نصايح مهمة لما تيجي تصبغي شعرك في البيت
عادة صبغ الشعر او قصه الافضل يكون عند متخصص عشان يطلع معاكي مظبوط ، ولكن لو انتي حابه تصبغي شعرك في البيت وتخوضي التجربة دي بنفسك ، في حاجات لازم تحطيها في اعتبارك قبل ما تصبغي شعرك ، والنهاردة من خلال موضوعنا هنشارك معاكم نصايح عند صبغ الشعر في البيت عشان تديكي النتيجة المطلوبة.
نصايح عند صبغ الشعر في البيت:
1- اختبار اللون:
لو هتصبغي شعرك في البيت الافضل انك تختبري اللون الاول على خصلة صغيرة مش باينة من شعرك قبل ما تحطي الصبغة على شعرك كله ، عشان تتأكدي انك اختارتي درجة اللون المناسبة ، ممكن تجربي على الشعر ورا الاذن بحيث انه ميبقاش باين ، حطي الصبغة لمدة 15 دقيقة وشوفي النتيجة.
2- اشتري عبوتين:
استخدمي عبوتين من نفس درجة اللون لو شعرك طويل او خشن اوي او لو الشعر بطول كتفك ، ومهم انك تخلطي الصبغة في طبق بلاستيك او زجاجي ، لان الطبق المعدني هيسبب اكسدة الصبغة ، وده ممكن يغير لون الصبغة وهيديكي نتيجة غير اللي انتي متوقعاها.
3- ما تخلطيش درجات مختلفة عشان تعملي لون جديد:
مش بننصح باستخدام درجات مختلفة من لون واحد ، لان اللون المركب من خلط الالوان عادة نتيجته النهائية بتيجي غير اللي احنا متوقعنها وبتبقى مختلفة عن اللي موجودة على العلبة ، حتى لو بتستخدمي درجات نفس اللون ، افضل طريقة عشان تتجنبي ده هي ببساطة اختيار لون واحد ، وامشي على التعليمات اللي على العبوة.
4- البسي حاجة سهلة القلع:
الافضل وانتي بتصبغي تلبسي حاجة سهل تقلعيها زي قميص بزراير ، وغطي المكان حواليكي بأكياس بلاستيك او بطبقات من ورق الجرايد وبعد ما تخلصي ترميها ، بدل ما تستخدمي ملاية او فوطة اللون يمسك فيها ويمكن ماتعرفيش تتخلصي منه.
5- احمي جلدك:
كتير من انواع الصبغة ممكن تسبب تهيج وتلطيخ للجلد ، عشان كده لما تيجي تحطي اللون ، الافضل تدهني فازلين على طول خط الشعر بصوابعك او بعود قطن.
6- فكي تشابك الشعر
بننصحك انك تسرحي شعرك كويس وتقسميه خصل وتضفريها قبل الصبغة ، ده هيمنع اي عقد او تشابك ممكن يحصل ويخلي الصبغة متتوزعش بشكل متساوي ، بالاضافة لما هتيجي تغسلي شعرك بالشامبو مش هتحتاجي تقعدي تفكي تشابك شعرك ، عند الغسيل ابدأي بس بتمشيط الشعر من اول الاطراف للجذور باستخدام مشط اسنانه واسعة او بفرشة مبلولة.
7- قسمي شعرك:
قسمي شعرك 4 اجزاء ، قمسين قدام الاذنين وقسمين وراها ، عشان ما تفوتيش صبغ اي خصل من الشعر ، والصبغ هيبقى اسهل والعملية منتظمة وانتي مقسمة شعرك.
8- اقري التعليمات:
لازم تحطي النصيحة دي في الاعتبار ، امشي على التعليمات اللي على العلبة بعناية ، لان الصبغات اللي بنستخدمها في البيت نتصممة انها تشتغل بطريقة معينة ، عشان كده مهم انك تقري التعليمات كويس وتمشي عليها ، زي وقت تطبيق الصبغة على الشعر وازاي تغسليها.
9- استخدمي ادوات الصبغة:
استخدمي طبق والفرشة الخاصة بالصبغة لتطبيق الصبغة على شعرك ، عشان توصلي لافضل النتايج زي صالون التجميل وتتجنبي الفوضى.
10- حطي الصبغة على الجذور الاول:
البدء بالجذور هي افضل طريقة لوضع صبغة الشعر ، لان الجذور هي الاماكن اللي بيحصل فيها اعادة نمو الشعر الاول وهي كمان بتكون الاجزاء الاقل تلفا ، وبالتالي هي بتحتاج اكتر وقت للصبغة.
11- اغسلي شعرك بشكل صحيح:
الافضل تشطفي شعرك بالماية قبل غسله بالشامبو بعد الصبغة على طول ، واتأكدي من استخدام شامبو خالي من الكبريتات ، لان الكبريتات بتسبب بهتان لون الشعر.
12- الحفاظ على اللون:
هدفك النهائي دلوقتي هو الحفاظ على اللون اللي عملتيه ، لازم تغسلي شعرك المصبوغ بشامبو مخصوص للشعر المصبوغ ، ولو عايزة اللون مايبهتش ويقعد معاكي اطول فترة ، قللي غسيل الشعر لمرتين في الاسبوع مش اكتر من كده.