طريقة عمل وصفة كروكيت الفراخ المقلية
وصفة كروكيت الفراخ المقلية من الوصفات السهلة واللي طعمها لذيذ جدا ، وتنفع كمقبلات او طبق جانبي ، وتقدري تعمليها بالفراخ او بلحم الديك الرومي حسب اختيارك ، تعالوا نشوف مع بعض الطريقة بالخطوات.
وصفة كروكيت الفراخ المقلية:
المقادير:
– الكمية دي هتعمل تقريبا 6 وحدات كروكيت.
– ¼ كوباية زبدة.
– ¼ كوباية دقيق.
– ½ كوباية لبن.
– ½ كوباية شوربة فراخ.
– 3 كوبايات فراخ مسلوقة ومتقطعة ناعم.
– 1 ½ كوباية بقسماط مطحون.
– 2 بيضة مخفوقة.
– ¼ كوباية بصل مفروم.
– 1 معلقة كبيرة بقدونس مجفف.
– ¼ معلقة صغيرة ثوم بودر.
– 1/8 معلقة صغيرة من بذور الكرفس.
– 1/8 معلقة صغيرة شطة.
– ملح وفلفل اسود حسب الرغبة.
– ¼ كوباية زيت ، او حسب الحاجة.
طريقة التحضير:
1- في طاسة على نار متوسطة دوبي الزبدة ، قلبي الدقيق في الزبدة ، سيبي الدقيق يطبخ ويتشكل عندك معجون ، لمدة دقيقة تقريبا ، ضيفي اللبن وشوربة الفراخ وقلبيهم ببطء مع خليط الزبدة والدقيق ، لحد ما الخليط يبقى كثيف وناعم ، تقريبا من 5 – 10 دقايق ، ارفعي الصوص من على النار وسيبيه يبرد شوية ، حوالي 10 دقايق.
2- في طبق اخلطي الفراخ, 1 كوباية بقسماط, البصل, البقدونس, الثوم البودر, بذور الكرفس, الملح, والفلفل الاسود ، ضيفي الصوص اللي حضرناه في الخطوة اللي فاتت لخليط الفراخ وقلبيهم مع بعض كويس ، غطي الطبق بغلاف بلاستيك وحطيه في التلاجة لحد ما يبرد تماما لمدة ساعتين على الاقل.
3- قسمي خليط الفراخ ل 6 قطع على شكل اقراص او كرات ، حطي باقي كمية البقسماط في طبق ، واغمسي كل قطعة فراخ في البقسماط لحد ما تغطيها كلها.
4- في طاسة كبيرة سخني الزيت على نار متوسطة لعالية ، ونزلي الكروكيت في الزيت السخن ، مع تقليبها للجنب التاني مرة واحدة بس ، لحد ما تستوي ويبقى لونها بني دهبي من الجانبين ، حوالي 10 دقايق.
5- وكده كروكيت الفراخ جاهزة للتقديم.