10 حيل نفسية ناجحة وفعالة ، وازاي تعمليهم
العقل جزء قوي جدا ، ولكن في نفس الوقت سهل التأثير عليه ، لو فهمتي شوية من علم النفس ، في حيل نفسية ناجحة وفعالة تقدري تعمليها هتساعدك على تحقيق التأثير المطلوب ، ممكن الحيل دي تساعدك على تحسين مهارات الاقناع عندك, تحسين تصورات اللي حواليكي عنك, تحسن تعاملك في اي موقف ، تعالوا نشوف مع بعض في السطور الجاية بعض الحيل النفسية الفعالة والناجحة ، وازاي تعمليها.
حيل نفسية ناجحة وفعالة:
1- تخلي شخص يحبك اكتر (او يكرهك بشكل اقل):
لو عندك احساس ان في شخص ما بتقضي معاه وقت طويل او بتتعاملي معاه دايما بيكرهك ، في الشغل, الجامعة , او في اي مكان ، في طريقة لعكس ده ، كل اللي هتعمليه انك تطلبي منه خدمة صغيرة.
بالظبط زي ما قولنا الحيلة انك تطلبي من حاجة صغيرة جدا جدا ، ولازم يكون حاجة مالهاش معنى اصلا انه هو يرفضه او يقول “لا” عليه ، على سبيل المثال ، اطلبي انك تستلفي منه قلم رصاص او قلم جاف ، من الحاجات التانية الصغيرة اللي ممكن تطلبيها:
– انه يناولك حاجة قريبة منه هو.
– تستلفي منه اي حاجة صغيرة وتافهة.
– اسأليه عن الوقت او التاريخ.
ليه الحيلة دي بتشتغل كويس وفعالة ، الموضوع ببساطة على الرغم ان الشخص ده مش بيحبك ، الا انه هيوصله انه يقول “لا” على حاجة صغيرة اوي او تافهة هتخليه شخص مش كويس او صورته وحشة ، بالاضافة ان معظم الناس صعب عليهم يرفضوا عمل الخدمات الصغيرة بشكل عام.
من وقت للتاني اطلبي خدمة من الخدمات الصغيرة دي ، لكن مش كتير او زيادة عن اللزوم ، العقل الباطن بتاع الشخص ده هيخليه يدرك انه لو كان بيساعدك حتى لو في حاجات صغيرة ، ده معناه انك مش شخص وحش اوي للدرجة دي عشان يكرهك ، ده هيساعدهم في التفكير بطريقة ايجابية اكتر عنك.
2- اتخلصي من الاغاني اللي بتتعاد في عقلك بشكل مستمر:
بيحصل مع كتير مننا ان ممكن نسمع اغنية وتفضل معلقة في دماغنا بشكل مستمر ومش بنعرف نخلص منها ، واللحن المتكرر ده ممكن يكون مزعج جدا ، وبغض النظر عن اي حاجة بتعمليها ، الا انك مش بتعرفي تتخلصي منه.
وفي كتير من الاوقات لما ده بيحصل ، انتي مش بتبقي فاكرة الاغنية كلها ، ولكن بتسمعي بس نفس السطر او الجملة بشكل متكرر بطريقة مزعجة ، والمشكلة دي علميا اسمها “دودة الاذن” وهي في الواقع ليها حل بسيط وفعال.
كل اللي هتعمليه طبقي تأثير Zeigarnik على الاغنية المعلقة معاكي ، ببساطة التأثير النفسي ده بيوضح ان الدماغ البشري بيحتفظ بمعلومات عن حاجات مش كاملة لفترة طويلة ، ولكن بيميل لنسيانها بمجرد ما تكمل.
وعشان تعملي الحيلة دي ، كل اللي هتعمليه انك تشغلي الاغنية المعلقة في مخك كاملة وتسمعيها كلها للاخر ، بمجرد انتهاء الاغنية ، في فرصة كبيرة جدا ان عقلك يسيب اللحن ده في النهاية لان هيبقى بالنسبة له المهمة كملت خلاص.
