طريقة عمل تشيز برجر باستا One- pot Cheeseburger Pasta
لعشاق المكرونة والجبنة ، النهاردة جمعنالكم الاتنين في وصفة واحدة وهي تشيز برجر باستا ، اكلة سريعة وسهلة ومش هتاخد منك وقت ولا مجهود ، وطعمها لذيذ جدا ، تنفع كوجبة غدا او عشا سريعة ، تعالوا نشوف الطريقة مع بعض بالخطوات والفيديو.
تشيز برجر باستا:
المقادير:
– الكمية دي تكفي تقريبا 6 افراد.
– 455 جرام لحمة مفرومة.
– 1 كوباية بصل (150 جرام), متقطع مكعبات.
– 1 معلقة كبيرة ثوم مفروم.
– 1 معلقة صغيرة ملح.
– ½ معلقة صغيرة فلفل اسود.
– 2 معلقة كبيرة ورستشير صوص.
– 2 معلقة كبيرة صلصة طماطم.
– 1 حبة طماطم, متقطعة مكعبات.
– 4 كوبايات شوربة لحمة.
– 455 جرام مكرونة اقلام او حلزونية.
– 3 كوبايات جبنة شيدر (300 جرام), مبشورة.
– ½ كوباية لبن (اختياري).
– بصل اخضر متقطع شرايح, او بقدونس مفروم ، للتزيين.
طريقة التحضير:
1- في حلة كبيرة على نار متوسطة, ضيفي معلقة زيت, اللحمة المفرومة, البصل, الثوم, الملح, الفلفل, الورستشير صوص, صلصة الطماطم, والطماطم المتقطعة ، قلبي كل المكونات مع بعض كويس لحد ما اللحمة تتحول للون البني ، حوالي 6 – 7 دقايق.
2- ضيفي شوربة اللحمة ومعاهم كوباية ماية وقلبيهم على نار هادية.
3- ضيفي المكرونة وقلبي المكونات مع بعض ، وغطيها وسيبيها لمدة 20 دقيقة او لحد ما المكرونة تستوي وتشرب الشوربة ، مع التقليب من وقت للتاني.
4- ضيفي الجبنة واللبن (اختياري) لو عايزة تكون المكرونة غنية وفيها دسامة اكتر ، وقلبي الجبنة لحد ما تسيح مع المكرونة.
5- قدمي المكرونة ، وزينيها بالبصل الاخضر المتقطع او البقدونس المفروم ، وممكن ترشي على الوش شوية جبنة مبشورة.
