½ معلقة صغيرة فانيليا سائلة.
– 2 معلقة كبيرة زبادي.
– ½ كوباية لبن.
– للتزيين: زبادي, مربى فراولة, فراولة متقطعة شرايح.
طريقة التحضير:
اخلطي كل المكونات مع بعض ، ودخليه التلاجة طول الليل.
4- الشوفان بالخوخ:
المقادير:
– ½ كوباية شوفان.
– 1 معلقة كبيرة من بذور الشيا.
– 1 معلقة كبيرة عسل.
– ½ حبة خوخ, مفرومة.
– ½ معلقة صغيرة قرفة.
– ¼ معلقة صغيرة فانيليا سائلة.
– 2/3 كوباية لبن.
– للتزيين: زبادي, خوخ متقطع مكعبات, قرفة, عسل.
طريقة التحضير:
اخلطي كل المكونات مع بعض ، ودخليه التلاجة طول الليل.
5- الشوفان بالموز:
المقادير:
– ½ كوباية شوفان.
– 1 معلقة كبيرة من بذور الشيا.
– 2 معلقة صغيرة عسل.
– ¼ موزة, مهروسة.
– 2 معلقة كبيرة جوز مفروم.
– ¼ معلقة صغيرة قرفة.
– 2/3 كوباية لبن.
– للتزيين: موز متقطع شرايح (حوالي ¼ موزة), جوز مفروم, زبدة فول سوداني.
طريقة التحضير:
اخلطي كل المكونات مع بعض ، ودخليه التلاجة طول الليل.
6- الشوفان بزبدة اللوز:
المقادير:
– ½ كوباية شوفان.
– 1 معلقة كبيرة من بذور الشيا.
– 2 معلقة صغيرة عسل.
– 1 معلقة كبيرة بروتين بودر.
– 1 معلقة كبيرة زبدة لوز ، ولو مش متوفرة ممكن تستبدليها بزبدة فول سوداني.
– ¼ معلقة صغيرة قرفة (اختياري).
– 2/3 كوباية لبن.
– للتزيين: زبدة لوز, جرانولا, بذور الشيا.
طريقة التحضير:
اخلطي كل المكونات مع بعض ، دخليه التلاجة طول الليل.