ازاي تنسقي الجاكيت الجلد في الشتا
لو عايزة لوك تبقي مرتاحة فيه وفي نفس الوقت انيق في الشتا ده ، يبقى الاختيار المثالي هو الجاكيت الجلد ، لانه تقدري تنسقيه على حاجات كتير عندك في الدولاب ، والنهاردة من خلال موضوعنا هنقولك مجموعة نصايح لتنسيق الجاكيت الجلد ، بالاضافة لافكار ستايلات بالصور تستوحي منهم اللوك بتاعك.
نصايح لتنسيق الجاكيت الجلد:
نسقيه مع طبقات:
في الايام البرد الجاكيت الجلد هيدفيكي وفي نفس الوقت هيبقى مريح ، ممكن تعملي لوك متعدد الطبقات ، وتنسقي تيشرت اساسي مع سويتر او قميص بزراير مع سويتر ، وفوقيهم الجاكيت الجلد ، ال 3 طبقات يعتبر اختيار بسيط ومثالي لتحسين مظهرك.
البطانة الداخلية:
اختاري جاكيت جلد يكون متبطن من جوه ، البطانة او الطبقة الداخلية دي بتزود من عزل الجاكيت ، وده بيخليه اكتر راحة ودفء في الايام البرد.
نسقي معاه بوت مناسب:
الشتا هو الوقت المناسب للبس البوت سواء الانكل او الطويل ، وبيطلع شكلها حلو جدا مع الجاكيت الجلد ، الحاجة الوحيدة اللي لازم تفتكريها لما تيجي تنسقي البوت مع الجاكيت ، انك تختاري بوت بنفس لون الجاكيت الجلد لان ده هيضمنلك لوك متناسق مع بعضه ، يعني لو لابسة جاكيت جلد اسود ، التزمي انك تنسقي معاه بوت اسود ، ولو الجاكيت الجلد بني ، يبقى اختاري البوت باللون البني وهكذا مع كل الالوان.
افحصي الخامة:
الجاكيت الجلد مش شرط يكون مصنوع فعلا من الجلد لمجرد انه شكل الجلد ، لان في بعض الشركات بتستخدم الجلود الصناعية ، ودي هتلاقي سعرها رخيص ، لان خامتها بتكون رديئة وهتبوظ منك بسرعة والجاكيت هيقشر ، عشان كده بننصحك انك تختاري الجاكيت الجلد الاصلي 100% مش الصناعي ، لان ده اللي هيعيش معاكي اطول فترة من غير ما يقشر.
ترطيب الجلد:
برودة الهوا ودرجة الحرارة المنخفضة والهوا الجاف ممكن انه يسبب تشققات في الجاكيت الجلد ، ولكن لحسن الحظ انك تقدري تتفادي المشكلة دي عن طريق ترطيب الجلد بتاع الجاكيت مرة واحدة في الشهر ، باستخدام مرطب الجلد ، وضع منتج ترطيب على الجاكيت الجلد هيساعد على ترطيب الخامة بتاعته وبالتالي حمايته من الهوا الجاف ، ولكن افتكري انك ترطبي الجاكيت باعتدال يعني مرة واحدة في الشهر هتكون كافية جدا ، لان الترطيب زيادة عن اللزوم ممكن يعمل نتيجة عكسية ويضر اكتر ما ينفع.
نسقيه مع جيبة وليجينج:
من الستايلات اللي بتكون حلوة جدا هي تنسيق الجيبة القصيرة مع الليجينج والجاكيت الجلد ، من اللوك المناسبة جدا للشتا ، افتكري بس تختاري الليجينج بلون مناسب لباقي القطع بما فيهم الجاكيت الجلد.
غيري من اللون الاسود والبني:
المعروف والشائع في الجاكيت الجلد هي الالوان الاسود والبني ، ولكن مش معنى ان اللونين ده عشان منتشرين او شائعين اكتر حاجة هما بس الالوان المتاحة ، لكن على العكس ، الجاكيت الجلد متوفر بألوان كتير ، يعني بدل ما يبقى اختيارك محدود ما بين الاسود والبني بس ، فكري تغيري وتختاري الوان مختلفة ، زي الجاكيت الجلد باللون الاحمر, الاخضر, النبيتي ، يعني الخلاصة انك تفكري بره الصندوق وماتبقيش تقليدية لما تيجي تختاري الجاكيت الجلد للشتا ده.
ضيفي له اكسسوار بالسكارف:
الاكسسوارات بتلعب دور مهم في مظهرك ، وبتظهر اللوك بتاعك اكتر ، جربي لما تيجي تلبسي جاكيت جلد المرة الجاية حطي في اعتبارك اضافة اكسسوار باستخدام سكارف ، السكارف من الاكسسوارات اللي هتضيف لون جديد للوك بتاعك وفي نفس الوقت هيدفيكي ، اختاري سكارف يكون بلون مختلف عن لون الجاكيت الجلد ، مش شرط يكون لون متناقض تماما ، ولكن لون مختلف يمشي مع لون الجاكيت ويضيف شكل حلو للوك.
حافظي على نضافته:
اخر حاجة ، اتأكدي من الحفاظ على نضافة الجاكيت الجلد ، وده ممكن تعمليه ببساطة جدا عن طريق مسح الجاكيت بقطعة قماش مبلولة لازالة اي غبار او اوساخ متراكمة عليه ، وعشان تعرفي معلومات اكتر عن طريقة تنضيف الجاكيت الجلد بتاعك ممكن تبصي للملصق اللي موجود عليه لانه في الغالب بيكون مكتوب عليه طريقة العناية بيه وتنضيفة.