طريقة عمل وصفة ميني تشيز كيك سهلة
لو انتي من عشاق التشيز كيك ، النهاردة هنقولكم طريقة سهلة لعمل التشيز كيك وهي وصفة ميني تشيز كيك ، الميزة في الطريقة دي ان كل واحدة تشيز كيك تقدري تضيفي لها نكهات صوص مختلفة وتنوعي ما بين صوص الفراولة, الكراميل ، وغيرها حسب ما تفضلي ، تعالوا نشوف في السطور الجاية الطريقة بالخطوات والفيديو.
وصفة ميني تشيز كيك:
للوصفة دي هتحتاجي ياما صينية كب كيك او صينية مافن او قوالب منفصلة ، اي حاجة متوفرة عندك بحجم صغير.
المقادير:
مقادير طبقة البسكويت:
– 1 ½ كوباية بسكويت مطحون.
– 3 معالق كبيرة سكر.
– 4 معالق كبيرة زبدة غير مملحة سايحة.
مقادير طبقة الجبنة:
– 455 جرام جبنة كريمي بدرجة حرارة الغرفة.
– ½ كوباية سكر.
– 2 بيضة كبيرة بدرجة حرارة الغرفة.
– ½ كوباية ساور كريم (كريمة حامضة) بدرجة حرارة الغرفة.
– 1 معلقة صغيرة فانيليا.
طريقة التحضير:
1- سخني الفرن على درجة حرارة 180 درجة مئوية ، حضري صينية الكب كيك وحطي فيها ورق الكب كيك وخليها على جنب.
2- في طبق اخلطي البسكويت المطحون مع السكر ، وقلبيهم كويس مع بعض ، ضيفي الزبدة السايحة وقلبيهم مع بعض لحد ما يمتزجوا كويس ، قسمي خليط البسكويت على 18 واحدة كب كيك ، واضغطي عليها بقعر كوباية ضغط قوي عشان تتماسك مع بعض كويس وسيبيها على جنب.
3- دلوقتي هنحضر خليط الجبنة ، في طبق ضيفي الجبنة الكريمي واضربيها لحد ما تبقى ناعمة ، ضيفي لها السكر ، واخلطي لحد ما الخليط يبقى ناعم ، بعدها ، ضيفي البيض واخلطي لحد ما يمتزج كويس ، ضيفي الكريمة الحامضة واخلطي كويس ، اخر حاجة ضيفي الفانيليا واخلطي لحد ما تمتزج كويس مع باقي المكونات ، لكن اتأكدي عدم الافراط في الخلط ، اخلطي بس لحد ما يتم دمج كل مكون مع الخليط.
4- وزعي خليط الجبنة بالتساوي فوق البسكويت اللي حضرناه في قوالب الكب كيك ، اخبطي صينية الكب كيك على الرخامة بالراحة عشان تساوي السطح وازالة اي فقاعات هوا زيادة.
5- دخلي الصينية الفرن لمدة 17 – 19 دقيقة ، او لحد ما تحسي ان خليط الجبنة تماسك ، وممكن سطح التشيز كيك يتشقق شوية مافيش مشكلة ده طبيعي ، بعدها خرجي التشيز كيك من الفرن وسيبيه يبرد تماما قبل ما تطلعيه من الصينية ، ولما يبرد ممكن خليط الجبنة يبنزل او يهبط شوية من النص ده طبيعي.
6- دخلي التشيز كيك في التلاجة لوقت التقديم ، عند التقديم تقدري تضيفي عليه من فوق اي نوع صوص تفضليه ، ممكن تضيفي صوص فراولة مع قطع فراولة, كريز, كراميل, او كريم شانتيه.