6 طرق تلبسي بيهم الجينز في الصيف
مجرد التفكير في لبس الجينز في الصيف ممكن يحسسك بالحر ، وممكن يكون كتير مننا بيستبعد لبس القطع الجينز خلال فترة الصيف بسبب سمك القماش بتاعه ، لو انتي من الاشخاص اللي مش بيعرفوا يلبسوا الجينز في الصيف وبيستبعدوه من دولابهم ، النهاردة هنشارك معاكم 6 طرق للبس الجينز في الصيف.
طرق للبس الجينز في الصيف:
1- الطبقات:
ممكن تختاري الفيست الجينز تنسقيه فوق فستان صيفي خفيف ، للحصول على لوك صيفي كاجوال سهل.
2- الفستان الجينز:
ممكن تختاري الفستان الجينز ، ولكن دوري على الفساتين الجينز اللي خامتها اخف نسبيا (اللي اسمها القماش الشامبراي) بحيث انه يبقى خفيف ومريح زي اي ملابس صيفي تانية ، ممكن كمان تلبسي القمصان الشامبراي فوق الفستان وتربطيه.
3- السالوبيت الجينز:
ممكن كمان تختاري سالوبيت جينز فضفاض ، والموديل ال Silhouette من انسب الموديلات للصيف لانه بيكون واسع وده هيضمنلك انك ماتحسيش بالحر.
4- البنطلون الجينز:
لو البنطلون الجينز قطعة اساسية في دولابك ، ومع ذلك مش بتحبي تلبسيه في الصيف وبيبقى مش مريح بالنسبة لك ، اختاري الموديلات الواسعة منه زي ال Flared, wide-legged, culottes.
5- اختاري الجينز الابيض:
كلنا عارفين القاعدة الذهبية للملابس الصيفي ، وهي اختيار الالوان الفاتحة عشان تمتص حرارة اقل وتخليكي تحسي بالانتعاش ، امشي على القاعدة دي واختاري الجينز الابيض ونسقيه مع قميص جينز ، اختاري معاه البلوزات والقمصان الواسعة.
6- اختاري الجيبات الواسعة:
ممكن كمان تختاري الجيبات الجينز ، وتنسقي معاها بلوزة بيضا واسعة او قميص خفيف للوك صيفي مريح.
