طريقة عمل حلوى قرن الغزال Gazelle Horns

ريهام محمود
ريهام محمود
805

حلوى قرن الغزال Gazelle Horns هي نوع حلويات بيكون واخد شكل هلالي ومحشي بحشوة اللوز وماء زهر البرتقان ومتغطي بالفستق المطحون ، وهي تعتبر من الحلويات اللي ليها شعبية كبيرة في بلاد شمال افريقيا تونس, الجزائر, المغرب ، ومعروفة كمان باسم التشريك, التشارك, او كعب الغزال ، تعالوا نشوف طريقتها مع بعض بالخطوات والفيديو.

طريقة عمل حلوى قرن الغزال:

مقادير الحشو:

– 2 ¼ كوباية لوز.

– ¾ كوباية سكر.

– 1 معلقة كبيرة سكر.

– ¼ معلقة صغيرة قرفة مطحونة.

– 1 بيضة.

– 1 معلقة كبيرة ماء زهر البرتقان.

مقادير العجينة:

– 2 كوباية دقيق.

– ½ كوباية زبدة طرية, غير مملحة, ومتقطعة مكعبات.

– رشة ملح.

– 1 بيضة مخفوقة.

– 3 معالق كبيرة زيت نباتي.

– 1 ¼ معلقة كبيرة ماء زهر البرتقان.

للتزيين:

– 6 معالق كبيرة عسل.

– 1 معلقة كبيرة ماء زهر البرتقان.

– 3 معالق كبيرة فستق مطحون خشن ، او حسب الرغبة.

حلوى قرن الغزال 1
حلوى قرن الغزال 1

طريقة التحضير:

الخطوة 1:

سخني الفرن على درجة حرارة 150 درجة مئوية ، حطي ورق زبدة على صينية الخبز ، ووزعي اللوز على صينية الخبز.

الخطوة 2:

دخلي اللوز في الفرن السخن لحد ما يتحمص وريحته تطلع ، لمدة 20 – 25 دقيقة تقريبا.

الخطوة 3:

اثناء تحميص اللوز حضري العجينة ، في طبق كبير اخلطي الدقيق مع الزبدة والملح ، وافركيهم مع بعض لحد ما الخليط يبقى شبه فتات الخبز ، ضيفي البيض, الزيت, و 1 ¼ معلقة من ماء الزهر ، اعجني كل المكونات مع بعض كويس لحد ما تتشكل عندك عجينة ناعمة ، ولو حسيتي ان العجينة ناشفة اوي معاكي ، ضيفي 1 معلقة صغيرة ماية واعجني لو لسه محتاجة ضيفي معلقة كمان واعجني لحد ما قوام العجينة يظبط معاكي ، شكلي العجينة على شكل كورة كبيرة ولفيها بغلاف بلاستيك وسيبيها على جنب ترتاح لمدة 30 دقيقة.

حلوى قرن الغزال 2
حلوى قرن الغزال 2

الخطوة 4:

هنحضر الحشو ، طلعي اللوز بعد ما يتحمص من الفرن وسيبيه يبرد شوية  حوالي 5 دقايق ، اضربي اللوز في محضر الطعام لحد ما يبقى ناعم ، ضيفي مع اللوز في محضر الطعام ¾ كوباية السكر مع 1 معلقة كبيرة سكر, القرفة, البيض, و 1 معلقة كبيرة ماء زهر بنفس الترتيب واضربيهم مع بعض لحد ما الخليط يمتزج كويس مع بعض بالتساوي ويبقى شبه العجينة.

الخطوة 5:

ادهني ايدك زيت وخدي من حشوة اللوز كمية بحجم حبة الجوز او عين الجمل ولفيها بايدك بشكل طولي وتكون النهايات رفيعة من الناحيتين لحد ما تخلصي كمية الحشو كلها.

الخطوة 6:

سخني الفرن على درجة حرارة 165 درجة مئوية ، وحطي ورقة زبدة على صينية الخبز.

حلوى قرن الغزال 3

الخطوة 7:

افردي نص العجينة على سطح مرشوش بالدقيق لحد ما تبقى سمكها رقيق اوي ، حطي واحدة من قطع عجينة اللوز اللي احنا شكلناها على حرف العجينة ، واتني العجينة فوق الحشو بحيث تغطيه بالكامل ، واقفلي الحواف بتاعتها كويس ، وشكليها بصوباعك على شكل هلال ، وباستخدام قطاعة المعجنات ، اقطعي حوالين الهلال ، وانقليها لصينية الخبز ، كرري نفس الطريقة مع باقي العجينة كلها.

الخطوة 8:

دخلي الصينية في فرن سخنة لحد ما قرون الغزال يبقى لونها دهبي فاتح ، حوالي 20 دقيقة ، المفروض ميبقاش لونها غامق ، وطلعيها من الفرن وسيبيها تبرد شوية ، حوالي 3 دقايق.

الخطوة 9:

سخني العسل في طاسة صغيرة على نار خفيفة لمتوسطة ، بعدها ارفعيه من على النار وضيفي له 1 معلقة كبيرة ماء زهر ، اغمسي قرون الغزال في العسل ، ورصيها في طبق التقديم ، ورشي فوقيها الفستق المطحون ، او ممكن ترشي عليه سكر بودرة بدل العسل.

حلوى قرن الغزال 4

الطريقة بالفيديو:

مقالات متعلقه

طريقة عمل حلوى اللدو الهندية

طريقة عمل حلوى اللدو الهندية

طريقة عمل كيك الصفوف اللبنانية

طريقة عمل كيك الصفوف اللبنانية

طريقة عمل M&M كوكيز كيك

طريقة عمل M&M كوكيز كيك