3- اكتشفي مين بيراقبك:
هل سألتي نفسك في يوم هل في شخص بيراقبك؟ في بعض الاحيان ممكن تفكري ان في شخص بيراقبك ولكن مش بتقدري تتأكدي من ده ، وبعد كل حاجة ، انتي مش هتعيشي على افتراضات ، وفي نفس الوقت انك تسألي الشخص اللي انتي شاكة فيه بشكل مباشر هيكون محرج جدا ليكي وللشخص المقصود ، لكن في حل واحد بسيط للمشكلة دي.
– كل اللي هتعمليه انك تتاوبي بشكل واضح اللي حواليكي.
– ولو مش حاسة انك عايزة تتاوبي زيفي الموضوع.
– واتأكدي ان الشخص اللي انتي عايزة تختبريه يقدر يشوفك بسهولة.
– لو بيراقبك هتلاقيه هو كمان اتاوب بعد فترة قصيرة جدا منك.
ازاي الحيلة دي بتشتغل بالشكل ده؟ في الاساس التثاؤب معدي ، لو شوفتي شخص بيتاوب ، هتحسي انك انتي كمان عايز تتاوبي ، بكل بساطة تقدري تجربيها على نفسك افتحي فيديو فيه شخص بيتاوب وشوفي ايه اللي هيحصل ، هتلاقي نفسك حتى لو مش عايزة تتاوبي هتبقي عايزة تعملي ده لا اراديا ، دي واحدة من الحيل النفسية اللي فعلا فعالة جدا لدرجة ان مجرد قرايه كلمة “تثاؤب” في بعض الاوقات هتخليكي تتاوبي!.
4- اكسبي في لعبة “حجرة, ورقة, مقص”:
في بعض الاوقات ممكن الاشخاص يستخدموا لعبة “حجرة, ورقة, مقص” عشان يختاروا من اللي يقوم بمهمة معينة ، او كجزء من رهان بين مجموعة اشخاص ، تقدري تكسبي اللعبة دي بسهولة بحيلة نفسية بسيطة.
قبل ما تبدأو اللعبة ، الهي الاشخاص اللي معاكي بانك تسأليهم سؤال ، ممكن يبقى سؤال عشوائي تماما ، او حاجة متعلقة باللي انتوا بتعملوه ، ولكن كل ما السؤال كان مربك اكتر هيكون افضل.
واثناء ما الاشخاص اللي معاكي لسه بيفكروا في اجابة السؤال وعقلهم مشغول ، ابدأي اللعبة بسرعة وقولي “حجرة, ورقة, مقص” ، في الوقت ده في فرصة كبيرة ان الشخص اللي قدامك ممكن يبقى مرتبك او في حالة دفاعية ، وفي الحالتين في فرصة جيدة ان الشخص ده يختار “المقص” تلقائيا ، لكن اتأكدي بس ان انتي تختاري “حجرة”.
5- خلي الشخص اللي قدامك يوافق على اللي انتي عايزاه:
لو بتسألي شخص ما على اللي هو عايزة ويختار ما بين حاجتين على سبيل المثال أ) انه يعمل حاجة معينة, او ب) انه ميعملش حاجة معينة ، انتي بالاسلوب ده بتديه طريقة سهلة للخروج من الموقف ، عشان كده بدل ما تعملي ده ، استخدمي حيلة نفسية بسيطة هتخليهم يختاروا اللي انتي عايزاه.
على سبيل المثال ، لو عايزة شخص يتبرع عشان حاجة معينة ، ما تسأليهوش اذا كان عايز يتبرع ولا لا ، بدل كده ، اسأليه لو عايز يتبرع بمبلغ مثلا 50 جنية او 100 جنية ، يعني اي اختيار هيخليه يدفع في النهاية ، ولكن هيختار بس ما بين المبلغ الاقل او الاكتر.
لو عايزة تخلي شخص يعمل اعمال منزلية ، متسأليهوش اذا كان عايز يعمل ولا لا ، ولكن اسأليه هو بيفضل غسل الاطباق ولا تنضيف الارض ، يعني خيريه بين المهام.
مثال تاني لو عايزة تقنعي ولادك ياكلوا خضار ، متسأليهمش هما عايزين ياكلوا خضار ولا لا ، بدل كده ، اسأليهم عايزين مغرفة واحدة ولا اتنين من الخضار ، بالطريقة دي هيكون اختيارهم ما بين الكمية الاكتر والاقل بس ، لكن في النهاية هياكلوا الخضار.
