طريقة عمل شوربة الحريرة المغربية
شوربة الحريرة من اشهر الاكلات في المطبخ المغربي ، وتعتبر من الاطباق الاساسية في رمضان على السفرة المغربية ، والنهاردة في موضوعنا هنتعرف على طريقة عمل شوربة الحريرة بالخطوات والفيديو.
طريقة عمل شوربة الحريرة:
المقادير:
– 300 جرام لحمة بقري من غير عضم ، متقطعة قطع صغيرة.
– 1 بصلة متوسطة الحجم ، متقطعة قطع صغيرة او مبشورة.
– 5 حبات طماطم ، متقشرة ومبشورة او عصير (اعملي علامة اكس على الطماطم من فوق واغليها في ماية سخنة لمدة 5 دقايق وبعدين قشريها واعصريها).
– 2 معلقة كبيرة بقدونس مفروم ناعم.
– 2 معلقة كبيرة كزبرة خضرا مفرومة ناعم.
– 3 معالق كبيرة كرفس مفروم ناعم.
– 1 كوباية حمص (منقوع من قبلها ليلة كاملة او استخدمي حمص مسلوق).
– 1/3 كوباية عدس.
– 3 معالق كبيرة شعرية.
– 4 معالق كبيرة دقيق مدوبين في ½ كوباية ماية.
– ملح حسب الذوق.
– فلفل اسود.
– 1 معلقة صغيرة بودرة جنزبيل.
– 2 معلقة صغيرة كركم.
– ½ معلقة صغيرة شطة.
– رشة زعفران.
– عود قرفة خشب.
– 2 معلقة كبيرة سمنة او زبدة او زيت.
– 6 كوبايات ماية سخنة (كمية الماية لحد ما تغطي المكونات).
طريقة التحضير:
1- في حلة على نار متوسطة ضيفي السمنة او الزيت ، ضيفي لها اللحمة وشوحيها في السمنة دقيقتين.
2- ضيفي لها البصل ، وقلبيهم مع بعض.
3- ضيفي الملح, الكرفس وقلبي المكونات.
4- ضيفي الكركم, الفلفل الاسود, الجنزبيل, الشطة, قلبي البهارات مع باقي المكونات كويس لحد ما تمتزج مع بعض ، وشوحيهم لمدة 2 – 3 دقايق ممكن تضيفي معلقتين كبار ماية اثتاء تقليب المكونات.
5- ضيفي عود القرفة والزعفران وقلبي المكونات.
6- ضيفي الطماطم, الحمص, العدس ، وسيبيها على نار هادية لمدة 20 دقيقة ، وقلبيها من وقت للتاني.
7- ضيفي الكزبرة الخضرا, الشعرية ، وقلبي المكونات ، وضيفي لهم الماية ، وقلبيهم مع بعض.
8- سيبيها تطبخ على نار هادية لمدة 20 دقيقة كمان ، مع التقليب من وقت للتاني.
9- ضيفي الدقيق المدوب في الماية للخليط ، وقلبيهم مع بعض.
10- سيبيها تطبخ على نار هادية لمدة 3 دقايق.
11- ضيفي البقدونس المفروم ، وقلبيهم مع بعض.
12- وكده الحريرة جاهزة للتقديم.