عصاير الخضروات لزيادة الوزن
زيادة الوزن بيساوي زيادة السعرات الحرارية اللي بتدخل جسمك خلال اليوم ، وفي طرق كتير تقدري تعملي بيها ده ، ممكن تختاري طرق صحية او طرق غير صحية ، الموضوع في النهاية بيرجعلك ، ولكن الصح هو اتباع الطرق الصحية اللي بتشمل نظام غذائي صحي متوازن, اكل الاطعمة اللي بتدي الجسم سعرات حرارية اكتر زي الموز, عصاير الفاكهة, عصاير الخضروات ، كل الحاجات دي ممكن تساعدك ان جسمك يدخله سعرات حرارية اكتر ، وكتير من الاشخاص ممكن تفكر في عصاير الفاكهة بس كوسيلة لزيادة الوزن ولكن الحقيقة ان في كتير من عصاير الخضروات اللي ممكن تساعدك في تحقيق نفس الهدف ، والنهاردة من خلال موضوعنا هنتعرف مع بعض على بعض عصاير الخضروات لزيادة الوزن ، ولكن اكيد مش لوحدها ضروري تمشي معاها على نظام غذائي صحي ، في النهاية اكيد هتوصلي لزيادة الوزن اللي انتي عايزاها.
عصاير الخضروات لزيادة الوزن:
1- عصير الجزر لزيادة الوزن:
الجزر من الخضروات الجذرية الموسمية ، الجزر مصدر جيد للفيتامينات, المعادن, البيتا كاروتين, البوتاسيوم والمواد الكيميائية النباتية ، وبالتالي هيكون مفيد انك تدخليه في نظامك الغذائي اليومي.
عشان تحصلي على الجزر على شكل عصير ، هاتي من 3 – 4 حبة جزر وكمية صغيرة من الفلفل الاسود, الملح, و1 معلقة كريمة, وكمية صغيرة من السكر ، ممكن كمان تضيفي بعض قطع البنجر والطماطم لو عايزة طعم افضل ، حطي كل المكونات دي في العصارة ، ولو مش متوفر عصارة اضربيها في الخلاط وصفيها ، عصير الجزر هيساعد على زيادة الوزن على المدى الطويل ، لو شربتيه يوميا.
2- عصير البنجر لزيادة الوزن:
البنجر يعتبر من اكتر الخضروات المغذية ، والبنجر بيساعد على نمو خلايا الدم الجديدة مع كتلة العضلات ، البنجر بيحتوي على كمية كبيرة من الحديد, البوتاسيوم, المنجنيز, حمض الفوليك, وفيتامين C.
عشان تحضري عصير البنجر ، كل اللي هتعمليه هاتي البنجر اغسليه كويس وقطعيه قطع صغيرة وضيفي له قطع صغيرة من جذور الزنجبيل ، واعصريهم مع بعض ، صبي العصير في كوباية وضيفي له كام نقطة من عصير الليمون وكمية صغيرة من الملح حسب الذوق اللي بتفضليه ، ولو ماحبتيش طعمه ، ممكن تضيفي له قطع من 2 – 3 قطع من الطماطم او الخيار ، العصير ده هيضيف لك من 70 – 80 سعرة حرارية اضافية لنظامك الغذائي اليومي.
3- عصير الطماطم لزيادة الوزن:
ممكن تكوني سمعتي واحنا بالفعل نزلنا قبل كده ان عصير الطماطم ممكن يساعد على انقاص الوزن ، ولكن لازم تعرفي انه ممكن يساعدك كمان في زيادة الوزن ، الطماطم بتحتوي على كمية كبيرة من البروتينات, المعادن, الالياف الغذائية, والفيتامينات ، الطماطم تعتبر مصدر غني بالالياف وبتحتوي على نوعين من الالياف ، واحد منهم الياف قابلة للذوبان والتاني غير قابل للذوبان ، الالياف القابلة للذوبان بتساعد على انقاص الوزن ، اما الالياف غير القابلة للذوبان بتساعد على زيادة الوزن ، الالياف غير القابلة للذوبان بتخلي امتصاصها صعب عن طريق الالتصاق مع الدهون الموجودة في الجسم.
عشان تعملي عصير الطماطم محتاجة من 2 – 3 حبة طماطم مع كمية صغيرة من الفلفل الاسود, وشوية صغيرين ملح, و 1 معلقة سكر, و 1 معلقة كريمة ، حطي كل المكونات مع بعض في العصارة واعصريهم كويس.
اشربي العصير ده في خلال ساعتين بس من عصره ، الطريقة دي هتساعدك على زيادة الوزن ، عصير الطماطم هيضيف لك من 40 – 50 سعرة حرارية لعدد السعرات الحرارية اليومية.
4- عصير القرع لزيادة الوزن:
القرع كمان واحد من الخضروات اللي ممكن يساعدك على زيادة الوزن ، القرع مصدر غني بفيتامين A, وبيتا كاروتين, ومضادات الاكسدة المختلفة ، وبيحتوي كمان على كمية جيدة من النشا ، هيضيف لك ( 40 – 50 سعرة حرارية) لنظامك الغذائي.
لما تيجي تختاري القرع اختاري واحدة تكون ملمسها ناعم ووزنها تقيل بالنسبة لحجمها ، اغسليه وقطعيه نصين وطلعي البذور بتاعته ، قشريه ، وقطعيه لقطع تناسب حجم العصارة بتاعتك ، حطي القطع في العصارة وضيفي لها السكر, الملح, قرفة مطحونة, قطع قليلة من الزنجبيل الفريش, وضيفي كمان كمية قليلة جدا من الماية ، وشغلي العصارة واعصري المكونات كلها مع بعض كويس ، صبي العصير في كوباية واشربيه ، ممكن تضيفي له بعض اوراق النعناع للنكهة ، وماتصفيش العصير اشربيه على طول لان القلب بتاعه بيحتوي على كمية جيدة من الالياف.
زي ما قولنا في البداية مع عصاير الخضروات دي امشي على نظام غذائي متوازن لزيادة الوزن بشكل صحي ، كمان تقدري تدخلي في روتينك اليومي مع العصاير والنظام الغذائي تمارين اليوجا الخاصة بزيادة الوزن ، هتوصلي لنتيجة مرضية في النهاية.