بالطريقة دي في الاسئلة انتي هتحطي في دماغ اللي قدامك الاختيار اللي انتي عايزاه ، وهيبقوا اكتر سعادة وهما بيعملوا حاجة بالنسبة لهم هما مش حابينها وهيبقى عندهم تفكير ايجابي اكتر اتجاه اي حاجة.
6- اتجنبي الخلاف:
الخلاف هو جزء من حياتنا ، خصوصا لو بتقضي وقت دايما مع اشخاص معينين ، فاكيد العلاقة بينكم هيبقى فيها خلافات وهتبقى ما بين اوقات حلوة واوقات لا ، ولكن لو عايزة تتجنبي الخلاف اللي ممكن يحصل ، خصوصا في مكان الشغل ، تقدري تتجنبي ده بالحيلة النفسية دي.
لو بتحضري اجتماع او اي نوع من التجمعات وموجود اشخاص مهمين بالنسبة لك ، وقلقانة انهم يبقوا عدوانيين او يحصل خلاف بينكم ، اختاري كرسي جنب الشخص ده على طول.
ممكن تفكري من الوهلة الاولى ان ده هيعمل نتايج عكسية ، لكن الحقيقة انها فعالة ، لانه من الاسهل ان الشخص ممكن يغضب او يتعصب اتجاه شخص بعيد عنه ، لكن لما تقعدي جنب الشخص على طول ممكن يلاقي صعوبة انه يتجادل معاكي ، ومش هيحس ناحيتك بنفس الغضب.
والافضل كمان انك توجهي جسمك ناحية الشخص ده ، وبالتالي واجهيه وانتي قاعدة ، واعملي معاه محادثة قصيرة او ابدأي اي كلام غير رسمي قبل بداية الاجتماع بشكل رسمي ، الحيلة دي هتمنع الشخص انه يتجادل معاكي ، وهتخليه يفكر بشكل ايجابي ناحيتك.
7- الحصول على معلومات من شخص كتوم:
كلنا تقريبا نعرف اشخاص كتومين ومش بيقولوا كل الحاجات اللي احنا حابين نعرفها عنهم ، ممكن يكونوا الاشخاص دول عندهم صعوبة في الانفتاح مع الاشخاص اللي حواليهم ، او هما غامضين وبيميلوا لحجب معلومات عنهم ، او يكونوا قلقانين انهم يظهروا بشكل سلبي ، او بكل بساطة هما مش بيحبوا يدوا الا معلومات بسيطة عن نفسهم.
وبغض النظر عن سبب قلة المعلومات عن الشخص ، في طريقتين للتغلب على المشكلة دي ، لما تيجي تتكلمي مع الشخص ده ، قولي السؤال اللي عايزة تسألية ، لو ماردش بالطريقة اللي انتي عايزاها ، ما تستسلميش, وماتحاوليش تسألي تاني.
بدل كده ، اسكتي تماما ، وحافظي على الاتصال بالعين ده مهم جدا وخليكي هادية ، بعد ثواني ، الشخص اللي قدامك هيحس انه مجبر على الرد اكتر او التوضيح ، لان انتي واضح عليكي انك مستنية او متوقعة معلومات اكتر.
ممكن يكون توتر الموقف بالنسبة للشخص ده مش مريح في اللحظة دي ، وممكن يحس انه مضايق وانه مجبر يرد على عكس رغبته ، ويمكن الطريقة دي مش الاختيار الافضل دايما ، ولكن عشات تكسري الاسرار وتعرفي اكتر ، فالحيلة النفسية دي ليها نتايج ايجابية جدا.
8- حية نفسية عشان تسيبي بصمة او الناس تفتكرك:
عايزة تبقي ظاهرة في الزحمة او بين عدد كبير؟ او رايحة مقابلة وهتكوني ضمن اشخاص كتير او هتعملي اختبار اداء لاي حاجة؟ وهدفك انك تسيبي بصمة وماتتنسيش قدر الامكان؟ الحيلة هي انك تتأكدي ياما تروحي الاول او في الاخر.
