وصفات طبيعية لعلاج الشعر الجاف
تغيرات المواسم والجو بيأثر على الشعر بشكل سلبي وبيأدي لجفاف الشعر ، وممكن يحتاج لرطوبة زيادة ، عشان ترجعيه صحي وطري تاني ، ولكن بدل ما تدفعي فلوس كتير في علاجات غالية ، النهاردة هنشارك معاكم وصفات طبيعية للشعر الجاف ، بمكونات بسيطة من مطبخك.
وصفات طبيعية للشعر الجاف:
1- ماسك زيت جوز الهند:
كل اللي هتحتاجيه بس هو زيت جوز الهند ، جوز الهند غني بالمغذيات لدرجة ان مجرد تدليكه على جذور الشعر وعلى شعرك كله من وقت للتاني هيفيد كل خصلة وفروة راسك ، ممكن تعملي بيه حمام زيت مرة كل اسبوع.
2- ماسك العسل وزيت الزيتون:
الحاجات اللي هحتاجيها:
4 معالق كبيرة عسل.
6 معالق كبيرة زيت زيتون.
اخلطي العسل مع زيت الزيتون ، وزعي الخليط على الشعر كله ، وغطي الشعر بكيس بلاستيك ، وسيبيه من 15 – 30 دقيقة ، وبعدها اغسليه.
3- ماسك اللبن والعسل:
الحاجات اللي هتحتاجيها:
1 كوباية لبن كامل الدسم.
2 معلقة كبيرة عسل.
اخلطيهم مع بعض ، ووزعي الخليط على الشعر وركزي على المناطق الجافة اوي زي اطراف الشعر ، سيبيه على شعرك حوالي ساعة ، وبعدها غسليه بالشامبو.
4- ماسك الافوكادو وزيت الزيتون والعسل:
الحاجات اللي هتحتاجيها:
1 حبة افوكادو مهروسة.
1 معلقة كبيرة عسل.
2 معلقة كبيرة زيت زيتون.
اخلطي المكونات كلها مع بعض ، وزعي الخليط على الشعر كله ، غطي الشعر بكيس بلاستيك ، وسيبيه على الشعر من 20 دقيقة لساعة ، بعدها اغسليه.
5- ماسك المايونيز:
الحاجات اللي هتحتاجيها:
كمية مايونيز مناسبة لطول وكثافة شعرك.
كام نقطة من اي زيت عطري مفضل عندك.
اخلطي الزيت مع المايونيز ، ووزعيه على شعرك كله ، وسيبيه من 20 – 30 دقيقة ، وبعدها اغسيه بالشامبو.
6- ماسك الفراولة:
الحاجات اللي هتحتاجيها:
200 جرام فراولة.
1 صفار بيضة.
2 معلقة كبيرة زيت زيتون.
اهرسي الفراولة وضيفي لها صفار البيض وزيت الزيتون واخلطيهم كويس مع بعض ، وزعي الخليط على الشعر ، وسيبيه 30 دقيقة ، وبعدها اغسليه.
7- ماسك البيض:
الحاجات اللي هتحتاجيها:
1 صفار بيضة.
1 كوباية لبن.
2 معلقة كبيرة زيت زيتون.
عصير ليمونة.
اخلطي كل المكونات مع بعض ، ودلكي الخليط على فروة الراس ووزعيه على الشعر كله ، وسيبيه 30 دقيقة ، بعدها اغسليه ، الماسك ده بيساعد على ترميم الشعر شديد التلف.
8- ماسك الموز:
الحاجات اللي هتحتاجيها:
2 موزة مهروسة.
1 معلقة كبيرة زيت جوز هند.
1 معلقة كبيرة زيت زيتون.
1 معلقة كبيرة عسل.
اخلطي المكونات مع بعض كويس ، وزعي الخليط على الشعر كله ، الماسك ده من الماسكات السريعة جدا اللي مش بيحتاج اكتر من 5 دقايق عشان مفعولة يشتغل على الشعر.
9- ماسك الزبادي:
الحاجات اللي هتحتاجيها:
½ كوباية زبادي.
1 معلقة صغيرة عسل.
1 معلقة صغيرة من خل التفاح.
اخلطي المكونات مع بعض , وزعي الخليط على الشعر ، سيبيه 30 دقيقة واغسليه ، الماسك ده بيساعد بشكل خاص في علاج الاطراف الجافة والمقصفة ، وبينضف جذور الشعر من الزيوت الزيادة.
10- ماسك خل التفاح والليمون:
الحاجات اللي هتحتاجيها:
1 عصير ليمونة.
¼ كوباية من خل التفاح.
اخلطي الليمون مع خل التفاح ، ودلكي فروة الراس بالخليط ، وسيبيه لمدة 15 دقيقة ، وبعدها اغسليه ، الماسك بيساعد على تنضيف فروة الراس من الزيوت الزيادة ، وكمان بيعالج قشرة الشعر.
11- ماسك الموز والعسل وزيت اللوز:
الحاجات اللي هتحتاجيها:
½ موزة مهروسة.
2 معلقة كبيرة عسل.
3 نقط من زيت اللوز الحلو.
اخلطي المكونات مع بعض ، دلكي الخليط على شعرك وسيبيه لمدة 20 دقيقة ، وبعدها اغسليه ، الماسك ده بيساعد على ترطيب وتنعيم الشعر المجعد.
12- ماسك النشا:
الحاجات اللي هتحتاجيها:
1 معلقة كبيرة نشا.
وزعي النشا على جذور الشعر ودلكيه ، سيبيه 10 دقايق وبعدها بفرشة اتخلصي من النشا الزيادة ، ومافيش داعي تغسليه ، النشا هيمتص الزيوت الزيادة من الشعر ، وده في الحقيقة هيفيد اطراف الشعر المعرضة للجفاف في انواع الشعر المختلطة.
13- ماسك البكينج صودا:
الحاجات اللي هتحتاجيها:
2 معلقة كبيرة بيكنج صودا (كربوناتو).
1 كوباية ماية.
اخلطي البيكنج صودا مع الماية ، وزعي الخليط على جذور الشعر ، ودلكيه كويس ، ممكن تعملي الخطوة دي بعد غسيل الشعر بالشامبو وبعدها اشطفيه بالماية بس ، البيكنج صودا هيمتص اي بقايا منتجات متراكمة على الشعر اللي بيكون صعب غسلها ، وده هيمنعها من تجفيف الشعر بمرور الوقت.