النظرية ورا الحيلة دي ليها علاقة بتأثير اسمه الموضع التسلسلي ، بشكل اساسي ، في الغالب الاشخاص بيفتكروا الاشخاص اللي بيجوا الاول او الاخر في القايمة.
اما في النص الحاجات او الاشخاص بتتنسي بسرعة ، خصوصا لو مافيهاش حاجة علقت في الذهن.
واكيد مش دايما هتعرفي ترتبيها انك تكوني دايما في الاول او في الاخر في حاجة معينة ، ولكن اعملي كده لو قدرتي ، وكمان حاولي تعملي تأثير ايجابي في المكان ، في الحالة دي اكيد هتسيبي بصمة وهيفتكروكي اكتر من اي شخص تاني.
وبالمناسبة ، الحيلة دي تنطبق كمان على المقابلات العاطفية مع شخص ، لو عايزة الشخص يفضل فاكرك بعد ما يسيبك ، اختاري المقابلة تكون ياما في بداية اليوم او نهايتة ، وفوتي مواعيد الغدا ، ممكن كمان تسيبي انطباع قوي خلال بداية المقابلة, وفي النهاية مباشرة.
9- اقنعي الناس بالموافقة:
لو بتقولي فكرة معينة وعايزة اللي حواليكي يتفقوا مع رأيك ، في خدعة نفسية سهلة فعالة ممكن تعمليها ، الموضوع كله بيقتصر على الايماء او تحريك الراس.
لما تتكلمي عن الموضوع اللي انتي عايزة اللي حواليكي يتفقوا معاكي فيه ، هزي راسك اثناء كلامك وحافظي على تواصل بصري معتدل مع اللي قدامك ، ده بيخلي اللي بتقوليه انه يظهر حقيقة مؤكدة.
ده بيلهم اللي حواليكي بالثقة وبيميلوا للرد بطريقة ايجابية اكتر على اللي بتقوليه ، الايماء او تحريك الراس تأثيره قوي جدا ، بصرف النظر عن اقناع اللي حواليكي يتفقوا معاكي ، الدراسات اظهرت انك تقدري حتى تقنعي عقلك لو بتهزي راسك اثناء حديث شخص تاني قدامك ، وده سبب يأكد ان تحريك الراس ليه تأثير فعال في اقناع الاشخاص ، الاشخاص بيميلوا انهم يقلدوا بعض ، فلو حد عكس ايماءاتك ، فهو بكده بيقنع نفسه انه متفق معاكي.
10- المرور من مكان زحمة:
لو عايزة تمري في مكان زحمة من بين ناس كتير ، استخدمي الحيلة دي ، امشي مع الهدف بتاعك من خلال تجنب الاتصال بالعين مع اي شخص تاني ، بدل ما تبصي لهم ، خلي عينيكي مركزة بقوة على المكان اللي عايزة توصلي له ، او الاتجاه اللي انتي رايحة له.
الحيلة دي بتنجح لان الناس غالبا بيبصوا لعيون اللي حواليهم من غير وعي عشان يحددوا الاتجاه اللي ماشيين فيه ، والطريقة دي هي اللي بتجنب الناس الاصطدامات او يخبطوا اللي حواليهم بشكل طبيعي في معظم الاوقات.
عشان كده بدل ما تلزقي عينيكي في موبايلك وتمشي مش مركزة لطريقك ، استمري في المشي ناحية هدفك وخلي عينيكي ثابتة عليه ، واكيد مش هنضمن ان كل الناس هتبعد عن طريقك ، لان ممكن الاشخاص يبقوا مش منتبهين او تركيزهم متشتت بسبب الموبايل او انهم بيتكلموا مع شخص تاني ومش ملاحظين ، ولكن الاكيد ان ده هيساعدك على الوصول للمكان اللي انتي عايزة تروحي له بشكل اسرع واسهل.
في النهاية العقل البشري بيشتغل بطرق غامضة جدا ، والعقل ذكي وسريع ومثير للاعجاب ، ولكن في نفس الوقت ، ممكن خداع العقل ، فليه ماتستفديش من ده؟ من خلال ممارسة الحيل النفسية الناجحة والفعالة دي ، هتقدري تأثري بمهارة على اللي حواليكي ، بس افتكري انك تعمليها باعتدال ، وخليكي حقيقية وصادقة.
